سبک ها ::

::کربلا منتظرماست...

:: زینبم جان اوستیم... ( مرحوم حاج سلیم )

:: یه سوال دارم مگر ... ( مرحوم سید ذاکر )

 

 

معتمد ظلمینده طغیان ایتدی یا صاحب زمان

عدنیده زهرانی گریان ایتدی یا صاحب زمان


معتمد ظلمینده طغیان ایتدی یا صاحب زمان

عدنیده زهرانی گریان ایتدی یا صاحب زمان

بیر ستم ایتدی آتان حقّینده اول ظالم سیر

زهریله مسموم ایدوب آخِر او شاهی  تخم شر

یاندیروب یاخدی وجود نازنینین سربسر

خانه ی ایمانی ویران ایتدی یا صاحب زمان

طاقت و صبر و قرارین آلدی الدن ظلمیله

نور عین مصطفانی سالدی دلدن ظلمیله

آیری سالدی بلبلی گلشنده گلدن ظلمیله

دشمن گل خاری خندان ایتدی یا صاحب زمان

ایله یاندوردی آتان قلبین او زهر جانستان

گل کیمی سولدی سارالدی اول امام انس و جان

نطقیدن دوشدی دایاندی سیریدن شمس زمان

دین ایوین بو ظلم تالان ایتدی یا صاحب زمان

آرتیروب سوز عطش درد و ملال و محنتین

شدّت زهر آلدی الدن اختیار و طاقتین

سلب ایدوب جسم شریفیندن امامین قدرتین

تا سوسوزلوق باغرینی قان ایتدی یا صاحب زمان

ایلیوب احضار عقیدی اول امام خونجگر

ایستدی بیر جرعه سو شاهنشه جنّ و بشر

ایلدی حاضر غلامی کاسه ده بیر مختصر

ایچدی امّا دردی طغیان ایتدی یا صاحب زمان

یوز ویروبدور حجّتْ اللهه او دمده اختلال

غارض شمس هدایتده بروز ایتدی زوال

تاپشیروب اسرارینی بیربیر سنه باتدی هلال

جانینی اسلامه قربان ایتدی یا صاحب زمان

سن ادا ایتدون نمازین عزّت و اجلالیله

کفن و دفن اولدی آتان نعشی او گون اعزازیله

شهر سامرّا دولوب یکسر فغان و دادیله

شیعه نی بو غم پریشان ایتدی یا صاحب زمان

محضر جاناندا روح اقدسی تاپدی قرار

جان ویروب جانانه حسرتله شه والاتبار

بو مصیبت آلدی شاها لیک سندن اختیار

گوزده اشکون مثل باران ایتدی یا صاحب زمان

قورتولوب دفن امری یوز ویردی بیر اوزگه ماجرا

دودمان رحمته بیردن توکولدی اشقیا

قصد غارتله هجوم آور اولوبلار برملا

ظلمه باخ اول قوم نادان ایتدی یا صاحب زمان

آلدی غارت قصّه سی بو غملی گوگلومدن توان

یادیمه دوشدی بلا دشتینده قوم کوفیان

اونداکی جدّون حسین ظلمیله ویردی تشنه جان

فکر غارت حمله عدوان ایتدی یا صاحب زمان

گوردی سعداوغلی حسین قان ایچره اولدی غوطه ور

ویردی فرمان لشکر اولسون خیمه گاهه حمله ور

ظلم اودی آل رسوله دلدن اولدی شعله ور

هلهله اشرار دوران ایتدی یا صاحب زمان

بولمورم نه حاله قالدی اهل بیت مصطفی

ال آچاندا غارته غارتگران بیحیا

زینبه اولدی پناهنده حریم کبریا

کوفیان اطفالی ترسان ایتدی یا صاحب زمان

اود ووروب اشرار اودم یاندی جفائیله خیم

ایتدیلر غارت اثاث بیتینی قوم ظُلم

اضطرابه دوشدی عمّن زینب مریم شیم

ناله چون نی اول پریشان ایتدی یا صاحب زمان

یا ولیّ ا...، ‌شعاعین نطقینه ایله نظر

سائل دربار جدّوندور همیشه غم چکر

هانسی سائل سن کیمی شه درگهیندن بوش گیدر

لطفیوه امّید او نالان ایتدی یا صاحب زمان