نه عجب وقتیده یتوردون اوزون منه شمس امامتیم قارداش

سیل گوزوم قانینی گوروم گل اوزون قالماسون گوزده حسرتیم قارداش


نه عجب وقتیده یتوردون اوزون منه شمس امامتیم قارداش

سیل گوزوم قانینی گوروم گل اوزون قالماسون گوزده حسرتیم قارداش

واردی بیر عمر اولموشام مشمول کرم و لطفیوه عنایتیوه

بیر غلامم اُلمده مدیونم متواضع اولان سیادتیوه

دوشمه سِیدیم ایاقدان بولوسن من گلردیم سنون زیارتیوه

ایش بیله دوشدی دوشموشم یارالی دورماقا یوخدی قدرتیم قارداش

سن باشیم اوسته سن بودور جدّون بیر سو جامی الینده دیده گلوب

وای اوغولوای دیه دیه آنامیز فاطمه قامتی خمیده گلوب

مجتباده گلوب ویره سنه سس آتامیز مرتضی علیده گلوب

پنج تن باشیمی اوجالدوبلار وار عجب اوج رفعتیم قارداش

چشم دل گوردی اوزگه منظره نی تا دم آلدیم سوسوز دوداقوندان

باشیم اوسته گلوب یارالی بابام باشیمی قوی یره قوجاقوندان

سرفراز ایت بو خاکسارون آتام محضرونده اُپوم ایاقوندان

تا گوره وار سنون یانوندا نه قدر ادب اوسته رعایتیم قارداش

سن منه ویرموسن ادب درسین من ادب عالمیندن آگاهم

سن سپهر ادبده بیر خورشید منده نور ادب آلان ماهم

سنه سیر سلوک یولداشیم هر شدایدده سنله همراهم

سن بولورسن اوزون که واردی منی نه قدر قابلیّتیم قارداش

دگی شایسته اهل مهر و ادب که ادبدن ادب رسومین آتا

اوز نهادینده کی حقیقتینی دوندروب صورت مجازه قاتا

الی قوینوندا گوزده گوزیاشی شه ایاق اوسته سرسپاه یاتا

عفو قیل من دورانمورام ایاقا دورماقا یوخدی طاقتیم قارداش

من سنون محضرونده دورماقیمی عزّت بیر جهانه ساتمازدیم

سیر ایدردیم همیشه گل یوزیوه سنی گوزدن بیر آن آتمازدیم

ای ادب روحی بی ادب دگولم اختیاریم اولِیدی یاتمازدیم

نیلیوم چاره سیز یاتیردوبدور منی سانسیز جراحتیم قارداش

آتامیز مرتضی ولیّ خدا بویوروبدور که مَن یَمُت یَرَنی

او گورر جان ویرن زماندا منی، گورَرَم من همان او جان ویرنی

گورورم چشم خونفشانیله آتامی من، گورور آتامدا منی

دیر احسن سنی باشیم اوسته گوره شاه ولایتیم قارداش

باخوری شور عشقه منده آتام شوریله باشدا بیر همایون شور

گلوری جوشه مهر و عاطفه سی توکوری گل جماله اشک سرور

گوروری هر بویوردوقون بیربیر جابجا ایتموشم بدون قصور

که اولوبدور غریق قارداشیما تا دم مرگ نصرتیم قارداش

ایتمیشم من یولوندا جانبازی بولموشم چون یولون وفا یولیدی

سن گیدن یولدا مرتضی یولیدی مرتضی راهی مصطفی یولیدی

مصطفی رهگشای رحمتدور یولودا ذات کبریا یولیدی

قانیمیله بو یولدا اویناماقیم اولدی رنگ سعادتیم قارداش

من کیمی زمره ی رعیّتده کیمدی اولسون بیله سعادتمند

خاکسار محبّت اولسون امام اونا ویرسون بیله مقام بلند

هاردا وار من کیمی غلام اولا عشق مولاسی گردنیمده کمند

منی چکدی مقام بالایه او کمند ولایتیم قارداش

چوخ فراز و نشیب دنیانی گورموشم سیر روزگاریمده

تاپموشام لیک چوخ بویوک عزّت صون نفس حال احتضاریمده

گورورم من ایکی امام دوروب گوزی یاشلی منیم کناریمده

مین لر ایل عمریله برابردور بو زمانیم بو ساعتیم قارداش

