نه وقته دین ایشیداخ آه یا صاحب الزّمان

غریب جدّیوده تاریک محبس اولدی مکان


نه وقته دین ایشیداخ آه یا صاحب الزّمان

غریب جدّیوده تاریک محبس اولدی مکان

او گون که مقصدینه یتدی سِند کینه خصال

امامی ایلدی مسموم او شوم بد افعال

او نازنین بدنه زهر کین موثّر اولوب

دیر مسیّب امام اولدی چوخ پریشان حال

گیدوب بالالارین اعجازیله وداع ایلدی

قِییتدی محبسه مرده حال و غرق ملال

مقیّد ایلدی زنجیریله دوباره اوزین

بو قدرت و  بو اسارتده چوخدی جای مقال

دیسم اسیریدی، بابُ الحوائج اولماز اسیر

دیسم اسیر دگلدی، ندور او پوزقون حال

کیمون نه قدرتی وار باغلاسون یَدُاللهی

نجه اسیر اولی مرآت قادر متعال؟

بیله خیال ایدورم طوق عشقیدور زنجیر

علاقمند اولور عشق اهلینه اودور اغلال

گوروب ریاسته هارون بو قصّه صدمه وورار

قضیّه منتشر اولسا بُلر اُناث و رجال

دوشر قلمروینه انقلاب سرتاپا

قیام ایده لّه محبّان شاه عرش جلال

اوزیندن ایسته دی بیر نوع رفع تهمت ایده

تمام شیعه لری بلکه ایلیه اغفال

خیال خامیله ترتیب ویردی بیر مجلس

خیاله سالمادی ویرمز نتیجه خام خیال

مان او مجلسه اشراف شهری دعوت ایدوب

یغشدی مجلسه یکسر اَکابِر و عُقّال

او بی حیا دیدی موسی بن جعفری گَتورون

چَتین اَله دوشه بیرده بو فرصت و بو مجال

گَلوب چخاتدیلا زنداندا آیَتُ اللهی

گوروبله شمس امامت ضعیف اولوب چو هلال

لباسلر چوریوب، گُل کیمی یوزی سارالوب

امامتین گونی تاپسون یاخوندی حال زوال

آچوبلا کنده و زنجیرینی منافقلر

امامه قاتلی فاخر لباس ایدوب ارسال

امام رختینی تزویریله ایدوبله عوض

گَتوردی مخزن علمی او محبسه جُهّال

خزان گُلی کیمی گُلدن لطیف اعضاسی

اَسَردی صاق صولا هردم دَگَنده باد شمال

مکان ویریلدی او مظلومه صدر مجلسده

امامه ایلدی هارون بی حیا اجلال

دولاندوروب یوزین اعیانِ شهره ایتدی خطاب

عم اوغلیدور منه بو سیّد حمیده خصال

ضعیف اولوب بدنی مختصر نقاهتی وار

عناصرینده حقیقتده ضعف وار فِی الحال

بو اُلسه شیعه لری متّهم ایده لّه منی

دوزَنمرم اگر اثبات اولا منه بو وَبال

باخون صحیح و سلامتدی یِتمیوب صدمه

یالوز اولسا اوزیندن ایدون دوباره سوال

دوروب اَیاقه اودم بیر حکیم نصرانی

سوال ایلدی ای آفتاب برج کمال

اوزون بویور بو دیَن لر صحیح دور یا نه؟

جواب ویرمدی خوفیدن او شه اَبدال

اَلین حکیمه نشان ویردی یعنی آندیردی

ویروبله زهر، اَلِف قامتیم اولوب چون دال

دیدی حکیم بو یاخشی بُلور اوز احوالین

ایدور اشاره سی مسموم اولماقین اِدلال

ویروبله زهر جفا سبز رنگ اولوبدی اَلی

بو زهریله اُله جاقدور، قالا جهاندا محال

داغیلدی مجلسین اهلی، قضیّه فاش اولدی

ویروب خلیفیه یوز انفعال و بد احوال

هامی گیدوبدی قالوب اوچ نفر، بیری هارون

بیری امام زمان، بیرده سِندِ کفر سِگال

نه ظلم اولوب آنا یا فاطمه گوزوندن ایراق

قصور ذلّت و جور و جفا تاپوب اِکمال

امامه سِندِ لعین آچدی ناسزا دلینی

او ماجرانی بیان ایتمه ای دلیم اول لال

بو قدر وار یوخاری قوزیوب شَل اولموش اَلین

او ظلمیله یتوب ارکان دینه اِضمِحلال (از هم پاشیدگی)

