یارانمییدی اگر نور حضرت زهرا

نه آی اولوردی نه گون، نه بو پرتو دنیا


یارانمییدی اگر نور حضرت زهرا

نه آی اولوردی نه گون، نه بو پرتو دنیا

کیمون جهاندا یتر شانی شان زهرایه

بونون تفوّقی وار هاجریله سارایه

غلامدور بونا عیسی، کنیزدور مریم

حبیبه دور بو خانم ذات حیّ یکتایه

او گونکه خالق عالم یاراتدی افلاکی

چکیلدی پرده ی ظلمت سپهر مینایه

ملک لر ایلدیلر استغاثه معبوده

یتوبله نور بتولیله فیض عظمایه

خدای خلق همان دمده نور زهرانی

ایدوبدی عرشینه قندیل وار پیرایه

منوّر ایلدی افلاکی فاطمه نوری

دیولدی اسمینه زهرا همین بو معنایه

بشر غلطدی دیماق، نور محضدور بو خانم

گلوب بشر کیمی ظاهرده دار دنیایه

آناسینا آنا بطنینده اولدی هم صحبت

اودور محدّثه صدق اولدی بو دل آرایه

تولّدینده زنان قریش گلمَدیلر

خدیجه نین اوجالوب آهی عرش اعلایه

یر اوسته ایتدی خواتین دار خلد نزول

اولوبلا قابله نور بتول عذرایه

بهشت حلّه سینه ایلیوبله پیچیده

دوشه مباد او جسم لطیف ایذایه

ایله لطیفیدی جسمی خیاطه دوشسیدی

سالوردی خطّ او گلدن لطیف اعضایه

ایا امام زمان داد ظلم ثانیدن

شهیده یولّادی زهرانی دار عقبایه

قاپی دالیندا قویوب یاندوراندا درگهینی

اوجاتدی ناله آنان فاطمه ثریّایه

بویوردی فضّیه گل ظلمیله بالام اُلدی

دایانما تیز خبر ایله علیّ اعلایه

چخوب علی یخلوب گوردی حضرت زهرا

گیدوب تحمّل و صبر و قراری یغمایه

عباسینی گوتوروب سالدی فاطمه اوسته

گوگل بو یرده دوشوب بیر ملال عظمایه

دوریدی کاش علی قبریدن الینده عبا

گلیدی کرب و بلا دشتینه تماشایه

سالیدی اوردا قیزی زینبین عبا باشینا

جمال عصمتی مستور اولیدی اعدایه

آناندی چونکه حسینی شفیعه ی محشر

غم ایتمه گیتسن اگر دست خالی عقبایه