قلب اوخشور پنجه، یعنی پنج تنلر قلبیده

پنج تن عشقی فقط واردی مطهر قلبیده

بو حسینون عشقیده اولماز یقین هر قلبیده


قلب اوخشور پنجه، یعنی پنج تنلر قلبیده

پنج تن عشقی فقط واردی مطهر قلبیده

بو حسینون عشقیده اولماز یقین هر قلبیده

ای حسینچی واردی عشقون، گئت بویان گوز یاشینه

گئت آنوون ئوپ الین همده دولان سن باشینه

یا اگر یوخدی بو دنیاده ؛ئولوبدی مادرون

گئت مزاری اوسته ، تا اینکی آزالسون غملرون

آغلا تا جاری اولونسون قبرینه اشگ ترون

دیلده سن عشق حسین ، وور بوسه قبرون داشینه

یا حسین سویله، دولان سن اول مزارون باشینه

ای حسینچی، فخر ائله چون پاک و اطهردی آنون

سن یوخیدون،  حضرت زهرانی سسلردی آنون

سن اوشاقیدون،  سنی بو یاسه گوندردی آنون

سویلدی اوغلوم : قرا گی باشووه قاره دولا

گئت ادبلن هیئته قولسوز آقام یارون اولا

 

بیر آنا کی اهل ایمان و حجاب و دین اولا

روضه لرده گلجگین زهرا آدی غمدن سولا

آغلیا مظلوم حسینه ،گئتمیه آیری یولا

ایلیر مکتب قوجاقین بیر بئله عالی روش

مرد مردانه ویرر والاه حسینچی پرورش

چوخ آنا چوخلی حسینچی ایلیبدی تربیت

بیر اوغولنان بیر آنا تاپدی ولی چوخ مرتبت

مافوق و عالی و بی همتادیلر از هرجهت

اوحسینچی خلق ائدن مادر اولوب ام البنین

اوغلونوندا آدی عباس اولدی ،مرد بی قرین

حضرت ام البنین کی عشقیده دریا اولوب

همسر ارزنده و شایسته مولا اولوب

اولا فخر ایلیور کی خادم زهرا اولوب

ناز ائدور بعدا بونا بیر معنوی احساسی وار

قهرمان بیر اوغلی یعنی با ادب عباسی وار

 

مرحبا ام ا لبنینه یار اولوبدی مکتبه

حیدر عشقینده دوشوبدی دائما سوز و تبه

عشق زهرائیله تعظیم ایلیبدی زینبه

مجتبانون واله اولمشدی گوزل گوز قاشینه

عاشقانه هی دولانیدی حسینون باشینه

مریم عمرانون عالمده اگر عیساسی وار

گر یوکابد فخر ائدور کی حضرت موساسی وار

با ادب ام  ا لبنینون قهرمان عباسی وار

قهرمان پروردی خاک مقدمین عالم ئوپر

اللریندن صف به صف یوکابد و مریم ئوپر

آل خبر هاردان یتیشدی بو مقام اعظمه

علتی وار چون دیدی عمرینده تک :یا فاطیمه

آغلادی زهرایه اولدی اوغلی شاه علقمه

دردمندا بو آنانون بیر معالیج اوغلی وار

دامنین محکم یاپش باب الحوائج اوغلی وار

 

آلاه آلاه هئچ آنانی غم حصاره سالماسون

گردش دنیا وقارین اللرینن آلماسون

هئچ آنانون گوزلری جان اوسته یولدا قالماسون

گوز قالا یولدا ئولنده چوخ چتیندی چوخ چتین

جان ورنده گور نه احواله قالب ام البنین ؟

کربلاده گرچی باتمشدی قانا اصلانلاری

انتظاریدی باشی اوسته گله اوغلانلاری

دورد اوغولدا انتظاریدی مه اجلاسینه

حسرتیدی هامیدان آرتق گوزل عباسینه

سسلنردی آی ابالفضل گل سینه ام شانشان اولوب

سن کی یوخسان آی یارالی منزیلیم ویران اولوب

ای منیم ایستگلی عباسیم امیدیم عزتیم

گل اوغول جان اوستیم سینه مده واردور محنتیم

آی اوجا قامت اوغول سنسیز بوکولدی قامیتم

ای منیم اوغلانارمدا هاموسنان گویچگی

گوزلری یولدا ئولور گل بیر ائلون آق بیرچگی

عرصه سینمده هردم درد و غم جولان ورور

بوش یرونده لشگر اندوه و محنت جان ورور

بخته باخ ام البنین آدلی اوغولسوز جان ورور

من ئولنده گلمسون کیم باشیم اوسته آغلیار ؟

ای گوزون اوخ باغلیان کیم گوزلریمی باغلیار؟

اولما سن  راضی بو دنیادن پریشان من گئدم

آهی آه اوستن چکم هم سینه سوزان من گئدم

ئوزگه لر چیگنینده قبره زار و نالان من گئدم

اولما سن راضی جماعت حالیمه گولسون باری

اولما سن راضی دئسونلر هاردادی اوغلانلاری؟