بو مشکه دگن اوخ منی مایوس ایلدی چوخ

ای کاش دگِیدی گوزیمه مشکه دگن اوخ


بو مشکه دگن اوخ منی مایوس ایلدی چوخ

ای کاش دگِیدی گوزیمه مشکه دگن اوخ

بستِیدی حیاتیم بو سویا جاندان اوساندیم

سو مشکیمه اوخ دگدی اوزوم جانه دایاندیم

اصغر عطشه، من شرر خجلته یاندیم

ای کاش دگِیدی گوزیمه مشکه دگن اوخ

من جان به کفم، وقفیدی بو جان شه دینه

یوخ باکیم اُلومدن، ولی ای لشکر کینه

ویرمیشدی منه بو قوروموش مشکی سکینه

ای کاش دگِیدی گوزیمه مشکه دگن اوخ

گوردوم عطشیندن سارالوب صورت اصغر

پوزدی پوزولان حالتیمی حالت اصغر

آز یاره وورون بسدی منه خجلت اصغر

ای کاش دگِیدی گوزیمه مشکه دگن اوخ

چون اهل وفا کوی وفاده منی یوخلار

تصدیق ویروب احسن ایدر عشقیمه چوخلار

بیر گُلشن فردوس ایلیوب سینمی اوخلار

ای کاش دگِیدی گوزیمه مشکه دگن اوخ

اوخ جسمیمه مایلدی منیم، من اونا مایل

بو اوخ نیه بس گیتدی خطا، اولمادی حایل

مشک اوسته دگوب، زحمتیمی ایلدی زایل

ای کاش دگِیدی گوزیمه مشکه دگن اوخ

جان ویرماقا جانانه بو گون تا هوسیم وار

داد ایتسم حسینیم کیمی بیر دادرسیم وار

عجز ایلمرم دشمنیمه تا نفسیم وار

ای کاش دگِیدی گوزیمه مشکه دگن اوخ

لایق دگل هر چند بو جان بو باش حسینه

امّا منی ایتمیشدی آتام یولداش حسینه

من نوکرم، هرگز دگلم قارداش حسینه

ای کاش دگِیدی گوزیمه مشکه دگن اوخ

چوخ سعی و تلاش ایلدیم آخِر اوز ایشیمده

قیردیم نه قَدَر دشمنی بو بیر یوریشیمده

قول گیتدی، دیردیم آپاریم مشکی دیشیمده

ای کاش دگِیدی گوزیمه مشکه دگن اوخ

تا سو اَله گَلدی غم و دردیم آزالشدی

مین همّتیمون ضدّینه بیر تیر چالشدی

سو آخدی، گوزوم باخدی، اورک یاندی، آلشدی

ای کاش دگِیدی گوزیمه مشکه دگن اوخ

سو وعده سینه چون که دیمیشدیم گوزوم اوسته

تا سو واریدی من واریدیم اوز سوزوم اوسته

قالسِیدی سو قولسوز سورونَردیم یوزوم اوسته

ای کاش دگِیدی گوزیمه مشکه دگن اوخ

مین جانیم اولا ویرماقا بیر ذرّه یوخ اکراه

قول گیتدی، باشیم قالدی، بودور علّت دلخواه

لازمدی اولا باشدا نثارِ قدمِ شاه

ای کاش دگِیدی گوزیمه مشکه دگن اوخ

بُلّم یِتَرَم آخِرِ عمریمده مرامه

لطفیله گَلور شه اوزی دیدار غلامه

خوشدور بو باشی اوندا قویام پای امامه

ای کاش دگِیدی گوزیمه مشکه دگن اوخ

هر چند چوخالدوقجا یارا خجلت آزالماز

امّا آزالور اوخ چوخی مندن صورا قالماز

دشمنده قالان اوخ مگر آرامیمی آلماز

ای کاش دگِیدی گوزیمه مشکه دگن اوخ

چوخ سعی ایلدیم من بو سویون حفظینه مطلق

شاهد سوزیمه بو کَسیلن اَلدی، بو بیرق

مقصود دله اولمادیم افسوس موفّق

ای کاش دگِیدی گوزیمه مشکه دگن اوخ

شانی اوزیوی صدقیله بو درگهه سالدون

مقصود دلون حضرت عبّاسیدن آلدون

صد حیف بو حسرتده او سرور کیمی قالدون

ای کاش دگِیدی گوزیمه مشکه دگن اوخ