گرگ لازمدی دوز عاشق ئوز عشقینده نثار اولسون

شبیه یوســف زهـــرا جهــاندا نـــامـدار اولسون


گرگ لازمدی دوز عاشق ئوز عشقینده نثار اولسون

شبیه یوســف زهـــرا جهــاندا نـــامـدار اولسون

کفایت ائتمه سون تنها  سر  و  جان  و  تنه   بلکه

تمــام   اهل   بـیتـیلن      منــایه    رهسپار    اولسون

مدال عشقینی ویرسون اورگده بیر مدال ائتسون

همیشه   عشـقینون     هجرانینه   گوز   اشکبار  اولسون

هله فرهادیله مجنون دگیل کامل  ئوز   عشقینده

گرگ   عاشــق  ئوز  عشقینده   ریاسیز  آشکار اولسون

بولار   افسانه دور   افسـانه  ،  منـصوریله   وامقده

هدف دوتسون گرگ عاشق حسین تک برقرار اولسون

چراغ شمعه گر باخسون  یانور  پروانه    هر  لحظه

بودور   تفسیری  ایستور  کی  آدی  بی لکّه دار اولسون

نجور خار اوسته بیر بلبل  گزور  تا عشقینی تاپسون

گئچور   جاننان   اودا   بلکه   روان   کوی  یار اولسون

ولی عاشق اودور چکسون ئوز عشقینده  وطننن اَل

دولانسون    چولَّری   لیکن   اسیر   روزگــار   اولسون

بویانـسون   یار  و  انصاری   قزل   قانه   ولـی   اوّل

ئوز   اوغلی  تشنه لب   منقذ   اَلیلن   تار ومار اولسون

یئتیسـشون   بونه   قارداشی    ابـالفـضـل   علمداره

اودا نهر اوسته قولسوز جان وئروب خدمتگذار اولسون

قوتــارسون   یاوری   قالسون   بلالی   دشتیده   تنها

صداقت   تاپباغا   عشقی   گمانی  شیره خوار اولسون

ریاست تاج وتختیندن چکوب اَل بیر چوخور  یئرده

قالوب  ، اوچ شعبه   بیر  اوخدا مدال افتخار اولسون

بو  دنیاده   گرک   یانسون   بیری   درد  و   محنلرده

بیری   اما   یئری   باغ  و چمن هم  لاله زار اولسون

خییَمده   نـالـه   و  آه  و   فغان    اسمایه    قـوزانسون

اوشاخلار  آغلاشوب، یانسین اورگلر بی قرار اولسون

وئریلسون   غــارته  فرمان  او  لحظه   کـوفه   اهلیننن

بیری   یاندیرماغا    گلسون   بیری   آثار زار اولسون

سمایه   شعله  قوزانسون   بیری  یانسون بیری   قاچسون

بیری   غشّ   ایلیوب   قالسون بیریسی دلفکار اولسون

اوجالسون گویلره ناله اوغول گل  هاردا   قالدون   پس

عموسین  سسله سین قلبی دولی پر اضطرار اولسون

اوجا بوی بیر  خانم  غمنن  آغارسین  ساچلاری   ، قدّی

بوگولسون، آهی قوزانسون اورگلر داغدار اولسون

بیری اوچ سینّیده رنگی سارالسون گول کیمی سولسون

باشندا   اَلَّری   قاچسون   بیابانه    فرار اولسون

سوسوز یورقون ولی پای  برهنه   چولَّره   قاچسون

اوزی   گولدور  ولی خاره پناه انزجار اولسون

بو حالی  خیزران   پست  و کافور  دنی   گورسون

او   طفلی  ویرماغا باهم سفیر وهم قطار اولسون

دئسئنلر یاچجی فرصتدور اورگده عقده میز واردور

علینون دشمن سرسختیوخ،دنیاده خوار اولسون

ازلدن رسمیدور آهو  قاچار   گر  گورسه   صیّادی

قویار یوز  بلکه صحرایه،شکاریننن حصار اولسون

ولی   بو   طـفل  مظـلومه  گورنده  غارت  و ناری

قاچوب   صحرایه   ساری تا بلایادن کنار السون

ولی بیلموردی غفلتدن ایکی ارزل  کمین   ائتمیش

دوتالّار  لیک  قویمازلار  اورگ امّیدوار اولسون

قاچوب آهو کیمین طفل سه ساله دوشدی طاقتدن

گوروبکی  گلدی  صیاد جفا پیشه ،شکار اولسون

اشاره   ائتـدی   کافور   سـتمـگر   خـیزرانه    باخ

ایکی  گوشواره سی باشدا قراسی یادگار اولسون

گرک تقسیم اولا گوشواره سی  سنده  بیری   منده

بولونسون معجری تا کی عدالت بر قرار اولسون

گلوبدور خیزران نطقه دئدی چوخ عالیدور فکرون

گرک بیر ایش گورم اما بو قیز درده دچار اولسون

علینون  اهل بیتیندن   واریمدور   قلبیده   عقده

گرک   خالی   ائدم   بلکه   محـنلر   بیشمار  اولسون

اَیا  ای  صاحب   دوران   اجازه   ایستورم   سندن

دیم  کردار  ظلموندن  کی   سندن   اعتذار اولسون

دئدی بیر سیلی ویرّام من یوزوندن ثانی تک الآن

طلا  و  قاره  معجرده    سنین ،  ایش  سازگار اوسون

آپاردی غارته کافور  ایکی گوشواره   بیر   معجر

گوروم   برزخ ده  هر لحظه  اسیر  درد   نار اولسون

ولی بو خیزران بیر ایش گوروب کی شیعلر قلبی

بو محنتده یانوب گوندوزلری چون لیل تار اولسون

هوادن   گـر   یئنه   سیلی   یتیمه   بیر   قیزا   نیلر

یئری    وار   شیعلر   قلبی   بو غمده داغدار اولسون

دینده سیلی زهرای  سه  ساله   هوشیدن   گئتدی

ییخیلدی  تپراقین اوسته کی غمنن جان نثار اولسون

یئری وار حضرت زهرا   گلوب   آغوشینه   آلسون

یوزونده   سیلی   ردّین   تا   گورنده   اشکبار اولسون

دئسون دور گوزلیور زینب بی بین الآن پریشاندی

گوزون  یولّاردا چوخ قویما،بو قدری انتظار اولسون

بو سیلی دن منه ثانی ویریبدور کوچه ده بیر گون

ییخیلمیشدیم یئره منده گوروم دنیانی خوار اولسون

اگر    بیر   عورته   سیلی   دیه   محـکم   مگـر   نیلر

ائله بیر ایش گورر یوز هم گووَرسین هم غبار اولسون

اویاندی  ناگهان   زهرایِ   ثانی   گوردی   زهرانی

یوزونده    گوز  یاشین  ائدی روان  تا کامکار اولسون

دئدی خوش گلموسن امّا،آنا یوخ قارداشیم سن تک

گله   بیر   دادیمـه   باری   بو  قلبیم   بردبار   اولسون

یئنه دیدی  سنه  سیلی   گئدوب   منزلده   اگلشدون

هارام   واردور   گئدم   آیا   آنا بی فتنه کار اولسون