رمضان گر چیخا بیلسیدی بشر صورتینه

آپارار دوز پی علینون سبب خلقتینه

صانعون باشدا کی اندیشه پر قیمتینه

رمضان آیی دونوب اولسا بشر جالب اولار

گورجک سوز کی علی ابن ابیطالب اولا


رمضان گر چیخا بیلسیدی بشر صورتینه

آپارار دوز پی علینون سبب خلقتینه

صانعون باشدا کی اندیشه پر قیمتینه

رمضان آیی دونوب اولسا بشر جالب اولار

گورجک سوز کی علی ابن ابیطالب اولار

 

بو آی اوخشور علیه کاملاً از چند جهات

بو سوزی ائیلرم الساعه بو حضاره ثبات

هم علی هم رمضاندان یاغور هردم برکات

فضل و جود و کرم و بخشش و ایثار و عطا

هم علی صاحب بو حُسنیدی هم ماه خدا

 

دیه بولسم بو سوزی سوزلریمیز کامل اولار

شیعیه شکر خدا حُبّ  علی شامل اولار

چتر الطاف علی باشیمیزه حائل اولار

علی آدین ایشیدن شیعه گوزی تز یاش اولار

باور ائیله که علی مین رمضاندان باش اولار

 

اعتبار آلدی علیدن رمضان اولدی کریم

رأفت و شخصیتی لحظه لرین ائتدی رحیم

بی علی اولسا کریم اولماز اولار ماه عقیم

رمضان گر بیر آیی ایلده گلور تاب ایلیور

علی باران کیمی گونده بیزی سیراب ایلیور

 

هر داشا دگسه الینون الی داش گول بیتیرر

باخسا هر کافره کافر دیلی اَشهَدْ گتیرر

علینون عشقیدی سلمانلاری اوجه یتیرر

بولهب زاده لری خوار و گرفتار ایلیر

نظر ائتسه بیرینه میثم طمار ایلیر

 

بی علی عمریلری آفت دنیا گورورم

لحظه لحظه سپری اولدوقی بیجا گورورم

بی علی کعبه نی در حد کلیسا گورورم

کعبه ده آلدی علیدن اوزونه عزّو وقار

یوخسا بی حُسنِ علی بوش بیر اطاقدا نه اولار

 

علی بو نه فلکه ویردی ستون ابدی

چوخ تلاش ائتدی بیزه اورگده هر نیک و بدی

یوخ دئین مدعیه بیر بیله هنگامه ندی؟

آدی حکاکی اولوب ذهنه فراموش اولماز

آتش عشق علی سینه ده خاموش اولماز

 

شهپرین آچسا اگر اوچماقا جبریلِ امین

اوخیان اولسا اگر بو ملکین زیر پرین

گورجکدی یازوب الله علینون آدین همین

بو علی عشقیدی عالم لره اعجاز ایلیور

بو ملک نام علیلن گوگه پرواز ایلیور

 

بیرگونی حضرت سلمان سوچکوردی قویودان

ایستیوردی دولا سومشکی لبالب سویولان

ناگهان باخدی سوا گلدی اونا چوخ هیجان

گوردی سو رنگی کدردی گینه تکرار ائیلدی

سطلی سالدی سوا بو حرکته اسرار ایلدی

 

نچه یول بو عملی ایلدی تکرار اوزمان

گوردی کی رنگی کدردی ایچه بیلمز اوسودان

بیر اشارهَ ائیلدی ای سو منه ایله بیان

نیه خاطر دولانوب ماهیتون اولدی کدر

بئیله بیر حالته آیا نه سبب واردی مگر؟

 

سو گلوب نطقه دئدی طابع قرآن سان آقا

احمدی مَسلکْ و هم شیعه مسلمان سان آقا

قوی آچیم سرّیمی چون حضرت سلمان سان آقا

بو سخن واضح و روشندی که طاها بویوروب

سنه خاطر آقامیز کلمه منّا بویوروب

 

گجه لر کی یاتیشور اهل مدینه اویاقام

باشیمون اوسته گلور دردو دِله مظلوم آقام

دوزدی چاهم ولی بیر بیکسه ائل تک دایاقام

صبحه جک روشن اولور غملر الیندن چراغیم

منیلن درد و دل ایلور او آدامسیز قوناقیم

 

اییلور تا قویا مولا باشیم اوسته باشینی

آغلیور فاطمه حالینه توکور گوز یاشینی

هی دیور میخ در اولدوردی جوان یولداشینی

فاطمه خاطرینه خون جگردن اوتوروق

گجه لر منلن علی مجلس ماتم دوتوروق

 

بونا خاطردی که رنگیم دولانوبدور سلمان

الده پیمانه صبریم جالانوبدور سلمان

غم زهرا اورگیمده قالانوبدور سلمان

صبحه جک ناله جانکاهیله صحبت واریمیز

سنده گل آغلاماقا هرگجه هئیت واریمیز

 

قاپی یانماق جریانون منه هرشب دانیشور

او دئدیگجه اورگیم سوز محن ده آلیشور

گوزلرینده سوزولن گوزیاشی منلن قاریشور

دای منه سو دیمه سلمان من علی یولداشیام

در حقیقت من علینون سوزولن گوزیاشیام

 

باخگیلان رنگیمه سال یاده امام حسنی

سارالوب رنگی ویراندا او دنی فاطمه نی

اوزی اوز گوزلریله گوردی یارالی بدنی

دئدی قربانون اولوم ثانی ویروب یاندی یوزون

قوی گوزوندن اوپوم آخر ننه قان اولدی گوزون