گرچخ آخِر نفسلریمدی منیم زخمدارم شکسته حالیم وار

دوشموشم خسته اللریم الدن اوزولوب یوزده اشک آلیم وار

ایکی دنیاده افتخار ایدرم که بو سینم دولی مدالیم وار

بولر اهل وفا مدال لریم اولی پاداش خدمتیم قارداش

شرح لفظ وفا و ایثاری یازموشام یوزده اشک آلیله

دوزموشم بو سینه مه بو قدر مدال اوزگه بیر عشق و ایده آلیله

قورولان دمده شور حشر گلّم اورا سینم دولی مدالیله

بوله لر خدمتیم قبول اولموش وار مدال لیاقتیم قارداش

من مه آل هاشمم سن گون منده هر نور وار سندندی

من نَیَم وار نَییم دیَم دانیشام منده وار هر نه وار سندندی

خلق آرا هر نه افتخاریم وار منده کی افتخار سندندی

عزّتوندندی عزّتیم قارداش دولتوندندی دولتیم قارداش

جان ویرنده اگرچه مُحتضره احتضارینده رنج و زحمتی وار

بیله جان ویرماقین منه امّا زحمتی یوخدی بلکه راحتی وار

دیزون اوسته باشیم، یوزونده گوزوم ویرورم جان کمال لذّتی وار

شوریله وای اوغول دیر آغلار منه شاه ولایتیم قارداش

حفظ مشک اوسته چوخ چالشدیم من اوخ یاغان حربگهده جان بر کف

مشکیم اوخلاندی قولّاریم گیتدی گوزوم اولدی خدنگ ظلمه هدف

هدف اوستونده پارچالاندی باشیم باشیمون قانی اولدی تاج شرف

بیر غلامِ شهِ شریفم وار باشدا تاج شرافتیم قارداش

یخلاندا یره عقاب اوستن دیمورم گلدی نه بلا باشیما

یاده دوشدی باشی یارالی آتام اوتوراندا منیم یارا باشیما

سسلدی جان اوغول ابوالفضلیم الینی قویدی مرتضی باشیما

زایل اولدی او ال قویولماقیله باشداکی زخم زحمتیم قارداش

منیم عالمده کاش مین جانیم اولا ای شاه عشق و جان جهان

مین بلالر سنون یولوندا گورم سنه مین یول اولام بلا گردان

یعنی مین دفعه لر اُلم دیریلم سنه مین دفعه لر اولام قربان

قالا دللرده تا دم محشر منیم ایثار صحبتیم قارداش

آتامیز باشیم اوسته دل داغلار شوریله سینه داغلاماق یریدور

گوزلرین اشکیله دولان دمیدور اشکی رخساره باغلاماق یریدور

گل ویراخ سس سسه ایداخ ناله آغلاشاخ باهم آغلاماخ یریدور

درده دولموش بو غملی سینمده بوشالا جام محنتیم قارداش

آقالیق ایلیوب آقالیقیله گوگلونی ریزه خواریوین آلدون

اوز وفاپرورون تاپوب قولسوز بوینونا رافتیله قول سالدون

دویمادیم سندن ال اوزوب گیدورم لیک سن دشمن ایچره تک قالدون

قویمارام تک سنی مماتیمدن گر منیم اولسا مهلتیم قارداش

سن منی سرقطار عشق ایلدون دوشموشم لنگه لیک پا به گِلم

سوسوز اطفالیوه سوسوز سقّا مشکینه قان دولان فسرده دلم

نعشیمی خیمیه آپارما منیم دست خالی گیدنمرم خجلم

قیزلارین من باخانمارام یوزینه حشره تک واردی خجلتیم قارداش

بولمور اطفال لشکر اعدا تیرباران ایدوبله صاق قولومی

یازماقا اوخلی مشک تاریخین ایلیوبلر قلم ایکی قولومی

واقفم خیمه ده قیامت وار گوزلوری تشنه قیزلارون یولومی

باشیم اوستونده کاش بولمیه لر وار منیم نه قیامتیم قارداش

«تائبین» چوخ شکسته دور اورگی دائماً قلبینه صفا ایستر

واردی داغلار بویی اورک دردی دلده کی دردینه دوا ایستر

بیر جوان اوغلی وار مریض اونا دامنیمدن دوتوب شِفا ایستر

ایسته اللهیدن شِفا ویرسون اونا خلّاق عزّتیم قارداش