واحسرتا غروبه یتوب نیّر هدی

دوشدی خفایه جلوه ی والشَّمسِ و الضُّحی


واحسرتا غروبه یتوب نیّر هدی

دوشدی خفایه جلوه ی والشَّمسِ و الضُّحی

یوز ویردی ظلمت عالم اسلامه سر به سر

دین اهلینه مصیبت آرا تار اولوب فضا

امّته که بی بصیرتیدی آزدی حق یولی

قالدی تمام دشت ضلالتده کَالعَمی

حال مرضده ایستدی بیر خط یازا نبی

تا خطّ حقّ و باطلی ایتسون او خط جدا

اول عقل کلّه نسبت هذیان ویروب عمر

قرآنه باخمادی که پیمبر دیمز هوا

قرآنی داندی، حقّی آتوب، دوتدی باطلی

مرتدّ ایدوب جماعتی دورت کیمسه دن سِوا

یرده قویوب پیمبر اکرم جنازه سین

بیر بزم شور و کفر و نفاق ایتدیلر بنا

نصب خلافت آیه سینه منکر اولدولار

اَتمَمتُ نِعمَتی اثرین ایتدیلر هبا

خُمّ غدیر قصّه سینه چکدیلر قلم

جعل ایتدیلر برعکس خبر محض افترا

بی فضل محضی افضله ترجیح ویردیلر

عالی مقامه نائل اولوب اَرذلُ الوَری

باغلوب پیمبرین قاپیسین آچدی ظلم الین

آل رسوله امّت بی حسّ و بی وفا

بیر درگهیکه قابض الارواح تک مَلَک

بی اذن داخل اولمادی آلدی اجازه تا

بیر عبد رِقّ تک مَلَک اذن ایستین قاپی

آیا روادی آتش ظلمیله اودلانا

یاندی او محترم قاپی بغض و عناده باخ

خطّابون اوغلیا ایتمدی بو ظلمه اکتفا

قویدی قاپی دالندا پیمبر عزیزه سین

اللهیدن او حقدن اوزاق ایتمدی حیا

پهلوی ناز حضرت زهرا شکست اولوب

سقط اولدی محسنی یخلوب بنت مصطفی

میر حرم گوروب یخلوب باش آچوق حرم

سرعتله سالدی فاطمه نون باشینه عبا

ایش بیر مقامه یتدی یداللهه ال تاپوب

باغلوب او شاه قولّارینا رشته ی جفا

جبراً چکردی مسجده امّت امامی تا

مامومه بیعت ایلیه سلطان مقتدا

دوردی ایاقه دوتدی علی دامنین بتول

قویمام دیدی که مسجده گیتسون شه ولا

گوردی عمر که فایق اولور خَلقه فاطمه

آز قالدی اوز عم اوغلوسینی ایلسون رها

امر ایلدی غلامه علیدن آییر بونی

قمچی آلوب شل اولموش اله قنفذ دغا

بیر ظلم ایدوب که فاطمه چکدی علیدن ال

امّا یخلدی قالدی او مظلومه غشّ آرا

تا حاله گلدی سویلدی فضّه هانی امام

اشرار آپاردیلار مگر، عرض ایلدی بَلی

بولدی چکوبله مسجده جبراً عم اوغلوسین

سرعتله گیتدی مسجده محبوبه ی خدا

تا یتدی گوردی شیر حقی ازدحامیله

روبه صفات باشی آچوق ساخلیوب به پا

الده قلج عمر دیوری بیعت ایت علی

ابن ابی قحافه نی بول سنده پیشوا

قبر رسوله یوز دوتوب ال آتدی معجره

سوز دلیله صیحه چکوب وا محمّدا

دیوارلر هرایه گیدوب قالخوب انقلاب

تا ایستدی شکایته گلسون او بینوا

ایتدی خطاب او حالیده سلمانه بوتراب

قویما که فاطمه باش آچا حقّه یوز دوتا

گر فاطمه باش آچسا یوزین دوتسا گوگلره

قطعاً بو قومه نازل اولور حقّیدن بلا

سلمان او دمده رحمتُ للعالمین قیزین

آرام ایدوب تمامه یتیشدی بو ماجرا

آل عبا قییتدی گینه دودمانینه

نه دودمان که اهلینه اولموشدی غم سرا

آغلاردی فاطمه گجه لر صبحه تک تمام

ایلردی آه و ناله ایله صبحینی مَسا

