آچدی چو شاه تشنه لبان قان دولان گوزین

یاددان چخاتدی زینبی گورجاق اوزی اوزین


آچدی چو شاه تشنه لبان قان دولان گوزین

یاددان چخاتدی زینبی گورجاق اوزی اوزین

سویلوب آنام باجی یتوب عمریم تمامه گیت

من که گیدنمرم، قییدوب سن خیامه گیت

صیّاد مرگ مندن اوتور یولدا تور قوروب

سالسون بودور خیالی حسینون او دامه گیت

گلدون گوزومی باغلیه سن جان ویرن زمان

بو زحمتی قویوب باجی زهرا آنامه گیت

من بو یولون مسافریم تیز گیدم گرک

سنده گوروب تدارکیوی شهر شامه گیت

مرهم پذیر چون دگور بو یاره لر باجی

یتمز نه قدری مرهم اولا التیامه گیت

هنگام درد دل دگی، یاندیرما قلبیمی

دشمنلریم باخور داخی گلمه کلامه گیت

گیت یغ باشیوا جمع ایله بی کس عیالیمی

بو باره ده سن ایلماقا اهتمامه گیت

دشمن من اُلّم ایمدی سویار اهل بیتیمی

آل هر نه واردی ویرماقا قوم لِئامه گیت

شامه چکر عیالیمی مندن صورا عدو

بیر کاروانی سالماقا نظم و نظامه گیت

بو گوزیاشون یارالاریما سوزش آرتیرور

چوخ آغلاما یارالیم آخِر، خیامه گیت

ایمدی گلور کسور باشیمی قاتلیم باجی

دورسان اولور که نقص یته احترامه گیت

قویماز سویار لباسیمی بو قوم کفر و کین

اگنیمده پیرهن قالا، باشدا عمامه گیت

مندن ال اوز گله، سنه من قارداش اولمارام

قارداش اوغول دیماقلیقا اوغلوم امامه گیت

قبر حسین شوقینی سال باشه «صافیا»

زینُ العبایه ذوقیله سن اعتلامه گیت