دوتوب ماتم بو آی پیغمبر آغلار

دیر زهرا حسین وای حیدر آغلار


دوتوب ماتم بو آی پیغمبر آغلار

دیر زهرا حسین وای حیدر آغلار

باتوب یاسه بو آیدا کون و امکان

چخوب عرشه بو آیدا داد و افغان

اولون شیعه بو آیدا سیزده نالان

بـو ماتمده بتول اطهر آغلار

گرک شیعه بو غمده داده گلسون

ویروب سس زینبه امداده گلسون

دمادم آغلیوب فریاده گلسون

بو غمده یرلر آغلار گویلر آغلار

توکر صاحب زمان قانیاش عذاره

یتر غم دمبدم اول دلفگاره

گلر شوریله هر دم آه و زاره

مدام اوز جدّینه اول سرور آغلار

بو آی چوخ ظلم ایدوبدور قوم کافر

باتوبدور قانینه شهزاده اکبر

اولوب مجنون غم لیلای مضطر

دیر ایوای اوغول اول مضطر آغلار

بو آی زینب دوتوب دلدن شراره

اولوب قاسم وجودی پاره پاره

آناسی باغلیوبدور باشه قاره

او قاره گون توکر اشک تر آغلار

کسوب سو یولارین قوم بداختر

سولوب سوز عطشدن غنچه گل‌لر

ال اوسته اوخلانوبدور تشنه‌ اصغر

اوخ آغلار یاره آغلار اصغر آغلار

بو آی اولدی حسینین عالمی تار

بو آی جان ویردی عبّاس وفادار

سالوب قوللارینی سو اوسته اشرار

حسین وای قارداشیم وای سویلر آغلار

بو آی آغلار قالوبدور آل یاسین

باتوبدور قانه انصار شه دین

اولوب دشت بلا قانیلـه رنگین

ایدوبدور قان ترابی احمر آغلار

بو آی زینب گرفتار غم اولدی

پیمبر گلشنی بو آیدا سولدی

دیار کربلا قانیله دولدی

اوقاندان قانه دونموش دللر آغلار

بو آی قالدی شه لب تشنه یالقوز

یانوب دلدن او قارداشسیز اوغولسوز

وورولدی قلبینه بیر تیر دلدوز

او زخم تیره زخم خنجر آغلار

حسینی یخدی آتدان اهل کوفه

اولوب آماج گل جسمی سیوفه

دوشوب قان پرده سیندن گون کسوفه

سپهر دینه ماه انور آغلار

دیموب قاتل حسین بی یار و کسدی

قفادن باشینی لب تشنه کسدی

دوتولدی گون یوزی قاره یِل اسدی

بو حاله گویلر آغلار یرلر آغلار

دوشوب گل پیکری توپراقلار اوسته

گل آچمیشدی یارالار دسته دسته

گلوب بیر دسته بلبل دلشکسته

ایدوب اول گل وجودی منظر آغلار