او گونکه عهدینی سیندیردی قوم بی ایمان

ایدوبله بیعتی الده بهانه و عنوان

 


او گونکه عهدینی سیندیردی قوم بی ایمان

ایدوبله بیعتی الده بهانه و عنوان

نه شرم ایدوب نه قویوب احترام طاهایه

هجوم ایتدیله دولت سرای مولایه

گَلوب قاپی دالندا مظهر عفاف و حیا

که بلکه ایلیه لر شرم قوم بی پروا

ولیک ایتمدیلر باک منکرین جزا

ووروبلار ظلمیله اود، یاندی درگه مولا

نه ظلم لر اولونوب ایش هارا اولوب منجر

نجه دیوم که اولوب چیره شیره روبه لر

نه قلبلر او گون اهل سقیفه داغلادیلار

بو قدر وار که یدا... الینی باغلادیلار

بو نیّتیله که حق باطله ایده بیعت

چکردی مسجده جبراً‌ امامینی امّت

گوروب علینی کمکسیز شفیعه ی محشر

اولوب تمام وجودیله حامی حیدر

گَلوب مقام دفاع حق اوسته گفتاره

ایدوب خطاب او جمعیّت تبهکاره

ایا گروه جفاجو ندور بو جرات لر

بُلورسوز ایلیسوز آیا کیمه جسارت لر

بودور علی اسدا... قادر متعال

بابام وصیّتی قویمور ایده سیزیله جدال

اگر اجازه اولا ذوالفقار آلا الینه

کیمون جسارتی واردور گَله مقابلینه

گر ایتمیِیدی سفارش بابام بونی صبره

گیدردی قلبیده کی آرزولروز قبره

بودور امیر امین، اهل دین و ایمانه

بونون اطاعتی واجبدور هر مسلمانه

بونون الیله جهاندا ذلیل اولوب اصنام

بونون وجودینه مدیوندی عالم اسلام

بودور وصیّ بلافصل سیّد مرسل

بودور تمام خلایقدن اشرف و افضل

بودور امام به حق، حجّت ا..َ. مطلق

بونون الیله تاپوب دین احمدی رونق

بونا اطاعت ایدن خواب جهلیدن آییلور

بونون اطاعتی ا... اطاعتی ساییلور

بونا مخالف اولانلار هلاکت اوسته گیدور

بونا جسارت ایدن اللاها جسارت ایدور

جهان خلقته بو نیّر هدایتدی

علیدی بو، شرف و آبروی خلقتدی

غدیر خمدا دیموبدور مگر رسول انام

علیدی حق طرفیندن سیزه امیر و امام

بابام سفارشینی فکریدن نه تیز آتدوز

بو پست جیفه ی دنیایه دینوزی ساتدوز

علیدی نفس نفیس پیمبر اسلام

بو سرّی اَنفُسَنا لفظیدور ایدن اعلام

علی ایدوبدی وجودین وقایه طاهایه

گَلوبدی حق طرفیندن بو باره ده آیه

بونون ولایتی وار اهل کائناته تمام

بونی خلایقه ا... اوزی ایدوبدی امام

ولیّ امریدی بو جمله اهل ایمانه

بو امر منکری، منکردی حکم قرآنه

خانم گوروبدی که حق سوزلر ایتمدی تاثیر

اراده سینده جفا اهلی ویرمدی تغییر

دوتوب علی کمریندن او بانوی عصمت

ایله دایاندوروب اشرار ایدنمدی حرکت

گوروب او حالی گَلوب غیظه خصم شوم و دنی

اشاره ایلدی قنفذ آییرا فاطمه نی

نه ظلم ایدوبدی او ظالم او مفخر بشره

علیدن ال گوتوروب فاطمه یخلدی یره

قلم دایانموری گرچه حزین، اماندی دایان

او ظلم شرحینه وار هانسی بیر قلمده توان

او ظلم سالدی شرر قلب آل طاهایه

الهی لعنت ایله قاتلین زهرایه

اجازه ویر گَله یارب امام عصر و زمان

ایده او گون اولونان ظلمی عالمه اعلان