کوفه نین مسجدینه صبحیدی انصار گئدور

محنت  اعظمه  کیم اولدی خبر دار گئدور


کوفه نین مسجدینه صبحیدی انصار گئدور

محنت  اعظمه  کیم اولدی خبر دار گئدور

 

جبرئیلین اوجالوب قتل العلی فریادی

مرتضانی آپارور منزلینه اولادی

کوچه ده همهمه مسجده ولی غوغادی

یئردن افلاکه چخور آه شرر بار گئدور

 

ساخلیوب کهنه گلیمون هره بیر گوشه لرین

اسدالله ائده جک  کوفه ده آخر گذرین

هامی آشفته دی بو جمعیده ، آشفته ترین

کربلا شاهیدی دلتنگ و دل افگار گئدور

 

طی ائدور کوچه لری اللرین اوستونده علی

ایاق اوستونده دورا بیلمیور اللهین  الی

هامی ائیلور عجله گورمگه مولانی ولی

بوینی چیگنینده قالوب دالدا علمدار گئدور

 

هامی قورخور بو غم عباسی خروشان ائلیه

صبری آز غیرتی چوخ  شهریده طغیان ائلیه

واردی امکان اوزون ال کوفه ده طوفان ائلیه

اودی  بیر عده کنار بو سپه دار گئدور

 

ازدحامیله دوتوب کوفه لیلر هرگذری

بیربیرینن سوروشوب نقل ائلیوللرخبری

ابن ملجم یاخاسندا حسنین پنجه لری

شیر ائدوب کوچه ده روباهی گرفتار گئدور  

   

ابن ملجم ائله اوز نقشه سین ائیلوب  عملی

غشوه حالینده دی  دردانه ی  گنج ازلی

گوزلرین گاهی آچور گاهی یومور،یورقون علی

حالدان، ایستور ائلیه بیر سوزی، اظهار، گئدور

 

ضعف جسمی نفسین سینه ده پنهان ائلیور

پاره پاره دانشور سوزلرین عنوان ائلیور

قان اولان دیل دوداقی عالمی ویران ائلیور

هچ یاراشمور بئله کی حیدر کرّ ار گئدور

 

دئدی اوغلانلارنا  ناله لری کم ائلیون

گئیدیگیم جامه نی اگنیمده منظّم ائلیون

باشما باغلادقوز بندوزی محکم ائلیون

مرتتضا زینبینن ائتمگه دیدار گئدور

 

زینبین طاقتی یوخدور منی محنتده گوره

آناسز قز آتاسن غرق جراحتده گوره

قویمون ائوده منی بیر بله حالتده گور

ائوی غم خانه دی غم خانیه غمخوار گئدور

 

مرتضا امرینی فوراً حسن اجرا ائله دی

اسداللهی بو دیداره مهیا ائله دی

آغلیا آغلیا عباس تماشا ائله دی

ائله آغلور هامی دنیا گوزونه تار گئدور

 

ائله بیر حالدا سالوب کوچه ده باشین اشاقا

تیتریور قامت مردانه سی باشدان ایاقا

ئورگ ایستور گله اما گله بیلمور قاباقا

قدم آتدوقجا غضب ائیلیور ، اجبار، گئدور

   

یئتیروبلر ائوه  مولانی حسینیله حسن

گوردی زینب باباسن ائیله دی اجرایِ محن

بار الها دئدی قالدم  نه یامان گونلره من

قافلم تنگه دوشوب قافله سالار گئدور

 

 

بونئجه یاره بو نه باش بو نه قامتدی بابا

بو نه امت نه دیانت نه جهالتدی بابا

سجده اوستونده سنی وُرماق عدالتدی بابا؟

سینه ، زندانینی ایستور آچا ،گفتار گئدور

 

بابا یارونّن آخان قانوه زینب قربان

بوکولن قامت مردانوه زینب قربان

تک قالوب تک یورولان جانوه زینب قربان

باشووُن قانینه  باخ  چشمیه اوخشار گئدور

 

بش یاشمنان بو فلک قویدی منی قاره گونه

خوش گونوم سن کی بیلیردون نئجه حسرتدی گونه

رشته ی محنتیمی سالدی بابا  ، کیم دوگونه

گلسه هر غصه ائدور زینبی آزار گئدور

 

کوفه نین اهلی نه بی غاطفه ملتدی بابا

بیر دیین یوخ بورا درگاه امامتدی بابا

گوزون آچ  باخ ائوُوَه گور نه قیامتدی بابا

گور نئجه ائوده حسین وحسنون زار گئدور

 

 

بابا بیر چاره چاره ائله قان دوتوب عباس گوزون

دارخور قلبی دینمور غضب اوستونده سوزون

بابا آچ گوزلروی قاداشم ئولدوردی ئوزون

الده شمشیری غصب اوسته علمدار گئدور

 

 

زینبین ناله سی عالملری ویران ائله دی

هی توکوب گوز یاشی هی اوخشادی طوفان ائله دی

تا علینین ئوزون آخرده پریشان ائله دی

گوردی مولانین، ئوزه گوز یاشی خونبار گئدور

 

بویوروب صبر ائله، زینب، ائله مه ناله بالا

آغلیوبسان او قدر گوزده وارون هاله بالا

حق منی نایل ائدوب کعبه ی آماله بالا

ائتدی شوقیله علی سجده ده ایثار گئدور

 

زینبیم یوزدن ائله پرده ی اندوهی کنار

فاطمه منتظریمدی یتیشور یارینه یار

فرصتیم آزدی عزیزیم ایکی گون وقتیم وار

یاره لی یاره قوناق یاره لی یبر یار گئدور

 

او ایکی گونده علی منزلی خلوت ائله دی

حسنینه دئملی سوزلری صحبت ائله دی

فرصتی هر نقدر اولدی وصیت ائله دی

بو وصیتلری حیدر قویوب آثار گئدور

 

دئدی اولماز بابازون دردینه عالمده دوا

ائدورم فکر شهادت نه طبابت نه شفا

یوردی دنیا منی کول باشوه اولسون دنیا

بی حیا سنن علی گور نئجه بیزار گئدور

 

مصلحت اوسته آچاموردی علی باغلی قولون

تار مو قدری ولی اگمه دی دنیاده یولون

ای فلک ای شرف ای عدل هاموز شاهد اولون

علی ارثیه قویوب بیر پارا دستار گئدور

پاره پاره اولان امامه علامتدی سیزه

گینه تاگید علی عدل و عدالتدی سیزه

کوفه نین بیوه یتیمانی امانتدی سیزه

باغبان قویدی سیزه بیر ساری گلزار گئدور

 

قویمیون گوللریمی سوز و گداز ایلیه لر

قویمیون ئوزگه لره عرض نیاز ائیلیه لر

چکون ال باشلارنا تا سیزه ناز ائیلیه لر

ناز ایتامه اوکی اولدی خریدار گئدور

 

آتا سز کورپه لرین فکرینه هر یئرده قالون

قزلارون باشلارنا معجر  رو روبندی سالون

جامه سی گوردوز اگر کهنه دی پیراهن آلون

تاپشرور بو سوزی حیدر سیزه بسیار گئدور

 

گئجه لر آه و نوا قالدی سیزه من گئتدیم

کوچه کوچه فقرا قالدی سیزه من گئتدیم

ائو به ائو آب و غذا قالدی سیزه من گئتدیم

ئورگیم دردی دئدی ایندی سبکبار گئدور