حمد اولا حضرت سبحان حمیده
کی وئروبدور بشره روح سعیده
یارادوب احسن تقویمیده انسانی ازلده بو امیده
کی اولا واقف اسرار معانی
قویا باش سجدیه خلوتده نهانی


حمد اولا حضرت سبحان حمیده
کی وئروبدور بشره روح سعیده
یارادوب احسن تقویمیده انسانی ازلده بو امیده
کی اولا واقف اسرار معانی
قویا باش سجدیه خلوتده نهانی
تانیا ذات خدانی ، آیورا سیم و طلانی
بشر اولده گرگ اهل تفحص اولا
تا درک ائلیه علت خلقت ندی
آیا نه سببدندی کی افلاک مطبقده معظم کره لر
هر بیری ئوز سیر مدارینده منظم دولانور
دگمیه تا بیر بیرینه نظم عوالم
آیوران آدمی حیوانیدن البته تفکردی
گرک غرق اولا اندیشه ده انسان
هره اندازه امکان 
بیله علت ندی ایجاده گلوب پهنه گسترده کیهان
نیه خاطر یارانوب دشت و بیابان
نه دئیوب امته قرآن 
نجه گویدن توکولور قطره باران
هارادور مقصد انهار خروشان
آنالار فارغ اولاندان صورا نوزادلریندن
نجه جاری اولونور سینه ده پاکیزه لبن لر
ندور علت یل اسنده سوزولور صاق صولا
گیسوی پری لر کیمی صحراده چمن لر
ائله بیل تل دارانوبدی
کیمه خاطر یارانوبدی
اوجا داغلار کی سوکوبلر یری باش قوزیالار
مرد مجاهد کیمی فتح ایلیه لر قله افلاکی گوروبسوز
اتگینده اولارین اشک یتیمان کیمی انهار خروشان
کی او قدری چالیشوللار وورالار ساحله خاشاکی گوروبسوز
یا فقط رشته شیطانی هوروبسوز
نقدر مطلبی ئورتک 
نیه خاطردی بو گلمک
نیه حیوان کیمی انسان گئجه گوندوز چالیشور
حیله و تزویریله هم نوعیلریندن آلا سبقت
نه شرافت نه نجابت نه دیانت نه کرامت
داراشوب گرگ گرسنه کیمی رحم ایلمیور 
هر نیه چاتسا الی تاراج ایلیور
فکر شکمدی دئمه آذوقه سی کمدی
ئورگی سینه ده خشکیده آغاجدی
ئوزی توخدی گوزی آجدی
بشر اولسیدی اگر اهل تعمق نجه بیلمزدی
کی تحریف اولونوب شرع شریف نبوی 
امتی گمراه ائلیوبلر کی تسلط تاپلار
محور اندیشه لره تا اولا خنثی بو ستادی کی
وجودینده قویوبلار بشرین تا ئوزی درک ایلیه
هارداندی مسیری کی اونون خاتمه سی ختم اولونور 
مرکز نوره، اودی اولده اولوب حمله شعوره
لشکره اولماسا بیر مرکز فرماندهی البته کی 
سرگشته و حیران قالاجاق عرصه ده دشمن اولاجاق فاتح و غالب 
اونی تاراج ائلیللر گونه محتاج ائلیللر
بشرین مرکز فرماندهی سی عقل و تفکردی 
کی تسخیر اولوناندان صورا بیر لاشه بی روحیدی کی فاقد تشخیص و نظردی
سیزی الله بو بشردی 
نفسی خلقه ضرردی
نه تدبر نه تفکر نه توسل نه توکل
نه تانور راه حسینی
نه بیلور معنی دینی
دینیدن بیلدیگی تقلید ندانسته دی
گوز باغلی فقط سعی ائلیوب مرجعینون ئورگنه آدین
کی مسلمانلیقی تکمیل اولا