دوباره گَتدیله مظلوم امامی زندانه

شهادتی یازولوبدور کُتُبده بو مِنوال

رجب آیندا ایگیرمی بِشیمجی گون اُلدی

یتوردی باشه غم هجری تاپدی عین وصال

ولی نه حالیله زنجریره باغلی جان ویردی

نه چَکدی شامیده زین العبادیدن خبر آل

امام اُلماقینی بُلدی سویلدی هارون

ووروبدی پر باشیم اوستونده طائر اقبال

قویون جنازه سی قالسون شکاره گِتمه لیَم

بو غمده شیعه گوزی اولماسون نجه سیّال؟

قالوب جنازه سی جدّی حسین کیمی یرده

نه کفن و دفن ایدن اولدی، نه بیر نفر غَسّال

اگرچه یرده قالوب اوچ گون اوچ گئجه بدنی

ولی لباسلرین سویمیوبلا قوم ضَلال

نه نعشی گون قاباقندِیدی، نه یارالیدی

نه جسمی قوش کیمی آچموشدی تیریله پر و بال

حسین جنازه سی عریان قالوب قوری یرده

علاوه جسمینی آت دیرناقی ایدوب پامال

حسین مصیبتی یازسام سوزوم مفصّل اولور

یازوم قضیّه ی بابُ الحوائجی اِجمال

شکاریدن قِییدوب دین ایوین یخان هارون

امام دفنینه گوندردی دورت نفر حَمّال

گَتوردولر دیمورم تخته پاره یا تابوت

نه تخته پاره که بیر قیسّا نردبانه مثال

گوتوردولر ولی بی منتها حقارتیله

او وضع حال ایدر فکریمی مدام اشغال

جنازه نین قاباقنجا چَکَردیلر بیر جار

دیممی نه دللریله، ما عَلَی الغَریبِ یُقال

بلی، قلج یاراسیندان چَتیندی دل یاراسی

آناسی فاطمه ذی حقدی آغلاسا مه و سال

گوروب او حالی سلیمان پوزولدی احوالی

دیدی بو ذلّتیله کیمدی بو- ایدوبدی رِحال

اگر غریبیدی گَلموب سبب ندور غرباء؟

بو شهرین اهلیدی سالموبلار اوستینه نیه شال؟

گیدوب غلام لریندن بیری گَتوردی خبر

امام دور بو اُلن باغ مصطفایه نهال

همین که بُادی سلیمان کیمون جنازه سیدور

اَیاق یالین باش آچوخ ایتدی نعشین استقبال

آلوب جنازه نی چوخ عرّتیله قویدی یره

دیدی که ننگ دور اسلامیانه بو اعمال

امامه غسل ویروب پربها کفن ایلدی

او نازنین بدنه عطر قیلدی استعمال

ولیک عالم معناده گَلدی اوغلی رضا

ایدوب آتاسینا غسل و کفن او ماه جمال

امامه باخدی سلیمان دیدی غریب آقاوای

عذارینه جَرَیان ایتدی گوزدن اشک زلال

دیدی یانیندا دگول عترتی، غریبیدی بو

مباد نسگل اولا حُجّتُ اللهه بو کَلال(خسته شدن)

دیون حرملرینه گَلسون آغلاسون بو شهه

جنازه اوسته دوشَنسون تمام اهل و عیال

گَلوب عیال سلیمان امامه اوخشادیلار

بو یرده یادیوه بیر کربلا غریبینی سال

ایدن تاپولمادی مظلوم امامه غسل و کفن

حرام زاده لر ایتدی او پاک قانی حلال

دویونجا آغلاماقا عترتینی قویمادیلار

گَلنده قتلگهه دست بسته عترت و آل

نجه آچِیدی باشین عترت امام حسین؟

دولیدی دشمنیله سر به سر یَمین و شِمال

حسینی اولسا سنه بیرده کربلا قسمت

نه قدر عمرون اولا جدّیوه مجاور قال

سنه تاپولموری تبریزده رفیق شفیق

هامی عدوّیدی، باشلور سنیله جنگ و جِدال