آچلدی سوم شعباندا خلقه باب نجات

مدینه نین یوزی روشن اولوبدی چون مشکات


آچلدی سوم شعباندا خلقه باب نجات

مدینه نین یوزی روشن اولوبدی چون مشکات

ویروبدی بیر نوه پیغمبر او قادر ذات

بودور تجلی اسلامه مظهر و مرآت

نثار ایله حسینون جمالینه صلوات

 حجازه گون تک او مولود ایشیق سالوب بوگجه

بو انجلایه ملائک وله قالوب بو گجه

دیوله فطرس حسیندن برات آلوب بو گجه

حسین دیه دیه گویده قناد چالوب بو گجه

نجه بشردی که اوندان آلوب فرشته نجات

نثار ایله حسینون جمالینه صلوات

بیر سوروشدی نبی دن که ای رسول الله

نه علته بویوروبسوز حسینه باب الله

بوبیوردی بیز هامی باب اللهوخ ولی ؛ الله

عطا ایدئبدی حسینه بیر ئوزگه عزت وجاه

قاپوسی هامیدان  اوسعدی  منبع برکات

نثار ایله حسینون جمالینه صلوات

تولدنده اونون ماسوا ایشیقلاندی

قماطی گوگلره گیتدی سما ایشیقلاندی

قیتدی ، دیده خیرالنسا ایشیقلاندی

مدینه ، مکه ، صورا کربلا ایشیقلاندی

که وعده گاهیدی بو عاشقه کنار فرات

نثار ایله حسینون جمالینه صلوات