زهرا گیدوب الیمدن غمخواریم اُلدی یارب

درمان دالنجا گَزدیم بیماریم اُلدی یارب


زهرا گیدوب الیمدن غمخواریم اُلدی یارب

درمان دالنجا گَزدیم بیماریم اُلدی یارب

مندن بیری سوروشمور گُل تک ندن سارالدون

آیا سنه نه گَلدی اوچ دورت گونه قوجالدون

حکمت سنوندی ا... باشیم بلایه سالدون

سن ویرمیشیدون آخِر، سنده الیمدن آلدون

دشمنلریم سویوندی چون یاریم اُلدی یارب

بیر دردیدور بو هجران الده دواسی یوخدی

بو غملی روزگارین حُسن و صفاسی یوخدی

وار دورت بالام ایویمده عشرت اساسی یوخدی

ناز اورگنوبدی زینب افسوس آناسی یوخدی

دل داغلیام بو غمده دلداریم اُلدی یارب

غسلین ویرنده لوح آمالی پاره گوردوم

تردیده دوشدوم اوّل باخدوم دوباره گوردوم

پوشیده ساخلاموشدی من آشکاره گوردوم

ایکاش گورمییدیم جسمینده یاره گوردوم

ایوای آشنای اسراریم اُلدی یارب

اولموشدی بسکه زهرا طاها غمینده مضطر

روح الامین گَلردی دیدارینه مکرّر

دای فاطمه اُلندن گَلمور او پیک داور

گَلسه گورر قالوبدی منزلده خالی بستر

دردانه ی رسول مختاریم اُلدی یارب

با اینکه قونشولار چوخ ووردی اونا کنایه

همسایه لردن امّا هیچ ایتمدی گلایه

دوزدی به جای نفرین آچدی دلین دعایه

سکناسی بیت الاحزان اولدی بدون سایه

جاندان دویوب انیس اذکاریم اُلدی یارب

یارب نولوردی زهرا اوچ آیدا ساق قالِیدی

راحت دوروب حسینین قول بوینونا سالِیدی

محسن صود ایستینده آغوشینه آلِیدی

گهواریه یالِیدی بیر لای لای چالِیدی

گُل سولدی، باغبان گلزاریم اُلدی یارب

یاندی قاپوم او گونکه اود چخدی آسمانه

قولّاری مرتضانون باغلاندی ریسمانه

زهرا او حالدا ایتدی جانین سپر بو جانه

گُل پیکرین گویتدی آثار تازیانه

گُل سولدی پاسدار درباریم اُلدی یارب

سولدی گُلیم، باغمدا دورت نازلی بلبل آغلار

بلبللره بقیعده مدفون اولان گُل آغلار

گُل عاشقی گولنمز هر نه دیسن گول، آغلار

بو غصّه دن کلامی باشه سَپر کول آغلار

شیرن زبان و شیرین گفتاریم اُلدی یارب