یقینیمدور مسافرسن سیاقوندان علی قارداش

گلینجه ئولَّم آخر اشتیاقوندان علی قارداش


یقینیمدور مسافرسن سیاقوندان علی قارداش

گلینجه ئولَّم آخر اشتیاقوندان علی قارداش

 

گورورسن بستر تبده وجودوم بیله ناخوشدور

قویوب بو نوع گیتماقون منی اللّهه گور خوشدور

دوزه بوللّم مگر گورسم اطاقونده یرون بوشدور

نه تاب و تب امان درد فراقوندان علی قارداش

 

مسافر آغلاماز سن آغلوسان قارداش نه دور مطلب

گیدور سنله عموم عباس آنام باجیم بیبیم زینب

سپهر عمریمه سن ماهسن ظلمتدی گون چون شب

بئله بوللّم باتوب ماهیم محاقوندن علی قارداش

 

گُلین اَلدن ویرن بلبل گوزی یولدا گرک قالسون

روادور فرقتون دلدن منیم آرامیمی آلسون

گَرک غم بسترین جَدَّه م اطاقونده دِیَم سالسون

گَلینجه سن آلام عطرون اطاقوندان علی قارداش

 

یتر هر گون منه سنسیز اگر چه بیر غم تازه

ولی وار خواهشیم سندن اوزون آگاهسن رازه

رقیّه باجیمی عزّتله ساخلا ئورگنوب نازه

اونی یولدا یره قویما قوجاقوندان علی قارداش

 

منه ایسته دوزوم ویرسون بو غمده حضرت باری

ئوزونده نامه یاز سالما منی گوزدن سنی تاری

اگر ئولسم گَلونجه سن مزاریم اوسته گَل باری

دوشه بلکه گوگول(گویول) بو اشتیاقوندان علی قارداش

 

اجل درک ایلسه نیلوم نه سن یانیمده نه قاسم

منه ماتم دوتان اولماز وطنده خوار اولار یاسیم

ویرنده جان اولار ورد زبانیم ای گل یاسیم

گلیدون بیر اوپیدیم من دوداقوندان علی قارداش

 

باجی قارداشینه لازمدی ایتسون عشقینی ظاهر

قصوریم اولسا عفو ایله شکسته قلبیمه خاطر

دورا بولمم ایاق اوسته سالام قول بوینووا آخر

اجازه ویر ئوپوم باری ایاقوندان علی قارداش

 

نولور سنده پیامیله منیم احوالیمی بولسن

بویرده نیلرم من بو سفرده سن اگر ئولسن؟

علاوه باجی قارداشلیق چمنده سن ایله گُلسن

نه من،دویماز هامی بلبل بوداقوندان علی قارداش

 

مسافر آردیجا بو رسمدور گر چه سَپَلَّر سو

سزادور من ولی بو رهگذاره فرش ایدم گیسو

بِئله بولّلم سنی عالمده آخر گورماقیمدور بو

دوباره رجعتون اولماز سیاقوندان علی قارداش

 

شهید ایلر سنی دشمن اَلیم یتمز سنه بیرده

اولار خاک شفا قبرون ولی عالمده هر درده

مریضم تاپماسا صحّت صبادن ای دل افسرده

بیر آز گوندر منه تربت رواقوندان علی قارداش

 

مین ایل عمر ایلسه هر کیم بو عمرین قیمتین بولسه

گیدوب ناکام دنیادن مزارون گورمسه ئولسه

ئولونجه  « اعظمی» بیرده او قبره میهمان گَلسه

چوُورمه یوز سنی تاری قوناقوندان علی قارداش