هلال برج عزت گون الینده باتدی گل زینب

چوخ آغلوردی بالام لای لای دیدی اوخ ، یاتدی گل زینب


هلال برج عزت گون الینده باتدی گل زینب

چوخ آغلوردی بالام لای لای دیدی اوخ ، یاتدی گل زینب

آلان یوخ بیر نفر بو قانلی قنداقی قوجاقیمدن

سنه معلومدور حالی ربابین، اوز سیاقیمدن

یوزیندن اوپمیشم از بس، آخور قانی دوداقیمدن

یوزیمده،اللریمده تازه قانه باتدی گل زینب

آچلدی عالم ارواحده تا عشق بازاری

متاع وصل حقین اولمادی من تک خریداری

آچوب اکبر آدی، اصغر آدی ختم ایتدی طوماری

بالام اوخلاندی ، من آلدیم ، حبیبیم ساتدی گل زینب

رباب آغلوردی سویلوردی آز آغلا سینه می داغلا

گورنده آغلامور ایندی دیور آغلا بالام آغلا

آناسندان باجی گیزلین یاراسین گل آپار باغلا

آنا آغوشنون فکرین باشینان آتدی گل زینب

دگن ساعت بوغازنان بو قوم سفله پیکانی

یارالاندی جگر گوشم گلوب جوشه جگر قانی

پوزولدوم باغریما باسدیم باجی بو تشنه قربانی

یاراسیندان آخان قان، سینه می ایسلاتدی گل زینب

عطشدن ایله سولموشدی سارالمیشدی بو دلخسته

گورنده سس چکوپ آغلاشدی دشمن دسته به دسته

سها تک اصغری هر کیم باخوب گوردی الیم اوسته

منی مهره ، بالامی اولدوزا اوخشاتدی گل زینب

بوغاز نازک، آتان قول قوه لی ، اوچ شعبه لی پیکان

اودور علت بوغازین بیچدی اوخ چون خنجر بران

گیچوب دگدی قولومدان ، آخدی قان بو فرقه عدوان

ایکی قان بیر بیرینه بیر اوخیله قاتدی گل زینب

ربابین سینه سین ، اوز صورتین دیرناق یاراسیله

خراش ایلوردی  آجلیقدان ، سو فکری سود هواسیله

نه آغلور نه دینور نه حسی وار بیر اوخ صداسیله

بالامی حرمله سسدن سالوب یوخلاتدی گل زینب

بالام پستان خیال ایتدی ازل پیکان دمین امدی

بولوب تا سوزشین ، آچدی گوزون گوردی ئولن دمدی

ایله گولدی او گولماق تا جهان وار مایه غمدی

دوباره گوزلرین یومدی مرامه چاتدی گل زینب

"حسینی" ویردی الدن سود امر بیر طفل شش ماهه

یتوب بولدی نه غم اصغر غمینده حجه اللهه

نشست ایلر بو سوز ، چون نوک پیکان قلب آگاهه

هلال برج عزت گون الینده باتدی گل زینب