شب وصال علی و فراق زینب اولوب

خُمِ غم علی المرتضی لبالب اولوب


شب وصال علی و فراق زینب اولوب

خُمِ غم علی المرتضی لبالب اولوب

یاتوبدی بستر بیماریده اوخیبر کن

گوزی طبیبیده دور حضرت امام حسن

طبیب معاینه تا ایلدی علی یاراسین

بویوردی زینبه ده حاضر ایلسین قاراسین

بو زخم کاریده هیچ بیر دوا یرین آلماز

آچوخ دئیم سوزیمی مرتضی ئولر قالماز

نه بی مرّوَتیمیش باشینی یاران جانی

سُموم زهریله مسموم اولوب باشون قانی

اگرچه کٌلِ جهانه قوی دایاقدی علی

و لیک بیر ایکی گون سیزلره قوناقدی علی

خلاصه لَیْل ی بیست و یکم اولوبدی عیان

نه بیست و یک که شب ناله و غم هجران

علی ده حالیدن حاله دونوردی حالاتی

گچوردی فاطمه نون وصلتیله ساعاتی

علی بویوردی بهشته عزیمت ایتملیم

بنا به رسم زمانه وصیت ایتملیم

اطاقی خلوت ایدون تا بالالاریم قالسون

رموز عشق خداوندی بیر به بیر آلسون

دوروب کنیز و خدم تا اطاقی خلوت ایده

گرکدی نوکر آقایه ادب رعایت ایده

قوشولدی جمعیته بیر جوان زار و غمین

شرف نشانه سی فرزند پاک ام البنین

دیوردی اوز اوزینه مرتضی غمی دیل ده

آنام کینیزیدی من نوکرم بو منزل ده

اطاقی ترک ایلیوب غیره آشنا قالدی

علی قالوبدی و بیرده او دورد بالا قالدی

 

آچوب دو چشم خمارین علی گوروب حسنی

صاقیندا چوخ نگراندی همان غریب ئولنی

صولوندا میر هدا عصمت حنین اوتوروب

ایاق طرفده ایکی خواهر حسین اوتوروب

که ناگهان یتیشوب سمعه ناله جانکاه

دیور که رحم ایله سن زینبه اوزون الله

علی بویوردی بو کیمدی بو نوعی دیل داغلار

فقط یتیم بالالار اوخشاما دیوب آغلار

بیوردی زینب کبرا به شور و پر احساس

یانور بو حالتوه آغلیور بالان عباس

بویوردی زینبه مولا چاغیر بالام گلسون

دیوم ئورک سوزومی قلبی لحظه دینجلسین

چاغوردی اول یل هیجانی قهرمان زینب

باشین اگوبدی گلنده او مه به رسم ادب

علی بویوردی یاخین گل سپهره عصمته آی

اگر چه محسن ئولوبدی ، خدا ویروب سنی پای

گوزوندن اشک تری سیل گیلن گوزون قربان

دیوم وصیتیمی وار زمان چوخ آغلارسان

الیوی ویر الیمه تا دیوم بالا سوزومی

حسینمون وطنین یعنی کربلا سوزومی

بیر الده دوتدی حسینین الین به شور و نوا

ویرنده ال اله آی اولدوزی اولوب غوغا

ابولفضله بویوروب گرچه پور حیدر سن

ولیک ایندیدن اوغلوم حسینه نوکرسن

اطاعت ایله گیلن امرینه مثال غلام

که منلن حسندن صورا حسیندی امام

همیشه رسم وفانی بالا رعایت ایله

حسینی قویما تک اوغلوم اونی حمایت ایله

باشوزدا چون بیلیسوز آیری ماجرا واردی

قاباقدا غصه جانسوز کربلا واردی

حسین بالالاری عطشان اولاندا چک زحمت

سو  ویر ایچه اولارا قوی منه بیله منت

دیدی بابا من حسین سیز قالامارام زنده

حسینه اولموشام هر لحظه ده پناهنده

تلمذ ایلمیشم مکتبینده هرآنی

محالیدور اونی تنها قویام بابام جانی

حسین حسین دیورم ذکریله دعا ایدرم

نماز عشقیده اول شاهه اقتدا ایدرم

حسیندی منبع فیض حضور رحمانی

بوراخمارام نقدر جان واریم بو دامانی

گدای کوی حسینم حسین حسین دیئرم

که بی نوای حسینم حسین حسین دیئرم

هزار اوخ دگه تندن حسین حسین دیئرم

قولوم کسیلسه بدندن حسین حسین دیئرم

هزار مرتبه اوخ دگسه گوزدن اوخ دیمرم

هزار مرتبه ئولسم بویولدا یوخ دیمرم

باشیمدا افسر اولا گر عمودیلن یاراسی

قاریشسا گوزده اگر اوخ دگنده آق قاراسی

بلا محیطینه غرق اولسا عمرمون گمیسی

قیچیم ایلیشسه رکابه گده یوزوم دریسی

یغیشسا باشیمه گر قاتلان بد افعال

شعاع شمس حیاتیم گئده اگر به زوال

محال امریدی من ال چکم بو مولادن

خجالت ایلمرم اوز آنامی زهرادن

آنام ویرنده صودون اورگدوب حسین آدینی

حسین آدیلا منه آندیروب صودین دادینی

جهانه فخر ایدرم قهرمان آقام واردی

بابا بویور کی حسین سیز منیم هارام واردی

بلالره بیلوسن کی منیم دوزوم واردی

و لیک عجز و تمنا ایلن سوزوم واردی

دئنن حسینوه عباسه دویماسون بابا

همیشه ساخلاسون هیچ لحظه قووماسون بابا