عم اوغلی گیتمه کناره منیم کناریمدن

چوخ آز زمان قالوری عمر مُستعاریمدن


عم اوغلی گیتمه کناره منیم کناریمدن

چوخ آز زمان قالوری عمر مُستعاریمدن

منه یقیندی یتوب غملو گونلَریم باشه

سنه عیاندی سوزوم حالِ احتضاریمدن

بلالی باشیمی آل لطفیله دیزون اوسته

سرشک آلیمی سیل چشم اشکباریمدن

گوزوم یوزونده عم اوغلی باشیم دیزون اوسته

بو غملو وقتی اولوم شاد بو نظاریمدن

بو مدّتی که ئوزوم بستری مریضم من

سیزیلتیم عرشه چخوب بو دل فکاریمدن

دویوب حیاتیمدن، ئوز مرگیم گئجه گوندوز

اورکدن ایستَمیشم حیِّ کردگاریمدن

یتشموشم من او مقصوده آز قالور روحیم

کَسه علاقه سینی بو تن نَزاریمدن

عم اوغلی ایستورم آخِر نفسده عرض ایلیم

حضور پاکوه ایّام ناگواریمدن

چکنده مسجده ثانی سنی قولی باغلی

دیمه مضایقه ایتدیم ئوز انتصاریمدن

باشاردیقیم قدری ایلدیم کمک لیق او گون

سنون یولوندا من ال چَکدیم ئوز وقاریمدن

ئوز اختیاریمیله اَل گُتورمدیم سندن

ئوزون که مُطَّلِع اولدون مَآل کاریمدن

او قدر منه تازیانه ووردی قنفذ دون

عنان صبرْ منیم چخدی اختیاریمدن

عم اوغلی آیریلیق هنگامیدور داخی اُلورم

بو گون اَلیم اوزولور سندن، اهل داریمدن

عمل ایله او وصیّتلری که ایلمیشم

مباد اینجیه سَن رنج بی شماریمدن

گئجیله قیل منه غسل و کفن گئجه وقتی

مزاره قوی بابامی قورتار انتظاریمدن

منی گر ایستسه گوگلون مزاریم اوسته گَل

حسینه ده دی اَیاق چَکمَسون مزاریمدن

چمنده گورسَن اگر بیر گلی سولوب سارالوب

منیمده یادیمه سال بو سولان عذاریمدن

او داغ دلْ دگی، لاله آلوب اورک باشینا

او بیر نشانه دی بو قلب داغداریمدن

بنفشه بی سبب اولموبدی سر به دوش و غمین

اونا موثّر اولوب درد و اِنکِساریمدن

او اهل دل که گورَر قبریمی منیم گیزلین

اولار که حالی اولا درد آشکاریمدن

بیر عمر من سنه راحتلیقی حرام ایلدیم

صباح و شام چخان عرشه آه و زاریمدن

او حالیمین سَبَبین آلموسان خبر مندن

دیمه میشَم واریدی عُذریم اختباریمدن

چون ایستَمزدیم اولا خاطرون ملول و غمین

بولونمیَن مُحن و تیره روزگاریمدن

سیزیلدادوب منی چوخ آغلادان یقین بوله سَن

ویرنده غسلیمی بو صدر زخمداریمدن