اولموشام مدّتدی قبروندن حسین دور آغلارام

ئولمه سم گلّم، اورکده وار بو منظور آغلارام


اولموشام مدّتدی قبروندن حسین دور آغلارام

ئولمه سم گلّم، اورکده وار بو منظور آغلارام

روحیمی غم منجنیقی ای خلیل حق سخار

صبر سرحدّین فراقونده گوزوم یاشی یخار

کربلا آدی گلنده هوش باشیمدن چخار

اشکیله اسمون قیلوب صورتده مسطور آغلارام

هر کس اولدی دهریده بیر مه لقانون عاشقی

منده اولدون بیر حسین بیر کربلانون عاشقی

رسمیدور عاشق اولار نی تک نوانون عاشقی

اولموشام سرپنجه ی عشقونده مقهور آغلارام

غصّه دن قانیله دولموش گوگلومون پیمانه سی

اولموشام عشقونده من بیر نحویله غم خانه سی

آدیمی سسلر حسینیلر حسین دیوانه سی

ایلیوب عشقون منی دیوانه مشهور آغلارام

من گدا، سن بیرجه شاهنشاه گردون بارگاه

گیزلین عشقیم وار سنه آگهسن ای سرّ اله

گر گدا شاهه اولا عاشق دگل شاها گناه

عشق جرم اولسا وارام جرمیمده معذور آغلارام

من گنه کاری آقا درک ایتمه میش پیک اجل

گوشه ی چشمیله بیر لطف ایله ای صبح ازل

یا منی ایسته گَلیم، یا جان ویرن وقتیمده گَل

گورسون عزرائیل الیمده واردی منشور آغلارام

گر منی ایتسه مخیّر کردگار ذوالمنن

کربلانی ایستوسن یا روضه ی رضوانی سن

ایسترم کرب و بلانی، نیلورم فردوسی من

قبریوه قالّام مجاور تا دم صور آغلارام

بیرده گورسیدیم تاپوب کام دلیم کامل حصول

دورموشام شاها رواقوندا، گوگل زار و ملول

دیده گریان، سینه سوزان، ایستورم اذن دخول

لذّت وصلوندن اولّام شاد و مسرور آغلارام

ایلورم بیر عمریدور شش گوشه قبرون آرزو

شوط ایدم قبرون، قیلام اشکیله گردین شست‌و‌شو

محشره بو خدمتیله اخذ ایدم بیر آبرو

اولماسام بو خدمته ای شاه مامور آغلارام

بیرده گورسیدیم اگر بالای سرده دورموشام

کاسه ی چشمی سرشک چشمیله دولدورموشام

اکبره پائین پاده بزم ماتم قورموشام

فاش ایدوب قویمام قالا بو عشق مستور آغلارام

رحم ایله بو بی پناهین دیده ی گریانینه

قویما ممزوح اولسون اشک حسرتی دل قانینه

گوگلوم ایستور قبریوی آند اولسون اکبر جانینه

یتمسم وصله گوزیمده واردی تا نور آغلارام

سن دگلدون سخت دل ای معدن رحم بشر

چوخ ووروبلار قلبیوه اوخ فرقه ی بی دادگر

قلبون اوخلار ایلوب آهن، گوز یاشیم ایتمور اثر

آغلارام قیلّام سنی تا رحمه مجبور آغلارام

نیلیوم یتمور الیم ای شهریار مُستظام

بوینی چیگنینده دوروب ویرّم اوزاقدان بیر سلام

السّلام ای جان ویرن کرب و بلاده تشنه کام

ایلرم قبرون مجسّم زار و رنجور آغلارام

السّلام ای حق یولوندا جاه و عزّتدن گیچن

السّلام ای سو یرینه لخته لخته قان ایچن

السّلام ای اوز الیله اوغلونا خلعت بیچن

وصل اکبردن ایدن لیلانی مهجور آغلارام

السّلام ای سو ویرن قانی بلا صحراسینه

السّلام ای آدی زینت هر بلا طغراسینه

السّلام ای غرق اولان کشتیسی قان دریاسینه

سالدی ساحلدن مخالفلر سنی دور آغلارام

السّلام ای ذات پاک کردگارین مظهری

السّلام ای لفظ ثاراللهین عالی مصدری

السّلام ای وتر موتورین مترجم مُضمری

قان ایدوب گوزیاشیمی بیر وتر موتور آغلارام

السّلام ای سو کنارینده لب عطشان جان ویرن

السّلام ای قوملار اوسته جسمی بی غسل و کفن

السّلام ای نیزه ده گون تک باشی شامه گیدن

یاد ایدوب احوالیوی ای نحری منحور آغلارام

السّلام ای مصرعی قانیله دریا تک دولان

السّلام ای غسلی قانی توپراقی کافور اولان

السّلام ای نعشی اوسته زینبی زلفین یولان

زینب آدی آرتیرور باشیمده مین شور آغلارام

مُلتجی دور بو «حسینی» یا حسین آگاهسن

بیر گدای رو سیه دور، سن سخی بیر شاهسن

ای قتیلُ العبره، اشک چشمه خاطر خواهسن

ایستورم سنلن اولام محشرده محشور آغلارام