اون بیر  ماهِ   عَزا   کَرب  و  بَلا    صَحراسی

گرد  غَملَن  بورونوبدی  او  چؤلون   پهناسی


اون بیر  ماهِ   عَزا   کَرب  و  بَلا    صَحراسی

گرد  غَملَن  بورونوبدی  او  چؤلون   پهناسی

عشق موسی لرینون اولموش او چول سیناسی

گون   قباقینده    قالوبدی    شهدا   اعضاسی

وار   او  غملی  چولون  الله  نه  غم  عظماسی

ابن سعد  امر   ائلیوب  دفن  ائده لر  کُفّاری

کیم اولا دشمن حق  بیلمز او  ننگ  و  عاری

دفن   ائدوبلر  او  دنی لر   قیریلان   اَشراری

شهدا  جسمی  قالوب   دشت   بلاده  ؛  آری

قانیلن  قرمیزی دور  دشتِ  غمون  سیماسی

جسم  پاکِ  شُهَدا  قالدی  کفن سیز  عُریان

گون قَباقینده ، او  صَحراده ، حَرارت  سوزان

وئردی   دستور  عُمَر  سَعد   پَلید   و   نادان

اُسَرا   ناقَه لر   اوستونده   اولا    شامه  روان

هَله  وار  دشت  غمون  صحنة  محنت زاسی

تاپدی  عُریان  دَوَه لر خیمه  قباقینده مکان

گؤردی بو حالی او یؤرقون بالالار اِئتدی فغان

سِئل کیمی گؤزیاشی یوزلرده اِئدوبدور سَیَلان

اولدی بیر محشر او صحراده او ساعتده عیان

درد  و  غم حدّدن  آشدی یوخودور مقیاسی

غم  و دردین  نَنَه سی زینب ائدوبدور  یاری

میندیره   تا   دَوَه لر   اوستونه    یورقونلاری

قالدی  بیر  یرده   فقط  کرب و بلا   بیماری

ائتدی زینب او زمان  صورته  اشکین  جاری

دئدی   ای   بَنده لرون   خالق    بی همتاسی

بالامون   یوخ   بدنینده  گوروسن  حال  قیام

چَکیلوب  سلسله  زنجیره  امام   اوغلی  امام

غُل و  زَنجیره  نجَه  ایلیه جَک  تاب و  دَوام

رَحم اِئله خسته دی؛یورقوندی؛کمکسیزدی بالام

بالامی حفظ  اِئله  ای  رَحم  و  کَرَم دَریاسی

اَلغَرَض  میندی   هامی  ناقیَه  غیر  از   زینب

بیلمیرم  من نه  قدَر حسّ ائلدی رنج و تعب

اولدی آیدین گونوز اوندا خانما همچون شب

باخدی اطرافینه  بیر  لحظه  او  صدّیقه  لقب

فکریمه   یادینه   سالدی  او   زمان   عبّاسی

گؤردی بو حالی خانم سَسلدی ای وای قارداش

هارداسان؛ایندی کناریمده اولایدون ای کاش

دئدی بو سؤززلری میندی دَوَه نون اوسته یواش

آغلیا   آغلیا  گوزلردن  آخیر   قانیله    یاش

کاروان باشلادی یول طیّ  اولا  غم صحراسی

بیرنچه لحظه گئچوب لحظه لر اولدی سپری

دوشدی  تا  قافله نون  قتلگه  ایچره  گُذَری

شُهَدانون   بدنِ   پاکی   اِئدوب   جلوَه گری

باجی قارداشی گوروبدی آنا  گؤردی  پسری

قؤزانوبدی    اُسَرا     شیون   و    وا   ویلاسی

ناقه دن  فوج   اسیران   اوزونی  آتدی  یِئره

توش  اولوب  قلب لری  سوز  غمیلن   شَرَره

وئردیلر فرصت ئوزه  جاری اولان  اشک تَرَه

اکبرین جسمی چاتوب لیلی کیمین نوحه گره

دئدی  ای  گُلشَنیمون   سَروِ   چَمَن   آراسی

نیه گُل جسمون علی سؤلدی  سَپیلدی چمنه

صدمه  یتدی  او   گؤزَل   قامته   زیبا   بدنه

نه قَدَر غم یازوب آخر  بو  فلک  سؤیله  منه

سن سیز اکبر  نجه  لیلا  گئده جکدور  وطنه

بیچدی  خوشبو  گلومی  موج  بلانون   داسی

بیر  طرفدنده   سریّه   ائلیور   شور  و   فغان

دیور   ای  گل  بدنین  آتلار  ایاقی  داغیدان

تازه دامادیم اَلونده  نه  گوزل  واردی  نشان

قان حنا زینتون اولموش سنون ای تازه جوان

دور عروسونده  گلوب ساخلیا سنچون یاسی

من    دیَردیم   سنی   داماد   ائلیَنده    بَزَرَم

زلفووَه  شانه  ویروب آلنووا  تِئل تِئل  دوزَرَم

نَه  بیلَردیم   بالا  سندن  بئله  تِئز  اَل  اوزَرَم

گوزون آچ باخ منه گور چوللری  الآن گزَرَم

گل   اُمّیدیمی   قیردی   بو   اجل    یغماسی

ولی زینب چاتوب اول لحظه ده  عُریان بدنه

بنزیور جسمی گؤروبدورکه پؤزولموش چمنه

ویردی بیر یول باشینا باشلادی  شرح  سخنه

دئدی: قارداش نه گلوب گِئیدیگون اول پیرهنه

کوفه و شامون  عجب  پست دور ارذل ناسی

دوزدی من صابرِ  دردم ؛ غم  و  دَرده دؤزَنَم

زینبم   شیر  حقون  من   قیزیام  ؛  شیر  زنم

ولی   فکر   ایلورم   الآن   غم   الیندن   اُلَنم

گورمیَیدیم بو گونی کاش منی دوغمیدی نَنَم

باجیوون یوخ بو حالی گؤرمَگَه  هِئچ  یاراسی

آغلیوردی او خانم گوردی گزَر  دشتی رباب

واردی بیر زمزمه سی دلده  ائدَر قلبی کباب

دیَر الله  ائدَرَم   من  نجه   بو   محنته    تاب

غنچه وقتینده گلوم سؤلدی نه گُل وار نه گُلاب

نیلرَم   من  بو  گونون  اؤلسـا   اگر  فرداسی

اصغریم گلسه  اگر  بیر  گئجه  سینمده  قالا

قویمارام من  او گوزل  رنگی  دوباره  ساراالا

سالارام من اونی گه ساق دوشومه گاهی سولا

دیَرَم  سود  یِه  علی  ایستَمه  مندن  سو  بالا

منیده   راحت   ائله    وار   سینمون   آماسی

اصغرین  آدینه  عاشقسن  اگر  ((جعفری   ))  سن

دردوُوی  صدقیله  هیئتده  اونا  سن  دئگیلَن

گیزلین حاجت لروه چاره ائدَر فاش  و  عَلَن

چوخ گوزل باب الحوائجدی او خوردا سوداَمَن

چاره    اِیلَر    غموه    اِیلَمَه    غم   احساسی