اهل مدینه گلدیلر آخِر شکایته

یا فاطمه بو قدر گجه گوندوز آغلاما

یا گوندوز آغلا شام زمانینده ساکت اول

بیز راحت اولموروق گجه وقتینده آغلیا

عرض ایلدی عم اوغلی علاجیم ندور منیم

قویمولّا اوز ایویمده بالاما دوتوم عزا

ویرسن اگر اجازه گیدوب چولده آغلارام

هم نالم اولسا بسدی حسینیله مجتبی

بیر نچّه گون بقیعیده صحرا نشین اولوب

بیر نخله سایه سینده ایدوب شامه تک نوا

هر گون گیدوب او یرده یوزه قانلی گوزیاشین

دُردانه تک توکردی دُرِ کنز اصطفی

آخشام اولاندا هر ایکی نور دو عینله

رجعت ایدردی منزله اشکی آخا آخا

بیر گون گیدوب گینه یتیشنده مقامینه

گوردی کسوبله نخله نی ظلمیله اشقیا

گونده او گون غروبه کیمی ایتدیلر فغان

تغییر حاله باعث اولوب شدّت هوا

یوزلر لطیف، گوزیاشی پرسوز، ایسّی گون

یاندی قزاردی اود تک او اوچ ماه حورلقا

تا منزله قییتدیلر آشفته حالیله

هر ایکّی نور دیده سینه باخدی مرتضی

گوردی او ایکّی غنچه ی نوخیز ایله سولوب

گل یوزلرینده گون اثری قویمیوب صفا

حتّی جناب زهره ی زهرا جمالینی

چوخ یاندیروب گون ایسّیسی مجروح اولوب لِذا

بولدی کسوبله نخله نی امّت عنادیله

چوخ درده گلدی خاطر سلطان اولیاء

ایتدی بنا بقیعیده بیت الحزن او شه

تا اوردا فاطمه ایده آسوده انزوا

مشغولیدی او یرده خانم آه و نالیه

نه آه و ناله، درده گلوب اهل نُه سما

آغلاردی هایهائیله هر لحظه متّصل

تیترردی ناله سیندن اونون عرش کبریا

بیر اهل دل تاپانمازیدی درد دل دیه

سویلردی داد امّت الیندن امان بابا

سنسیز جهاندا اوز وطنیمون غریبیم

بیگانه اولدی امّت، اولان یوخدی آشنا

اوخشاردی مهربان آتاسین آه و زاریله

بیر نچّه گون واریدی همان کنج غم فزا

بی رحم لر همان ایویده ایتدیلر خراب

بولمم نه بی مروّتیمیش قوم اِنَّما

تنگ اولدی عرصه فاطمیه چار سمتیدن

زندان محنت اولدی اونا صحنه ی ثَری

بیر سمتیدن عم اوغلوسی خانه نشینیدی

دوشموشدی چوخ فشاره او مصداق هَل اَتی

گیتمیشدی هم فدک یوخیدی مایه ی معاش

ضیق معاشه آل رسول اولدی مبتلا

آج آج اوروج دوتاردیلار افطار اولان زمان

اولموشدی سو تمامینه هم سو و هم غذا

بیر گون دیدی عم اوغلی جان اوچ گون تمام اولوب

اطفالون آج قالوبلا علاج ایت سنه فدا

بیر طور ایله که مالک اولام بلکه مُلکومه

گلسون اله دوباره او املاک پربها

آخِر اجازه صادر ایدوب شاه دیندن

گیتدی ایدوب خلیفیه بیر قدر التجا

سویلوب که گل بو خواهشی مندن قبول ایله

گیرم فدک سنونکیدی ایله منه عطا

ازبس یانوقلی دل دیدی آلدی قباله نی

امضا ایدوب خلیفه دینموب سوزینه لا

آلدی قباله نی اله شوقیله فاطمه

قصد ایتدی دودمانینی خرّم دوشوب یولا

سرعتله یول گیدردی که اثنای راهیده

ثانی ستمگری اونا توش ایلدی قضا

عرض ایتدی فاطمه هارا گیتمیشدون ایت بیان

صدّیقه صدق اوزیله بویوردی جواب اونا

گیتدیم خلیفه حقّیمی تصدیق و مُهر ایده

