یالقوز یارالی سوسوز ای کوفیان اُلورم

رحم ایلیوم ویرورم لب تشنه جان اُلورم


یالقوز یارالی سوسوز ای کوفیان اُلورم

رحم ایلیوم ویرورم لب تشنه جان اُلورم

صد پاره دور بدنیم، نیزه قلج کفنیم

اود دوتدی منیم جسمیم امان اُلورم

منشی عشق یازوب عاشق بلایه منی

خوشنود ایدوبدی ازل لفظ بلایه منی

عشقیم چکوب گتوروب بو کربلایه منی

اوز عشقیمی ویرورم بو گون نشان اُلورم

عشق عالمینده باشی بو پیکری نیدیرم

بیر یولدی عشق یولی من باشیله گیدیرم

خنجرلر آتدا گهی ای قوم غشّ ایدیرم

گه العطش دیورم دلده فغان اُلورم

امضا آلوبدور ازل محبوبِ بی بدلیم

سالم قالا نه باشیم نه پیکریم نه اَلیم

من ویرمیشم هاموسین اثبات ایدر عملیم

اوز عهدیمه ویرورم خوش امتحان اُلورم

گون ایستی، من یارالی، هر چند اَلولانورام

امّا هر اوخ که دگور بیر دسته گُل سانورام

نه دل دوداق، نه اورک، اودلانموشام، یانورام

باشدان باشا دوتوب اود بو جسم و جان اُلورم

قان آغلاماقدان اولوب بو گون گوزوم یارالی

آنّیم، باشیم، بوغاریم، سینم، یوزوم یارالی

خنجر قلج سنیقی بستر، اوزوم یارالی

روپوش گون شفقی، بالش سِنان اُلورم

تاثیر گرچه دله تک تک جراحت ایدر

خرقِ سنان سَنان امّا کفایت ایدر

بو نحر اولان بوغازیم سینم حکایت ایدر

نه ظلم ایدوبدی منه رُمح سَنان اُلورم

دوندَرمیسوز دیمورم قانه بو گوز یاشیمی

ظلیمیله دوغرامیسوز اوغلیمی، قارداشیمی

شمشیر مالک دون منشقّ ایدوب باشیمی

باجیم گَلینجه ویرون باری اَمان اُلورم

من بیر نفر یارالی، گون ایستی، تشنه جگر

نه دادرس، نه کومک، جسمیم خدنگخ سپر

بی یالقوزی سوسوزی دوغرالّا بیله مگر

بو ایستی گون بو عطش، یوخ سایبان اُلورم

اوخدان آچوب گوروسوز پر قوش کیمی بدنیم

منضمّ اولوب جسمیده، تیریله پیرهنیم

من راضیم قالا بو کوینک اولا کفنیم

امّا سویولماقیما وار چوخ گمان اُلورم

قان پرده پرده دوتوب یوخ حاجتیم کفنه

بیرده کفن ایده جاق آتلار بو گُل بدنه

نیزه قلج سنقی تابوت اولوبدی منه

توپراق حنوطیم اولار، غسلیمدی قان، اُلورم

جسمیمده هانسی یرین ای قوم یوخ یاراسی

بو بی کسین گوروسوز وار کاری چوخ یاراسی

کاریدی هر یارادن اوچ شعبه اوخ یاراسی

بو تیر ایدوب باجیمون قدّین کمان اُلورم

باشدان باشا بدنیم اوخدور سِناندی منیم

سو تک بلا چولینده قانیم رواندی منیم

رحم ایلیون جگریم اود دوتدی یاندی منیم

احوالیمه گورورسوز یوخدور یانان اُلورم

اوغلوم اُلنده سوسوز مندن توان آپاروب

آرام و صبر دل و تاب و توان آپاروب

گَلمور داخی نفسیم از بس که قان آپاروب

تاراج طاقت ایدوب، قالموب توان اُلورم

ای کربلاده یاتان، قانیله شیبی خضیب

لطف ایت «حسینیه» تا اولسون او قبر نصیب

قبرونده دلده نوا، آغلار گوزیله کریب

اوردا بو سر سخنی ایتسون بیان اُلورم