چون اولماسا تقلیدی اولار کافر مطلق
اوخوماز بینه آیاتی دیوبلر اونا چون 
سن هارا ؟ قرآن هارا ؟
قرآنی اون اوچ علمی اولان بلکه تجسس
ایلیندن صورا درک ایلیه معنای عمیقین
دئدیلر چونکی اگر بیلسه بشر مصحف قرآندا اونا یول چکیلوب
یکسره جنات برینه
دئدیلر سنده توان یوخدی 
تقلا ائلمه چاتماز الون دامن دینه
گوردیلر اولسا بشر واقف آیات ذوی الرحمت قرآن
اولاجاق تابع سلطان شهیدان
بیله جک روح خدا واردی بوتون لحم و رگینده
پس اگر بیلسه کی وار روح خدا لحم و رگینده
قورخی اولماز ئورگینده 
قورخوسی اولماسا بیدار ائلیر خلق عوامی
اونی قویماز آپارا لقمه ناپاک ایوینه حکم مرامی
یمسه نان حرامی
داغیدار نظم و نظامی
او قیزیل کیسه لرون عشقینه فتوای غلط امته صادر ائلینلر
دئدیلر بیلسه مسلمان کی گرگ منحصرا
ذات خداونده فقط سجده و تعظیم ائلیه 
نفسینی قانون پیمبر لره تسلیم ائلیه 
قدرت پوشالی حکام ستمکاره اگیلمز
نچه مین دگسه اگر سینه سینه زهرلی اوخ 
دردینی بیلمز گوزینون قانینی سیلمز
او سببدن دی کی امت آراسیندا بئله نشر ایله دیلر 
مصحف قرآن سیزه بیر راز معمادی کی
مین ائیلده تجسس ائلسوز حلینه عاجز قالا جاقسوز
سوروشان اولمادی آیا نیه درک ایلدی قرآنی 
او اعراب قدیم بدوی
اولدی یولوندا فدوی
ایندی کیچندن صورا اون دورت سده
آیا نجه درک ایلیه بیلمور
او جوانلار کی سوکوللر اتمی علمه مسلط یری تسخیر ائلیوب گویده کی سیاره لره
نقشه چکوب عالمی مبهوت ایلیوبلر 
ئوزوه فکر ائله انسان یوخودا یوخسا قالارسان
گونووی تار ائلیوبلر سنی ابزار ائلیوبلر 
دئدیلر میلون اگر ایستسه قرآن اوخیوب واقف جریان اولاسان
یا بیله سن کی نیه خاطر یارانوبسان 
گرک اول بیله سن سر حروفات روی
مخرج و ادغام و مع الغنه و اخفا و حروفی کی گرک حلقووه ملحق اولونوب سورتوله تا دوز چیخا
دوز چیخماسا دینونده خلل واردی 
اهانت ائلیوبسن عربین لفظینه
معنایه چاتوب لطمه سنگین 
اودی کی یا اوخوما یا اوخوسون مکتبه گئت
وقتووی قوی بلکه اون ائیل عمر گرانمایووی
مصروف ائلیندن صورا
بیر قاری ممتاز اولاسان
سن اوخیاندا هامی الله دئیه
سنده خیال ایلیه سن اهل جنان سان 
بودی میزان ؟ بودی فرمان ؟
بودی فرمایش قرآن ؟
کج اولوب راه مسلمان
گینه ال چکمه دیلر هر یولی سد ایلدیلر 
خوف و هراس ایلدیلر 
بلکه بیر عده گئده گیزلین اوخیا معنی قرآنی
مسلمان حقیقی اولا درک ایلیه کی 
ظلمی قبول ایلین انسان ئوزی ظالمدی
گرک باش وئره احیا ائلیه دین خدانی
اودی قرآنی مذهب ائلیوب زینتین آرتوردولا
اوراق بهاداریده تکثیر اولوبوب قیمتی اندازه نی چیخدی
بو همان ایشدی کی اسلامون ایوین دهریده یخدی