مُهر ایلدی خدای حقه ایلرم ثنا

سویلوب هانی قباله نی ویر منده بیر باخوم

اصرار ایدوب نه قَدَر او خانم ایلدی اِبا

من ویرمرم قباله می هرگز سنه دیدی

اینجیتمه چوخ منی، منه آز ظلم گور روا

آیا بس اولمادی قاپوما اود ووروب منیم

یاندیردون اولدی خواریله بیر محترم فنا

ایتدون شهید محسنیمی ظلمه دویمادون

قورخ عدل حقّیدن که ویرر ظالمه جزا

پیغمبرین قیزی ایدوب هر قدر احتجاج

اصلاً او سنگدل سوزینه ایتموب اعتنا

باخموب او ظالم عورتی وورمازلا شرعیده

هتک حجاب حرمت اناثه دگول سزا

زهرادن ال گوتورمدی قوزوب هوایه ال

بولمم ندن خطا الی بس ایتمدی خطا

بیر ظلم ایدوب که فاطمه نون گوشواره سی

دوشدی یره اوجالدی گوگه وامصیبتا

تا ال جفاسین ایتدی ایاق ظلمی باشلادی

دل جرات ایستر ایلیه بو مطلبی ادا

جبریله آلدی خیر نسادن قباله نی

گوردی او ظلم پیشه اله گلدی مدّعا

تُف سالدی خطّ خاتم ختمی رسالته

سالدی یره او حق سندی ایتدی زیرِ پا

زهرا او حالیله که یخلمیشدی خسته دل

رقّتلنوب یغیلدیلار اطرافینه نِسا

دولت سراسینه یتیروب مصطفی قیزین

بیر حالتیله که اونا مشکلدور ابتلا

باغلوب قاپوسین اگلشوب آغلاردی دمبدم

آچمازدی بیر قاپوسین اونون قوم و اقربا

اسدوقجا باد ظلم مخالف او گل صفت

سولدی سارالدی صورت اولوب رنگ کهربا

زر تک اَریتدی بوته ی محنت وجودینی

تشریح محض اولوب بدنیندن گیدوب قوا

ازبس چوخ اینجیدی او بلاکش زمانه ده

دویدی حیاتیدن ئولومون ایتدی اقتضا

عجّل وفاتی یارب اولوب وردی اتّصال

ایتمزدی معبدینه داخی اوزگه بیر دعا

ختم نماز ایدنده دیردی خداسینه

ختم ایله عمرومی منیم ای خالق علا

ای کاش اجل گلوب منی تیز راحت ایلیه

ترک فنای مطلق ایدوب درک ایدم بقا

دوشدی ایاقیدن اولوب آخِرده بستری

اولدی بلالی باشینه مانوس مُتَّکا

گیتدوقجا شدّت ایتدی مرض وقت اولوب اونا

ویرسون حکیم مطلق ئولوم شربتین دوا

بیر گون کمال یاسیله سویلوب عم اوغلی گل

آل باشیمی دیز اوستونه ای یار دلربا

چوخ آز قالور که حسرتیله سندن آیریلام

یتدی تمامه وصلیمز هجر ایلور ابتدا

ویردیم بو مدّتی سنه چوخ دردسر مدام

سندن واریمدی خجلت بی حدّ و انتها

عذر ایسترم قصوریمه عرضیم بودور سنه

عفو ایت منی حلال قیل ای معدن سخا

ئولسم گجیله غسلیمی ویر ایت گجه کفن

قبره یتور جنازه می بو قومیدن خِفا

تا بولمسون اولار که منه ظلم ایدوبدولر

تشییعه گلسه روحیمه زحمتدی منتها

ایتدی هامی وصیّتین اولدی او وقت تا

مرضیّه نفسینه یتیشوب اِرجِعی ندا

آیریلدی روحی غسل ویروب ایلدی کفن

اوز ایتدیقی وصیّتی تک اَتقَی الاَتقیا

گلدی آنا جنازه سینی ایلسون وداع

هم مجتبای خسته دل هم خامس کسا

نعشین قوجاقلیوب یوزه قانیاش توکردیلر

هر ایکّی پاره ی جگر ختم انبیا

عرض ایلدی حسین آچارام باشیمی اگر

اوز ساغلیقون کیمی منی دینیرمسن انا

بولمم بو سوز بتوله نه قدر ایلدی اثر

راوی امامدور دیر اللهه آند اولا

