زندانیم زهرا ننه  یاد ایله  نالان اوغلوی

گل گور نه احواله قویوب غربتده زندان اوغلوی


زندانیم زهرا ننه  یاد ایله  نالان اوغلوی

گل گور نه احواله قویوب غربتده زندان اوغلوی

 

سیلی دگن   رخساریدن   آئینه شکسته ایم

سقل الحدید آلتندیام  عنقای  شهپر بسته ایم

یوروقون گوزوم ایستور آخا تز گل ننه چوخ خسته ایم

دیلدن سالوبدی محنت جانسوز دوران اوغلوی

 

هر قمچی ردین جسمیده گورسون چیچک شکلینده دی

هر بیر چیچک نجم اولسا گر  جسمیم فلک  شکلینده دی

نجم و فلک یوخ پیکریم  باغ  فدک شکلینده دی

اوخشور فدک ایچره سولان پژمرده ریحان اوغلوی

 

اشگیم ویرور سو جسمیمین گلزارین آباد ایلیور

جسمیم سزلدور سربسر دیل سانکی  فریاد ایلیور

کیم گورسه یول یول جسمیمی زینب قولین یاد ایلیور

عممده دیلده ورد ایدوب اوخشور بو نالان اوغلوی

 

قلبیمده هر  بیر  ساعتین آلامی وار  ایذاسی وار

جسمیمده هر گون قمچینین گوی خطیلن امضاسی وار

امضالرین  ایذالرین  آثارینیون   معناسی وار

جان اوستیم درک ایت آنا قرآنه قربان اوغلوی

 

وادار  اولوب  بیکس بالون مسموم خرمانی ییه

بیر ایش گوروب مسمومیت قادر دگل  دیل سوز دیه

ویرانسراده  گوئیا  عمم  دوشوبدور سجدیه

سالمش یوزی اوسته ایله زندان ظلمان اوغلوی

 

سند ابن شاهک قمچسی اود تک وجودیم داغلیور

گه یول چکور اندامیمه گوی  خطیلن  گه  باغلیور

جسمیم  سزلدور  گوئیا  نازلی   رقیه آغلیور

زندانیده یوخ یاد ایدن بو صبری تالان اوغلوی

 

زندانه گل بیر بیر  دیوم  سند بن  شاهک  نیلور

دوشسم ئوزوم دلدن اگر احوالیمی رنگیم دیور

قولاری  باغلی  سیدی  ورماق مگر فخر ایستیور؟

قمچی نه لازم ئولدوروب مرطوب زندان اوغلوی

 

گیسوی هجرانه اورک بندین شبانه باغلارام

سیل  سرشگی چشم?  دلدن  جماله  باغلارام

بیکس  قالان قیزلاریمه ظلمتده گزلین آغلارام

هیچ سنده یاده سالموسان بو دیده گریان اوغلوی

 

جان چاتدی سولمش لبلره باش  چکمدون نینک منه

بیر  خواهشیم وار  آخرین لحظه جان اوستنده سنه

زندانه گلمک سختیدور قیزلاریمه باش  چک ننه

بی صاحب ایوده گوزلیور آواره طفلان اوغلوی

 

گرچه نحیف اندامیمین مرطوب یرده زجری وار

اما بو زجرین شیعیه  بیر گون  امید  فجری وار

بی کس قالان قیزلاریمون حالین سورشسون اجری وار

غرق مباهات ایت ننه بو قلبی لرزان اوغلوی

 

گتسون دیمم  قیزللاریمه  بیر  هدیه بهتر آپار

محتاج اولوبلار هیچ دیمم الده گوهر یا زر آپار

امکانون  اولسا  بیر نچه  چادر  آپار  معجر آپار

بیرده گورنمزلر  بویور بو سینه سوزان اوغلوی