ماه محرّم اولدی عالم سراسر آغلار

مظلوم اُلن حسینه جدّی پیمبر آغلار


ماه محرّم اولدی عالم سراسر آغلار

مظلوم اُلن حسینه جدّی پیمبر آغلار

گلزار دین اسلام اولدی خزان بو آیدا

آغلار اودور سراسر اسلامیان بو آیدا

آچسا شکوفه گولسه هر گلستان بو آیدا

دنیا بویونجا جور خاریله گل لر آغلار

بو آی خزان اولوبدور دشت بلاده بیر گل

آغلار گله باخاندا صحن چمنده بلبل

گل یوزلی اکبر اُلدی، نه گل داخی نه سنبل

شبنمدی اشک بلبل گلشن سراسر آغلار

بو آیدا یاسه باتدی افلاک و مهر و ماهی

دشت عراقی ایتدی منزل حجاز شاهی

جور مخالفیله گیتدی جلال و جاهی

تا وار جهان، بو آیدا گویده ملک لر آغلار

قاسم بویاندی قانه، عونیله جعفر اُلدی

آئینه ی پیمبر شهزاده اکبر اُلدی

لیلانی ایتدی مجنون اول ماه منظر اُلدی

وار ایمدیده گمانیم لیلانی مضطر آغلار

شیر خدایه وارث عبّاس سرو قامت

بو آی بلا چولینده گوستردی بیر شجاعت

گورمز اونون نظیرین بیر کیمسه تا قیامت

صد حیف الی کسیلدی، بو غمده حیدر آغلار

بیر قانلی پرچمیله بیر اوخلانان سو مشکی

بیر خدمت ایتدی دینه ادیانین اولدی رشکی

قانیله قاتدی سقّا آغلار گوزیله اشکی

امّ البنین اوغول وای جنّتده سسلر آغلار

بیر سودامر بو آیدا قالدی ز بسکه عطشان

پستان یرینه اَمدی ظلمیله نوک پیکان

عرض ایلسم سزادور آغلار گوریله هر آن

لایلای دیر بالایه بیچاره مادر آغلار

بیر عدّه دینه یاغی آدین قویان مسلمان

دشت بلاده ایتدی جور و جفاده طغیان

قرآن ناطق اوغلون اُلدوردولر لب عطشان

قرآنیان حسین وای دللرده ازبر آغلار

بو سهلدور که اعدا باغلوب ره فراتی

یاندوردی اهل کوفه خرگاه طاهراتی

قالدی یانار اود ایچره پیغمبرین بناتی

بو ظلمی یاد ایدنده زهرای اطهر آغلار

عصرین امامی گلموب تا آلمیوب بو قانی

بو محنت آغلادور قان سکّان آسمانی

بسدور دایان «حسینی» قورتار بو ماجرانی

خامه یانار سیزیلدار، یازدوقجا دفتر آغلار