گوردوم سیزیلدادی کفنی ایچره فاطمه

گلدی تلاطمه قولونی آچدی برملا

چکدی ایکی یتیمینی آغوشه جان کیمی

عرشِ برینِ داوره اوج ایتدی آه و وا

سس گلدی یاعلی حسنینی آییر گیلن

آغلاتدیلار ملائکه نی بو ایکی بالا

گوزیاشلارین سیلوب هر ایکی نور عینینون

ایتدی جدا تسلّی ویروب مهربان آتا

قیلدی نماز نعشینی نقل ایتدی مدفنه

ایستوب که قبره تاپشورا سرخِیلِ اصفیا

ناگاه ظاهر اولدی ایکی ال مزاریدن

سس گلدی ویر امانتی ای فخر اوصیا

ویردی جنازه نی او ایکی اللره علی

معلوم اولان پیمبریمیش صاحب صدا

واردور یری دیِیدی پیمبر او حالیده

آیا امانتی بیله ساخلالّا یا اخا

من تاپشوران زماندا سنه سرو قدّینی

زلف معنبری واریدی باشدا مشک سا

آیا سبب ندور آغاروب زلفی سر به سر

علّت ندور کمان تک اولوب قامتی دوتا

پهلوی پاکینه یتیشوب صدمه بس ندن

قمچی ایدوبدی ساعد سیمینینی قَرا

باری تمامه دفن یتوب باشلانوب ستم

معیار ظلم و جور گینه تاپدی ارتقا

صبحون زمانی یغدی عمر خلقی باشینه

گلدی بقیعه فاطمه نون قبرینی آچا

امر ایلدی بو قبرلری نبش ایدون تمام

خیر النّسا جنازه سی تا قبریدن چخا

پیغمبرین عزیزه قیزی ایلیوب وفات

اولی بودور خلیفه نمازین گرک قیلا

یتدی خبر که یا علی نه دوتموسان قرار

زهرا مزارین آز قالور آچسونلا سیّدا

باغلوب امام باشینه بیر ساری دستمال

گیدی قدّ مقدّسینه بیر ساری قبا

تعجیلیله حمایل ایدوب ذوالفقارینی

موج ایتدی بحر غیظ شهنشاه لافتی

آنّیندا عقده لندی عروق حمیّتی

گوزلر قزاردی دوشدی یولا میر رهنما

یتجاق دوتوب یخوب یره خطّابون اوغلونی

اگلشدی سینه سینده ویروب غیظیله صَلا

اللهه آند اولا بولون ای قوم اگر بو گون

بیر داشینه بو قبرلرین بیر کس ال وورا

آلّام اله بو تیغی قِییتمز غلافینه

سیزلردن آخمیونجا یره سو کیمی دِما

واردور کیمون او جراتی زهرا مزارینی

نبش ایلیه وجودون اونون ایلرم فنا

توهین قبر فاطمیه راضی اولمادون

بیر باش گئتور مزاریدن ای کان اِرتضی

یاتما نجفده دور نظر ایله بقیع بیر

قوم وهابی گور یتیروب جراتی هارا

دورت اوغلیوین مزارین همان قبر اقدسین

ایستر پوزوب نظامینی معدوم ایده شها

قبر رسول عالمیان احترامینی

هتک ایتدیلر بو ظلمه اولورسان نجه رضا

نه زحمتیله قوزادون اسلام بیرقین

آز قالدی ظلم الیله یخلسون همان لوا

دین اهلی چوخ فشاره دوشوبدور ایشیقلی گون

اولموش نظرده لیله ی دیجور تک دُجا

باعث همین بو فتنه لره اهل جوریدور

تیشه وورولّا ریشه ی اسلامه دائما

قالموش امیدیمیز فقط اوغلون ولیّ حق

ایلوب ظهور محکمه ی عدلینی قورا

واضح دیولّه خلقه نه واجب نه مستحب

نه مکّه نه نماز نه روضه نه کربلا

گوندرسون حقّ او منتقمی الده ذوالفقار

تا داخلی و خارجیدن انتقام آلا

بو وقت مختصرده بو کلّی مصائبی

خوش نظم ایدوبسن ایتمه بیله فخر «ذهنیا»

سوز سنده یوخدی، سوز بو سوزی ایستینده دور

هو چکدی سن او هو چکنه سویله مرحبا