سبک : ویرانه ده نازلی بالام...

 

شمشیری زهر آلود ائدن قاتل نه بیدیندور

آچ گوزلرون قربانیوم بابا منی دیندور

 


شمشیری زهر آلود ائدن قاتل نه بیدیندور

آچ گوزلرون قربانیوم بابا منی دیندور

 

محرابیده قانه باتان ای گلشنی تالان

قویما عراق ایچره قالام من بیکس و نالان

گلمیش سنون پابوسیوه بو زینب گریان

نالان اولان مهمانیوم بابا منی دیندور

 

پایانه یتدی اول گجه وقتی ایشیقلاندی

شمشیر ظلمیلن اودم باشون قلجلاندی

مسجدده سن منزلده من مومنلر اوتلاندی

مبهوت اولوب حیرانیوم بابا منی دیندور

 

آتدی جفا داشین فلک من خانه بر باده

قتل الامیرالمومنین سس سالدی دنیاده

شیون ایدوب باش آچماقا من اولدوم آماده

ایندی بلا گردانیوم بابا منی دیندور

 

گل راضی اولما زینبون چوخ دل دونیم اولسون

کلک قضا یازمیش اگر حسرت منیم اولسون

عباسیوه رحم ایت گیلن قویما یتیم اولسون

سن شمع من پروانووم بابا منی دیندور

 

چوخ ناروادور صورتون قانه خضاب اولسون

یوخدور وفا بو کوفه ده کوفه خراب اولسون

اولما رضا چوخ زینبون قلبی کباب اولسون

آواره سرگردانیوم بابا منی دیندور

 

قالدیم غریب و بی وطن من زار و دلخسته

آلدیم یارالی باشیوی بابا دیزیم اوسته

باشون یاراسین باغلارام آهسته آهسته

بادرد بیدرمانیوم بابا منی دیندور

 

اهل حرم دورونده دور آچ گوزلرون قربان

گل بوندان آرتیق زینبی قویما اولا گریان

بس کیمدن امداد ایستیوم من زار و سر گردان

لبریز اولان پیمانیوم بابا منی دیندور

 

آرام جانیم قالمادی من اولدوم آواره

شامه اسیر اولام یقین من زار و بیچاره

یاز نادری آغلار گوزوم قولسوز او سرداره

مشکل گشا قربانیوم بابا منی دیندور