باشیوی جداده گورن دیر گل گلستان رباب اوغول

بو جهاندا آل امیّه نین ایوی کاش اولیدی خراب اوغول


باشیوی جداده گورن دیر گل گلستان رباب اوغول

بو جهاندا آل امیّه نین ایوی کاش اولیدی خراب اوغول

بو طرفده بیر قوری نی کیمی ایدورم نوا من بینوا

او طرفده چنگ و ربابیله بیزه پیشواز ایدوب اشقیا

قاریشوبدی بیربیره نای و نی چخوب عرشه ناله ایله نوا

بو طرفده ناله رباب ایدر او طرفده ناله رَباب اوغول

سرِ نِی ده گون تک اولوب باشی آتاوین مروّج شرع و دین

ولی گیزلدردیله قوم کین باشون اولماسیدی اونا معین

باشون ایلوری اَمَویلرین هامی کفر و ملعنتین مبین

نه کسوبدی بیر سودامر باشین نه کسر بیر اهل کتاب اوغول

نه اولوبدی بیر اوشاقا ستم سنه یوز ویرن بو ستم کیمی

بیر آنایه نه یتیشوب الم ایویمی یخان بو الم کیمی

ایله دلده موجه گلوبدی غم داشوری گوزوم یاشی یم کیمی

نه اولار غمون کیمی بیر عزا نه منه مثال مصاب اوغول

غم و غصّه یوز ویروری گوزوم باخوری بو شهریده هر یانا

گورورم که بیر سودامر بالا آلوب اوز قوجاقینه هر آنا

آخوری عذاره گوزوم یاشی گلورم فغانه یانا یانا

ایشیدن سیزیلتیمی سویلوری یانوری اود اوسته کباب اوغول

ایکی حسرت اللریمی گهی دیزیمه قووشدورورام علی

گهی سینمین سودی موج ایدور سینمی اوغوشدورورام علی

بو طریقیله اورگیمده کی اودیمی سووشدورورام علی

چوخ عجبدی صاق قالوب اُلموری بو ایوی خراب رباب اوغول

دگوری صبا یِلی نیزه ده حرکت ویرور بالا تِل لره

پوزوری شماتت ایدنلری ایدوری ملول بو منظره

او غمیکه یاندورا دشمنی گور اولار نه سوزشی مادره

آنانین داش اولسا اگر دلی گور ایدر تحمّل و تاب اوغول

بیر اووون بالاسینی رسمیدور ایلیه بیر اوچی شکار اگر

آناسی دالنجا دوشر ملر بالاسی گیدن یولی طیّ ایدر

باشیوین دالنجا اودور دوشوب بو ایوی یخلمش آنان ملر

ایدر اوز دقایق عمرینی اجلی گلینجه حساب اوغول

فلک هدایته شمسدور آتاوین کسوک باشی نیزه ده

قمر منیریدی تک به تک هامی قوم و قارداشی نیزه ده

او گویون ستاره سی دور باشون مه و مهر یولداشی نیزه ده

ایله بیر ستاره گوروب نه یر نه بو هفت پرده قباب اوغول

هله گرمدور ایله داغ دل که بولنمورم اثراتینی

بولرم مرور زمانیله بو مصیبتین حرقاتینی

ایشیده اگر بیر آچوخ قولاق بو یارا دلین ضرباتینی

غم اودی بولر سو کیمی ایدوب بو یارالی قلبی مذاب اوغول

آناوین الیندن آلوب ایله بو ملال تاب و توانینی

که چکوب سس آغلوری باخموری ایشیدولّه داد و فغانینی

منه ویرسه لر او کسوک باشون یووارام سرشکیله قانینی

گلسرخ تک اُپوب ایگلرم سپرم او گل یوزه آب اوغول

هله بو اسارت غمفزا هله بو شماتت اشقیا

اولور آغلاماقلیقا مانعیم دیه بولمورم سوزیمی بالا

دولانوب اگر گله بیر زمان بو اسیرلیقدان اولام رها

ایله آغلارام یم اشکیمه گورونر بو چرخ حباب اوغول

بیر حسین نوکری که اونون بو حسینه چوخدی محبّتی

لقبی هنرور آدی حسین حاجی بقّال اوغلیدی شهرتی

دیدی یاز «حسینیه» اصغرین باشنا بو شرح مصیبتی

باشیوی جداده گورن دیر گل گلستان رباب اوغول