ای یگانه مصلح دنیا و دین یابن الحسن

گَل یولون گوزلور هامی اهل یقین یابن الحسن


ای یگانه مصلح دنیا و دین یابن الحسن

گَل یولون گوزلور هامی اهل یقین یابن الحسن

ای هدایت چرخینون بیر نیّر تابانی گَل

ای سَریر عزّت و آزادگی سلطانی گَل

گَل گَلن یولّاریون تپراقنون قربانی گَل

ای امید عترت حَبلُ الْمَتین یابن الحسن

ای حریم مصطفایه یوسف گُل پیرهن

دولدوروب دنیانی یابن العسکری جور و فتن

دم ورار چوخلار جهاندا صلحدن، اصلاحدن

گَل یغشدیرسون بساطین آن و این یابن الحسن

بیر مریض عشقه بنزَر بو جهان جان اوسته دی

عالم اسلام یکسر کفر الیله خسته دی

روزیِ هر ذی حیات آخِر سنه وابسته دی

ای اَلینده آفرینش بیر نگین یابن الحسن

انحرافه چکدی اسلامی اگر اهل ضلال

یوز ویرر قلب رسول اکرمه درد و ملال

اولما راضی جدّیون احکامی اولسون پایمال

ای سریر عزّته مسند نشین یابن الحسن

سَن او سلطان عظیم الشَّان سَن ای شهریار

که ظهوروندن چکر بیر اهل عالم انتظار

دور ایدر فُوج مَلَک درگاهیوی پروانه وار

خاک بوس مقدمون روح الامین یابن الحسن

دوزدی عشّاقین فراقوندا قالوب آغلار گوزی

دل اگر مسئول اوزین بولسه، دانیشماز هر سوزی

سرِّ تاخیرون ندور، عالِمدی بیر ا... اوزی

نه بولر اخیار، نه اهل یقین یابن الحسن

نامسلمانلار ورار اسلامه هردم نیشخند

سنگ دللر نه تذکّر بیر قبول ایلر نه پند

پرده ی غیبت او گُل رخساره حایل تا به چند

تا به کی مَه یوزده قالسون آستین یابن الحسن

ای وجود نازنینی عالم خلقتده تک

بیر دولانسون باشیوه دُور ایلوری دورِ فلک

کسب فیضه عرش اعلادن نزول ایلر ملک

پای بوسون حسرتی عرش برین یابن الحسن

عالمین اصلاحینه گوزلَر هامی عالم سنی

آشنالرده بولر اوز دردینه مَحرم سنی

شیعه لر شاها تانور مطلق ولیِّ دم سنی

گَل قصاص آل، کَس هامی ظالم اَلین یابن الحسن

سیّدی گر یاده سالسام کربلا طوفانینی

دولدورار حتما سرشکیله آنان دامانینی

گَل اَلون قربانی آل جدّون حسینون قانینی

عدلیله دولسون هامی روی زمین یابن الحسن

سیّدی حیراندی عالم جدّیون تمکینینه

اولمادی بیر کس ایده اقدام اونون تکفیلینه

کوفه دن اوچ گون صورا تکفینینه تدفینینه

گَلدی اِعجازیله فَخْرُ السّاجِدین یابن الحسن

گوزلرون قربانی طول اولدی زمان انتظار

تا به کِی احِبّایون اولسون هجر الینده بی قرار

صدر زهرانین شفاسین ای ولیِّ کردگار

ذوالفقارونده قویوب خلق آفرین یابن الحسن

سیّدی سنسیز بو دنیانین یوزی گولسون محال

بو امیدیله یولون گوزلر سنون اهل کمال

انتقام حضرت زهرانی گَل دشمندن آل

ظلمینون گورسون جزاسین اهل کین یابن الحسن

سیّدی نچّه جهتدن من مریشم یوخ سوزوم

بو بلالرده صفالر وار بونی بُلّم اوزوم

چون ولیِّ نعمتیم سنسن الونده وار گوزوم

خدمتین خوندل بولر ناقص همین یابن الحسن