ایکی نوگل پیمبر سنه میهماندی حارث

آنامیز وطنده گوزلور رحم ایله اماندی حارث


ایکی نوگل پیمبر سنه میهماندی حارث

آنامیز وطنده گوزلور رحم ایله اماندی حارث

دلده سوز آهیمیز وار وورما نه گناهیمیز وار

آتامیز اُلوب یتیموخ حالیمیز عیاندی حارث

کافر اولسا میهمانه اوز ایوینده حرمت ایلر

هر شقی اولا غریبین حالینی رعایت ایلر

مسلم اوغلونا مسلمان شرعیده حمایت ایلر

گورموسن چو آب نیسان اشکیمیز رواندی حارث

نه سببدن اُلدورورسن ایکّی طفل بی گناهی

غافل اولموسان خدادن تیز دوتار یتیمون آهی

آلار انتقام سندن اوزی منتقم الهی

بیز بینوایه خونخواه حیّ لامکاندی حارث

گیچ بیزیم بو قتلیمیزدن سنی جدّیمیز پیمبر

غول کیمی بیزی آپار سات راضیوخ ایا ستمگر

سنکه بولمدون بوله لّر دُرّ قدرینی بولنلر

دُرّی که اونون بهاسی ایکی نقد جاندی حارث

بیزی اُلدورورسن اُلدور الده نه علاجیمیز وار

لیک آتاسیزوخ غریبوخ رحمه احتیاجیمیز وار

گوز تیکوب یولا وطنده بیرجه خوردا باجیمیز وار

اونا رحم ایله چو لاله باغری لخته قاندی حارث

چرخ کینه جو بیر ایلدی بیزی ایلمیشدی محبوس

دیدوخ ای صبا گیدوب دی آنا ایتمه آه و افسوس

حبسیدن خلاص اولوب بیز گینه گلّوخ اولما مایوس

صبر خانه سی او زار و غمکشین تالاندی حارث

یوخودا بابام دیردی نیه قلبیوی سخارسان

ایتمه غم اولار که حبس خانه دن چخارسان

بولمدیم آنام ایوین سن جور و ظلمیله یخارسان

یوز او حبس خانه دن بو ستمون یاماندی حارث

هر دقیقه بزم شورا قتلیمیزدن اوتری قورما

قورخوروخ اماندی ظالم یانیمیزدا باری دورما

ایمدیکه قتیل ایدورسن باخ خدایه سیلی وورما

چرخ اطلسه فغان و آهیمیز دایاندی حارث

ایلمزله رحم یوخسا سخیلاندا قوش بوداقه

هانسی میزبان جهاندا بیله ظلم ایدوب قوناقه

باری ویر بیزه اجازه بیر قویاخ دوداق دوداقه

داخی یوخدی فرصت آخِر موسم خزاندی حارث

ایمدیکه سن اُلدورورسن گل منی ازلده اُلدور

قارداشیم اوشاقدی قورخار مسلمه بو غنچه گلدور

اُلدوروب ایکی یتیمی ظلمیوی جهانه بولدور

گرچه ظلمون ازّلیندن عالمه عیاندی حارث

گوردولر یتوب شهادت وقتی آلدیلار اجازه

ایکی قطب قطب عالم دوردولار اودم نمازه

گوزی یاشلی یوز دوتوبلار سمت قبله گاه رازه

دیدیلر خدا گورورسن نجه دینی داندی حارث

اُلدورور بیزی بو ظالم منتقم اوزون گواه اول

بولوسن که بی پناهوخ باری سن بیزه پناه اول

بوندان آل بو انتقامی بیر یتیمه دادخواه اول

نه هرایه کیمسه یتدی نه اوزی اوساندی حارث

گور نجه بو بی مروّت سنی ایلدی فراموش

مسلمین چراغین ایستور ایلسون ستمله خاموش

الده ساخلیوب شهادت جامینی گرک ایداخ نوش

نه اوتاندی جدّیمیزدن نه بو حاله یاندی حارث

گوردولر اجل یتیشدی بیر دویونجا آغلاشوبلار

اُلدوروب آتوب فراته بیر قدر اوزاقلاشوبلار

سودا قول بویون اولابلار ایکیسی قوجاقلاشوبلار

دیمه بیر زمان او غفلت خوابیدن اویاندی حارث

«اعظمی» مجسّم ایله بو اسفلی حالی گوزده

قطره قطره اشک آلون دوزوله سیاه یوزده

بیرده مطلعی کرار ایت چونکه واردی جان بو سوزده

ایکی نوگل پیمبر سنه میهماندی حارث