چوخ چکدی جفا عمروده دلبند پیمبر

ایستردی خدادن اُلومون با دل مضطر


چوخ چکدی جفا عمروده دلبند پیمبر

ایستردی خدادن اُلومون با دل مضطر

زهرانی قوتار دار جفانین ستمیندن

قدّیم خم اولوبدی آتامون بار غمیندن

هر گونده نماز اوسته او بانوی دل افگار

ایلردی بو طرزیله خانم دردینی اظهار

یارب سنی جدّیم داخی اُلدور منی قورتار

آخِرده مرض فاطمه نی بستره سالدی

مظلومه لیقین عالم آرا دللره سالدی

بستر خانما مونس اولوب گوگلینی آلدی

زهرا دیه سن بیر گلودی سولدی سارالدی

گل سولدی سارالدی غمی بلبللره قالدی

غمدن بالاسی زینبه چوخ حصّه یتیشدی

چون باشی بلالیدی اونا غصّه یتیشدی

گوردی اُلوم آثاری نمایاندی یوزونده

تاریک ایلیوب غم گیجه سینده گونوزونده

گوزیاشی ووروب زینبینون حلقه گوزونده

مقراض اجل رشته ی امّیدی قیراردی

بو حالیله زینب تلینه شانه ووراردی

ووردوقجا پریشان تلینه شانه ی حسرت

آغلاردی دیردی قیزیم اولدی بیله قسمت

یاخشی قولاق آس ایلیورم نچّه وصیّت

مندن صورا باشون دوشه جاق درد و بلایه

دیداریمیزین قالدی بیری کرب و بلایه

قارداشلاریوین غم گونی غمخواری سن اولدون

آغلار باجیوین مونس و دلداری سن اولدون

آز سنّیله ایتام پرستاری سن اولدون

زهرا عوضیندن اولارین گوگلین آلارسان

زهرانی سالوب یاده بو ایوده دولانارسان

من تک خُم محنتده غمیله بویانارسان

بو قارداشیوین باشینون اوسته سو قویارسان

سسلنسه آنا سن عوضیمدن اویانارسان

ای مادر غم آغلاسا قارداشیوی قویما

گر ایستسه آخسون یوزه گوزیاشیوی قویما

آغلاشدیلا بو سوزده ایکی بانوی عالم

اولموشدولا بیربیرلرینه مونس و همدم

میر نجفیله حسنین گلدیله باهم

اوغلانلارینین بوینونا سینمیش قولی سالدی

هر تک تکینون اُپدی یوزون گوگلونی آلدی

عرض ایتدی عم اوغلی اورگیم قان اولا قویما

اشکیله حسینین گوزی بیر آن دولا قویما

گل تک بالالاریم سارالوب یا سولا قویما

روحیمدی حسین آیریلورام روحیدن ایمدی

کشتی نجات ایچره اولان نوحیدن ایمدی

قویما آخا گوزیاشلاری سیمایه عم اوغلی

گیتسونله بویور روضه ی طاهایه عم اوغلی

ایتسونله دعا اوردا بو زهرایه عم اوغلی

گلچین اجل گلدی دی بلبللره گیتسون

دورسون بالالار روضه ی پیغمبره گیتسون

زهرا سوزی تاثیر ایلدی میر حجازه

گوندردی او شهزاده لری مجلس رازه

فرمایش ایدوبدی دل آچون راز و نیازه

خیر البشرین روضه سی چون دار شِفادی

اول قبّه نین آلتیندا برآورده دعادی

چوخ حسرتیله ال اله ویردی ایکی قارداش

عمّامه لری الده توکولّر یوزه قانیاش

تا روضه ی پیغمبره دین قاچدیلا بیر باش

غم ساغری دولموشدی یره دوشدی جالاندی

اول روضه ده بیردن بیره بو سس اوجالاندی

مقتلده اوکی ضبط اولونوبدی بودور عینی

سس گلدی یتیم اولدولا زهرا حسنینی

زینب آناسیز قالدی یتیم اولدی حسینی

کلثوم آناسی ترک ایلدی دار فنانی

یاندوردی بو سوز قلب شه کرب و بلانی

فوراً قییدوبلر ایوه با دیده ی گریان

اَسمانی گوروبلر دایانوب زار و پریشان

گلدی دله اوّلده حسین ایلدی عنوان

آخِر دی گوروم ایمدی آنام فاطمه هاردا

علّت ندی گوزیاشون آخور عارضه اسما

عرض ایتدی آنان غملرینی گوزدن آتوبدی

وصل عالمینون لذّتینی هجره ساتوبدی

سسلنمه اویاتما اونی آسوده یاتوبدی

پروانه ده هجر آتشینه من کیمی یانمور

چوخ سسلموشم من اویانا بلکه، اویانمور

بو سوزلریله ایلدی سدّ ره چاره

فرمایش ایدوب وورما یارا قلبیمه یاره

چک زحمتیمی سن آنامی سسله دوباره

قلبین غم اوخی سویله گلن دلدی حسینون

گیتمیشدی دعا ایلماقا گلدی حسینون

بیر سوز دیماقا تاپمادی اسما او حزینه

باشین اشاقا سالدی گلوب داد و انینه

ساکت دایانوب لیک غم آرتوردی حسینه

یوز دوتدی او دم قارداشینا شاه شهیدان

بو سوزلریله غملرینی ایلدی اعلان

غم آز قالوری صبر و قراری اوزه قارداش

بو غمده یانوب دوندی وجودیم کوزه قارداش

قول بوینوما سال قوی منیله یوز یوزه قارداش

سن اوخشا آنامی توکرم من یوزه قانیاش

بیر بزم عزا گل قوراخ ایمدی ایکی قارداش

هجرینده آنامون اورگیم قانیله دولدی

اولاد بتولین داخی پرگاری پوزولدی

کل آغلاشاق ایمدی بیزه قارداش اولان اولدی

بیز تک آناسیز خوش گونه حسرت قالا خوشدی

آخِر نجه گورّم که آنامون یری بوشدی

اولماز داخی بوندان صورا خوش گون بیزه قسمت

قلبیمدن اُلونجه چخا حاشا بو مصیبت

دیدارینه قویدی آنام آخِر بیزی حسرت

یاندوردی بو سوزلر حسنی ایلدی غمگین

گوزیاشی آخوب دامنینی ایلدی رنگین