یتشدی   قتلگه  عشقه  آل   پیغمبر
ظهوره گلدی اوصحراده شورش محشر


یتشدی   قتلگه  عشقه  آل   پیغمبر
ظهوره گلدی اوصحراده شورش محشر
سُراغ ایدروی آتا جسمینی  خانم  قیزلار
اوغول جنازه سنی آختاروب اوغونسورلار
تاپوب  عزیزینی  هر کس دیردی واویلا
اولوب   سرییه‌یِ   نالانه   هم‌صدا    لیلا
گزردی  زینب  نالان   اوقانلو  صحرانی
تاپوب حسینی اوج ایتدی عرشه  افغانی
گوروب او حالیله چون مهربان برادرینی
سالوبلاگون   قاباقندا   یارالی    پیکرینی
اولوبدی گون کیمی عریان لباسدن بدنی
اونانه غسل ویرن وارنه دفن و کفن ایدنی
یوزین اَیاقنه قویدی گیدوب اودم هوشه
گلنده هوشه گوروب خوندل گلورجوشه
جِگر آلشدی چخوب او دلی سینه سیندن آه
دونوب مدینیه عرض ایتدی یا رسول‌الله
اولان  بوقاننه   غلطان   سنون  حسینندور
اولوبدی  زینب  میدان  سنون  حسینندور
همین  بو سینه دی بسلردی سینه ده زهرا
اولوب  نشانه‌ی  پیکان  سنون  حسینندور
گهی لبوندن  او  پردون  گهی  بوغازیندان
گل اوپ کسوک بو غازیندان سنون حسینندور
ورو بلا سینه سینه دورتمین اوخ یاراسی هنوز
یارا  لاریندان   آخارقان   سنون  حسینندور
اوقدر  یاره  دگوب  جسمینه   بوگل   بدنی
اولوبدی  خاکیله  یکسان  سنون  حسینندور
یارالی جسمیده بیر گُل آچوبدی هر یاراسی
الوبدی  جسمی  گلستان  سنون  حسینندور
کسوبدی   اهرمن   انگشتر   اُسته  انگشتین
سریر   عشقه   سلیمان   سنون    حسینندور
حجازی   ترک   ایلین    کینه‌ی    مخالفلن
عراق   اهلینه   مهمان    سنون   حسینندور
گوزی   فراتده   حسرتله   العطش   گویان
ویرن سو اوسته سوسوزجان سنون حسینندور
کمال     شوقیله     بو     کربلا     مناسینده
اولان   شریعته    قربان   سنون   حسینندور
قوری  یراوسته  ویرن  پاره  پاره  گُل  بدنی
گویون ستاره‌لرین  سان  سنون  حسینندور
حقیریمون غمی  یوخ  عرصه‌گاه  محشرده
اوگونده   داور  دیوان   سنون   حسینندور
دیدوقجا شوره گلوب آرتدی دمبدم دردی
یوزین    بقیعه    مزار    بتوله    دوندردی
دیدی عجب خبرون و از غریب عیا لوندان
سورو شموسان نیه بس اهل بیت حالوندان
بقیعدن   گذرایت    سمت   کربلا   یه  آنا
سالوبدی  دور   فلک   زینبون   بلایه   آنا
دیار  کرب  و  بلاده  قیام   محشری  گور
اسیر   قوم   دغا    عترت    پیمبری   گور
ز  بس  عداوت   آل   امیه   ایتدی   بروز
سنون حسینوی اُلدوردولر بوچولده  سوسوز
دیمه که  شمر  ستم  پیشه  ظلمدن دویدی
گوزوم  باخا باخا  خنجر  بوغازینه  قویدی
سویوبلا  جسمینی  اگننده  پیرهن  یوخدی
هنوز یرده قالوب نعشی دفن ایدن یوخدی
همان حسین که تاپوب پرورش قوجاقینده
قالوب   نه   حالیله   گورگونلرین  قباقینده
سواولمادی  ولی  غسلی  ویریلدی   قانیله
دوباره   من   یووارام   چشم   خونفشانیله
سویولمو شام نه لباس و نه زیوریم واردور
ولی باشیمدا همین  کُهنه  معجزیم  واردور
اونی     داقویسالاگرایلرم    حسینه   کفن
ولی چتین  گورورم  من اَمان ویره دشمن
جفا  الیله  آنا  من  حسینی  ترک  ایدورم
یارالی پیکرین عریان قویوب دورب گیدورم
یارالی سینمی  شور  و  نوایه  تاپشورورام
یارالی  قارداشیمی   کربلایه   تاپشورورام
رقیه    سی    یاناجاق     آتش     فراقنده
علی‌اصغری     اما       یاتار      قوجاقنده
اَیاقی     آتدایاتار     اکبری     گیدرهوشه
اولاراونیله   حسینون   مزاری   ششگوشه
گورن     اوقبری     گلرداده    آه    وائیله
بولراویرده   یاتوب    بیر     آتا     بالائیله
آتابالا   غمینی   یاد    ایدراورک    داغلار
او پاک مدفنه  سورتر  یوزین  یانار  آغلار
ویرر  آتانی   اوغول   جاننه   قسم   زوار
نه   حاجتی   اولا   ایستر   آتابالادن   آلار
نولور بو  وفقه  آلهی  حقیره  قسمت  اولا
گیدنلره   قاریشوب   عازم   زیارت   اولا