ای گوزلریم طاقت گتور باخ یوللارا یارون گلور
ای دل یورولما غصه دن دوز درده دلدارون گلور
دوندرمه گوزیاشون سئله
یـار عشقینـه طاقت ائله


ای گوزلریم طاقت گتور باخ یوللارا یارون گلور
ای دل یورولما غصه دن دوز درده دلدارون گلور
دوندرمه گوزیاشون سئله
یـار عشقینـه طاقت ائله


گتمه گوزوم رویالره گوز تیک نگارین راهینه
ایله دعا صبح و مسا بو عرش عشقین ماهینه
هجران آغارتدی باشلاری جاری ایدوب قان یاشلاری
مولا دوشوب یوسف کیمی ایللردی هجران چاهینه
بیر گون بو ماهین فجری وار
دوز منتظر اول اجری وار


دوزسون فراقه آی گوزوم بو ایش سنه تمرین اولار
بی صبر و تاب عاشقلرین سیمالری غمگین اولار
باخ یوللارا یار عطرین آل ایله تجسم گوزلره
یورقونلق احساس ایلسون کیپریکلرون سنگین اولار
هجران غمی چوخ سختیدور
کیم تاب ایدوب خوشبختیدور


ای دل چالشما قوش کیمی عاشق مأب اول صبر ایله
پیک ایلیوب اوز آهوی قوش گونده یللردن یله
عرض ایله یابن فاطمـه یـول گوزلیـور عاشقلرون
قویمـا سـرای صبـرینی عاشقلـرون ویرسون سئله
گلسون اورکلر شاد اولار
دنیـا یوزی آباد اولار

یابن الحسن کوکو کیمی من روز و شب نالانوم
یول گوزلمک یوردی منی تز گل داخی قربانوم
سن سیز عدالت آغلیور انصاف اولوب خانه نشین
وجـدان عـذاب آلتندادی مشتـاق الرحمانوم
قرآنه گل امداد ایله
زندانیدور آزاد ایله

دیللر همالر بالی تک قید جفایه بسته دور
بیر گون بیزه امید اولان گور کیملره همدسته دور
سسلر باتوبدور سینه ده مظلومه یوخ امداد ایدن
رحمی سالوبلار رسمیدن روحیه لر دای خسته دور
دیو اگلشوب دیوانیده
مظلوم ایدوب قرانیده

انسانیت ماتم دوتوب بو درده وجدان آغلیور
حقی باتان ایتام تک انصاف اوزی قان آغلیور
راهین آدیلان بعضی لر یولدان چیخوب چاهه دوشور
بو غفلـته بو ذلتـه حسرتلـه قـرآن آغلیور
سیمای دین باتمش غمه
دین اگلشوبدور ماتمه