دوشوبدی باشیمه شوق لقای یار باجی

آلوبدی وعده ی وصل اختیار الدن باجی


دوشوبدی باشیمه شوق لقای یار باجی

آلوبدی وعده ی وصل اختیار الدن باجی

دوام یوخدی بو دار فناده سابقدن

بیله مدارا ایلیوب جرخ کج مدار باجی

نه انبیایه ثبات اولدی دار دنیاده

نه اوصیایه بو دهر ایتدی اعتبار باجی

نه قالدی شیر خدایه نه قارداشیم حسنه

نه مصطفایه وفا ایتدی روزگار باجی

اجل سالوب باشیمه سایه یتدی آخره عمر

یتوب خزان تکنوب نوبت بهار باجی

گل ایمدی بر نجه کلمه وصیتیم واردور

ایشیت قبول ایله ای یار غمگسار باجی

ازل گونونده بلایه اوزوم بلی دمیشم

بلادن عاشق حق ایلمز فرار باجی

شهادت امرینه اوّلده ویرمیشم میثاق

که عشقه قتل قویوبلار ازل قرار باجی

گرک بو گون باشیمی شمره ایلیم تسلیم

دوروب بو یولدا نه مدّتدی انتظار باجی

اسیر اولماقه زنجیر عشقیله کمرون

کمال همّتیله باغلا استوار باجی

سِنان و شمره چو مندن صورا اسیر اولوسان

همیشه سن اوزیوه صبری قیل شعار باجی

مقام صبریده دور ویر گله قضایه رضا

سن اولما دایره ی صبریدن کنار باجی

گلور ظهوره تاپار عشق رتبه ی عالی

گیدنده شامه عیالیم شتر سوار باجی

اسیر روم حبش تک دیار شامه گیدر

چکه لّه دایره ی عشقه بیر قطار باجی

هرایکی نشاده قویماز ذلیل و خوار اولسون

«حقیر» نوکریمی لطف کردگار باجی