بونا خاطر دی کی قرآن بوکولوب بوقچالارا طاقچادا قالدی
بیری ساتدی بیری آلدی
بیری ئوپدی بیری زینت ائلیوب بوینونا سالدی 
فلکین باغری قرالدی 
آنامیزدان دوغولاندان اوخیوبلار رمضاندا
گئجه نی صبحه کیمین امت اسلامه دعای عربی
بیلمه میشوک هئچ ندی معناسی
بو الفاظ مغلظ کی بیزه واجب اولوب بیلمیک
اما اشیدندن صورا طوطی کیمی تکرار ائلیک
گر چه او قاری ئوزیده طوطی دیگردی 
کی بازیچه اولوب فاقد ادراک معانی سخندی
آییل ای شیعه آماندی
بو نجه طرز بیاندی
بو روش آند اولا زهرایه یالاندی
منه استاد ازل امر ائلیوب 
هر نه اشیتسم اونی رد ایلیم اول
صورا اثباته چاتاندان صورا تائید ائلیم 
روحیمی تسلیم ائلیم منطق علمه
نه کی هر سوز عربی اولسا تقبل ائلیم
اولمیا حقیم سوروشام ماخذ واثق ندی بو لفظه کی واجبدی اطاعت ائلیم تک بونا خاطر کی بو مطلب عربیدی
بو نه دبدی ؟ بو غلط شیویه آیا نه سببدی
منی عفو ایلسین الله
مگر اللهدا عربدی
خبره روباهلرین نقشه لری آلدی یرین
قبری مسلمانه مخوف ایلدیلر قورخا ئولومدن
کی اگر قورخماسا عصیان ائلیوب عالمی زندان ائلیر
ظالمه دوغرانسادا تائید ائلمز ظلم و فسادی
دئدیلر قبره گئدندن صورا جسمون
گله جک قبرووه مأموریلر اللرده جدل حربه سی 
بد هیبت و بد خلق و غضبناک و سراسیمه
لسان عربیلن سوروشاللار سنی کیمدور یارادان ؟
کیمدی پیام آور سبحان ؟
بیزه اظهار ائله بیر بیر اون ایکی حجت رحمانی مرتب
بیله بیلسون کی بیلوبسن
ولی اظهار ائلیه بیلمسون 
آزار ائلیلر
گونووی تار ائلیللر
دئمز آیا بو ئولن کی قویولوب قبره اونی سیلکه لیورسوز
در گوشی اونا تلقین اوخیورسوز
او زمانی کی قولاقی اشیدوردی
او زمانی کی هله درکی واریدی
تانیا بیلمیوب اللهینی ، پیغمبری
یا اون ایکی حجت کی امامان معیندی بیزه
حضرت حقدن نیه الان کی اشیتمور قولاقی
لاشه بی روحیدی
هی سیلکه لیورسوز 
عملا سهو ائلیورسوز
او محصلدی بو میت کی یاتوب بستر غفلتده کئچوب وقت مقرر
اوخیانلار اوخیوبلار 
توخیانلار توخیوبلار
یتیشوب موسم توزین ره آورد تلاشی
اونا بنذر کی سئوالات معارف یازیلوب برگه ده
هر کس یازا ئوز حاصل کنکاش و تلاشین 
او محصل کی سالوب زحمته جسمین 
گئجه لر صبحه کیمین سعی ائلیوب ئورگنه درسین
کی بو گون اولمیا شرمنده سرافراز اولا میدان عملده
بودا کی لهو و لعبده
گئجه سین صبح ائلیوب عیش و طربده
گینه ده حیله و مکریله بودور فکری مساوی اولا میدان عملده
الی بلده پولی الده
ویریلوب اجرت شایان
یایلور نغمه قرآن
سالینوب سفره احسان
اوخونور راز و نیازی
قیلینور ایوده نمازی
بودا قبری گل اکوب گل بیتیروللر
آدی تلقیندی تقلب یتیروللر..