دولانور علی قیزی مقتلی قان ایچنده بیر بدن آختارور

یولون اوسته قافله لنگ اولوب باجی قارداشا کفن آختارور


دولانور علی قیزی مقتلی قان ایچنده بیر بدن آختارور

یولون اوسته قافله لنگ اولوب باجی قارداشا کفن آختارور

الی باشدا دورت طرفه قاچور قییدور چوخور یره باش ورور

بو نه یردی دخت ابوتراب قدمین ترابه یواش ورور

یادینا او صحنه دوشوبدی که هامی بیر یارالیه داش ورور

پوزولوبدی گلشن آرزو گُلی بلبل چمن آختارور

دیور ا... عزّت هماسینون ندن آشیانه سی قالمیوب

قولی باغلی قوشلارینون ایوی تالانوبدی لانه سی قالمیوب

سویولوب وجودی حسینیمون باشی یوخ نشانه سی قالمیوب

گورورم هرایه آنام گلوب اودا قانلی پیرهن آختارور

یورولوب اوتوردی یره دیدی آلوب عطرون اودلانورام حسین

بو قدر که داش توکولوب بورا گئچه بولمورم یانورام حسین

بدنون نماسی پوزولسادا گینه من سنی تانورام حسین

منی سن چاغور یریوی باجون ایتیرور دوباره دن آختارور

حرکت زمانی غم اهلینه یارانوبدی غصّه لی منظره

اوزینی چمنده هر عندلیب یتوروبدی بیر گل پرپره

آنالار سرود وداع اوخور بیری قاسمه بیری اکبره

ایله بول رباب ایتوروب اوزون الی باشدا سودامن آختارور

اسرای خسته ی نینوا هامی دلده آه و نوا گیدور

آنادی باشندا قرا گیدور باجیدی اورکده یارا گیدور

دوزولوب نظامه کجاوه لر شهدا قالور اسرا گیدور

دولودی اورکلری دردیلن ولی خلوتْ انجمن آختارور

گیدوری سکینه یواش یواش یوزینون اوزین یووا علقمه

دیه شرح حالینی مو به مو سویانندا صاحب پرچمه

عمو جان دور اللریوه فدا کمک ایله غصّه لی عمّه مه

چاغیرور هرایه بیبیم سنی گوزی یولدادی گلن آختارور

اولوب اهل بیته زمانه تار حرمون سونوبدی چراغلاری

بالا قیزلار ایستوری ناقیه مینه لیک تیترور ایاقلاری

کیمه میهمان گیدور ای خدا گوزی یاشلی کوفه قوناقلاری

گوره سن مدینه هایاندادور گوزی زینبون وطن آختارور