زهرانی تا که دفن ایلدی شاه لافتی

اگلشدی قبری اوسته بیر آز ایلدی نوا


زهرانی تا که دفن ایلدی شاه لافتی

اگلشدی قبری اوسته بیر آز ایلدی نوا

دار و ندارینی گئجه دفن ایلدی علی

گنج نهان عزّتینی قویدی توپراقا

ایستوردی یاریله اوزی بیر صحبت ایله سین

اصحابی قِیتروب او زمان میر مقتدا

اگلشدی باش طرفده بیر آز آغلادی اوزی

گویا اوشاق کیمی او شه آغلوردی بی صدا

قلبین بوشاتدی، دوردی ایاقه یواش یواش

یول باشلیوبدی منزلینه فخر اولیا

گر اولماسِیدی ایوده اوشاقلار گمانیمه

گَلزدی بیرده هیچ او ایوه میر ماسوا

هم روحاً اینجیوب، همی کوسموشدی شهریدن

مایل دگلدی فاطمه سیز، شهریده قالا

دنیایه اوچ طلاق ویرن نیلوری ایوی

زهراسی ایو نه لذّتی وار گر بهشت اولا

القصّه آیریلوبدی بقیعدن شه زمن

بیر نحویله خلاصه ایوه گَلدی مرتضی

اطفالی یاتماموشدی، گوزتلوردیلر یولون

بیر انجمن خصوصی قوروب دوتدولار عزا

تا صبح اولونجا هیچ بیریسی یومّادی گوزین

صبح اولدی، گون چخوب، ویریلوب عالمه صفا

ثانی یغوبدی باشینه بیر عدّه جیره خوار

گَلدی بقیعه تا گینه ده خلقی تولیا

پیغمبرین قیزی دیدی گیزلینجه دفن اولوب

نبش ایلیون، خلیفه نمازین گرک قیلا

گَلدی خبر که یاعلی بس هاردا قالموسان

آز قالدی قبر فاطمه نی بو دنی آچا

یتجاق بو سوز قولاقینه اول خسته دل شهون

چوخ هولیله ایاقه دوروب شاه اوصیا

گَلدی تموّجه شرف حیدریّتی

دریا کیمی تلاطم ایدوب بحر هَل اَتی

حالی دولاندی، یکسره قان دوتدی گوزلرین

گویا که قان ایچیردوب اونا ساقی بلا

بوینوندا عقده لندی عروق حمیّتی

ال ذوالفقاره آتدی شهنشاه قُل کَفی

باغلوبدی باشینه ساری دسمالی غیظیله

چوخ سرعتیله ایودن او لحظه دوشوب یولا

زینب دوروب ایاقه او دم باخدی آغلادی

یاندوردی مرتضانی، دله گَلدی گوئیا

سندنصورا داخی آنامون یوخدی بیر کسی

چک ذوالفقاریوی سنه قربان اولوم بابا

تک گیتمه، ویر اجازه که قارداشلاریم گَله

تک گورمه سون اقلّی سنی قوم اشقیا

چوخ سرعتیله چخدی غرض آستانه دن

یَپراق کیمی اسوردی غضبدن او مقتدا

یتدی بقیعه ثانی گریبانینی دوتوب

ووردی یره، بویوردی ایا معدن خطا

زهرا دگل، بو قبریده روحیم یاتوب منیم

باخما زمانه ده هله بِش گون دولانماقا

زهرا دیه دیه هاموزی دوغرارام بو گون

بیر نحویله که بحر کیمی موج ایده دِما

باخما او گونده کوچه ده ووردون دانشمادیم

امر رسولیدی که گرکدور مطاع اولا

غسلین ویرنده گوردوم اوزوم سیلینون یرین

بسدور، حیا ایله داخی ای پست و بی حیا

بیر نبش قبره یاعلی سن صبر ایدنمدون

کرب و بلایه بس نیه هیچ گَلمدون شها

بیر سینه ایکه اوندا اوغول داغی واریدی

آتلار ایاقلادی، داغیدوب مثل توتیا

سینه سناندا فاطمه سسلندی وای اوغول

جنّتده گَلدی نالیه ارواح انبیا