هرعلی نام اولان عالمده علم داراولماز

انبیا خاتمینه محرم اسرار اولماز


هرعلی نام اولان عالمده علم داراولماز

انبیا خاتمینه محرم اسرار اولماز

صاحب علم وهنر سرور احرار اولماز

کعبه ده گتدی جهانه اونی حی ازلی

اوز ادیندان بیرینی سچدی ادین قویدی علی

بدو خلقتدن اونون دشمنی اما چوخودی

سوره ی توبه نی کفار قریشه اوخودی

علمیده عدلیده میداندا حریفی یوخودی

جنگ میدانینه گیرسیدی او ازاده مرام

قهرمانلار قاباقیندا ایده بیلمزدی دوام

 دیدی بیرگون او فدا کاره رسول مدنی

قصد ایدوب اولدوره دشمن بو گجه وقتی منی

امر خالقدی قویام اوز یریمه ایوده سنی

اولدی بشاش اونون چهرسی اولموبدی ملول

دل و جانیله پیمبر سوزونی ایتدی قبول

قیلدی فرمایش علی جان بو ، ائشین وار خطری

ایستیوردی ندی گورسون او جنابین نظری

شیر یزدان ائله شاد ایلدی خیرالبشری

دئیدی ایا وار ئولومدن اویانا اوزگه خطر

سنه قرباندی علینون اولا مین جانی اگر

 رختخوابینده رسولین دیمورم یاتدی نجه

قرخ نفر الده قلج منزلینه دولدی گجه

 نقشه ی قوم ظلم گلمدی بیر ذره وجه

دوردی غیضیله یریندن ایاقا شاه انام

حضرتی،تا گوروب اعدا قییدوب قاچدی تمام

     صورا پیغمبری تعقیب الدی اهل زیان

یولدا بیر غاریده ،   حضرت اوزونی ایتدی نهان

عنکبوت امر خداوندیله گلدی او زمان

غارین اغزین توخودی تاریله از وقته ، هوروب

گلدی جبریل امین  ایشلور او حیوانی گوروب

دئیدی قصدون ندی بوایشده ایدورسن عجله

دیدی کفار قریش ایستیور  الساعه گله

جان پیغمبری حفظ ایلیورم بوردا هله

دیدی بو تاریله؟  عرض ایلدی ال تارینه ویر

قدرتون واردی اگر سعی ائله بیر تارینی قیر

دوتدی تاری گوجونی ویردی نه اندازه واری

ائله فکر ایلدی ییر قالخوری یکسر یوخاری

پارلنمور ولی سالیمدی اونون جمله تاری

قالدی عاجز بوراخوب ایلدی بو نوعی بیان

ندی جینسی بونون ایا منه تئز ایله بیان

اهل عالم دیدی یکسر ییقشوب گر دورالار

گوجلرین باهم ایدوب سن کیمی الان ویرالار

چوخ محال امریدی بیرتارینی حتی قیرالار

چونکه من نغمه ی پرشور  ولایت اوخودوم

بیر به بیر تارین اونون عشق علیلن توخودوم

منکره گر چه بوسوز زهریلی اوخ تک توخونور

 او ائشین فلسفه سی دهریده دایم اوخونور

ایندی تاریندن اونون ضد گلوله توخونور

کیم علی دشمنیدی خانه ی قلبین قارا گور

عنکبوتی  یتوروب حب ولایت هارا گور