آغلاما ایتمه بو قدر شور و نوا آنام باجی

من کیمی هر قضایه ویر سنده رضا آنام باجی


آغلاما ایتمه بو قدر شور و نوا آنام باجی

من کیمی هر قضایه ویر سنده رضا آنام باجی

ای شرف و مقامیده خیرالنسایه نائبه

سنده گرک آنام کیمی صبر ایده سن مصائبه

صبر ایلین مصائبه یتدی بیوک مراتبه

مشقوی ویرمیوب مگر خیرالنسا آنام باجی

گوزله قوای قلبوی لشکر بیم آپارماسون

یعنی ثبات صبریوی درد عظیم آپارماسون

حلمیوی دشمن مبین خصم رجیم آپارماسون

زحمت و رنجون اولماسون تا که فنا آنام باجی

نه قالوب عون و اکبریم نه منه بیر معین وار

دورما اولوم آتین گتی ایله منی اوزون سوار

باجی سن آغلینده بو خوردا اوشاقلارا نه وار

گوزیاشوی گورن ایدر داد و بکا آنام باجی

ویرمم ایکی جهانی من بیر او نگاه شاهده

بو سوزون احتیاجی یوخ اوزگه گواه و شاهده

باخما علم یاتوب دیمه کسریدی جاه شاهده

عالی شکوه اولور باجیم دوتسا لوا آنام باجی

من دیمیرم که توکمیون گوزیاشی یاسه باتمیون

عمده وصیتیمی سیز لیک نظردن آتمیون

تا بدنیمده روح وار ناله سسین اوجاتمیون

طعن و شماتت  ایتمسون اهل جفا آنام باجی

اوندا که اهل دل تاپار آغلاماقون بهانه سین

گیزلدور اوزگه دن گینه ناله عاشقانه سین

سنده بو گلشن غمون بلبل خوش ترانه سین

قویما اوجالدا ناله ی وا ابتا آنام باجی

دیندیریرم بو یاندا من رأفتیله بالالاری

ساکت ایله اویاندا سن اوغلی اُلن آنالاری

باجی بو یاندا اکبرین قان ویروری یارالاری

لیلی او یاندا سسلنور وا ولدا آنام باجی

قلبیمی قیزلاریم باجی حسرت اودیله یاندیرور

بعضی کناردن گوزون حسرتیله دولاندیرور

بعضی سوسوزلیقون دییر بعضی ملالین آرتیرور

بعضی عمو عمو دییر بعضی بابا آنام باجی

بعضی گورور دچار اولور ایللریله فراقیمه

دامن وصلیمی دوتور بیر دوشنیر ایاقیمه

بعضی اوزون نشان ویرور بلکه آلام قوجاقیمه

بیرده بو سینیه گلوب کامین آلا آنام باجی

گرچه بو خوش باخیشلارین باخماقی رأفت آرترور

حسرتیله باخور یانان قلبیمه حسرت آرتیرور

لیک یوبانماقون داخی روحیمه زحمت آرتیرور

فرصتی فوت ایلمز اهل وفا آنام باجی

لشکرین المبارزی صبریمی الدن آلموری

رشته ی جانی تابیدن ناله ی کوس سالموری

سهلدور جمله سی بولار لیک او قدری قالموری

یوز قویا خیمه گاهیمه قوم دغا آنام باجی

هر قدر اهل بیتیمون قلبیده اضطرابی وار

غارته اهل کوفه نون مین او قدر شتابی وار

گور بو یتیمه قیزلارین قمچی زجره تابی وار

سیلی شمره یا دوزر خیردا بالا آنام باجی

اهل محبت ایلمز نازیله خواب ناز شب

توپراقا یوز قویوب ایدر کشف نیاز و راز شب

من بولورم که هر گئجه سن قیلاسان نماز شب

اوندا عزا دوتانلاری ایله دعا آنام باجی