زینبون پاک ادی حلال مشاکل دی بیزه

نظر لطفی اونون شکر اولا شامل دی بیزه


زینبون پاک ادی حلال مشاکل دی بیزه

نظر لطفی اونون شکر اولا شامل دی بیزه

وار یقینیم کی بو مجلس ده مقابل دی بیزه

گیمیشوک قاره سینی مجلس غم برپادی

زینبیه ائله عاشقلره عاشورادی

 

کیمدی زینب سوزی مصداق هدایتدی بیزه

زندگینامه سی دیباچه غیرتدی بیزه

خانمون مجلس یاسی ائله جنتدی بیزه

نقدر واردی توان تنده دئنن یا زینب

حضرت مهدی دئیوب سنده دئنن یا زینب

 

کیمدی زینب سوزی کسدی ستم ریشه سینی

سعی ائدوب قارداشینون نشر ائده اندیشه سینی

سیندیروب سنگ جفاگر چه ئورک شیشه سینی

او زمان باخمادیلار گوزدن اخان گوز یاشینا

ایندی اما دولانور قبرینون عالم باشینا

 

شهر شاماتی بو مجلسده گورن اولسا اگر

دئدیگیم نکته نی حتما اودا تائید ائلیر

دولت باطلی . دست حق ائدوب زیر و زبر

پوزولوبدور اموی زاده لرون دبدبه سی

تیتره دور ایندی ده شامی خانمون اودلی سسی

 

کیمدی زینب اسرا لشکرینه سر دسته

کیمدی زینب ئورگی جبر زماندان خسته

عاقبت شامه فلک گتدی اونی جان اوسته

غربا باغی وطن اولدی جلای وطنه

جان وئرنده بئله سویلردی شه بی کفنه

 

برج غمده دولانان کوکبه اخر گئجه دور

از قالور دینجله تاب و تبه اخر گئجه دور

هارداسان قارداش حسین . زینبه اخر گئجه دور

گوزلریم یولدا قالوب دادیمه یوخدور گلنیم

ای حصیره بوکولن یوخدی منیمده کفنیم

 

من سنون دامنی اللرده قالان زینبووم

کاخ ظلم و ستمه لرزه سالان زینبووم

قانلی پیراهنی دشمندن الان زینبووم

قامتین بار مصیبتلر اگن زینبووم

باشون اوسته باشینا قمچی دگن زینبووم

 

قیزلارون غملرینی جانیمه الدیم قارداش

کاش بیلردون نه یامان گونلره قالدیم قارداش

سن ئولندن صورا بیر گونده قوجالدیم قارداش

گئجه لر اغلامیشام من سنه اولدوزلاریلان

قمچی التیندا حسین وای دئمیشم قیزلاریلان

 

الله عالمدی ئوزی هر گئجه گوندوزلریمه

اوچ یاشیندا بالا شاهددی منیم سوزلریمه

ائل یاتاندان صورا گلموردی یوخی گوزلریمه

صبح اولونجا گئجه لر غصه چکوب غم یمیشم

بالا قیزلار یاتیشاندان صورا نوحه دیمیشم

 

اللی ائیل هر نه بلا گلدی منه یوخ دئمدیم

قمچی دگدی باشیما صبر ائلدیم اوخ دئمدیم

غملریمدن نه دئسم از دئمیشم چوخ دئمدیم

سالدی دیلدن منی اخرده حسین دیل یاراسی

قولدا قمچی یری وار باشدا دا محمل یاراسی

 

شامه گل اکبر و قاسمله منی یاد ایله

شهر غربتده ادامسیز باجووی شاد ایله

غم الیندن یورولان روحیمی ازاد ایله

باشیمون اوسته اوتور مست وصال ایله منی

خدمتیم ازدا اگر اولسا حلال ایله منی

 

رحمی گلمور فلکین گوزدن اخان گوز یاشیما

بش یاشیندان ائله سالدیم قره معجر باشیما

قلبیده واردی گلایه اوجا بوی قارداشیما

اینجیدور قوللاریمی ایندی ده قمچی اجیسی

تک ئولور شامیده غیرتلی ابوالفضل باجیسی

 

هارداسان قارداش ابوالفضل ئورگون داغلیاسان

باشیم اوسته اوتوروب باشه ووروب اغلیاسان

بیلورم یوخدی قولون گوزلریمی باغلیاسان

گوزومی باغلاماسوندا ئوزووی شامه یتیر

باشیمون اوسته رقیه بالامی فوری یتیر

 

او قیزیلا گئجه لر صبحه کیمی اغلامیشام

ماتمینده هامودان چوخ من ئورک داغلامیشام

جان وئرن لحظه سینمده گوزونی باغلامیشام

باشیمون اوسته اچوب باشینی اوخشار اغلار

گوزومی عمه سی قربانی رقیم باغلار