وئرر اورکلره الله  صفا اروجلوقدا

صفا تاپار دل اهل ولا اروجلوقدا


وئرر اورکلره الله  صفا اروجلوقدا

صفا تاپار دل اهل ولا اروجلوقدا

وئروب بشارت ئوزی کردگار عالمیان

گئجه گونوزگرک اولسون دعااروجلوقدا

کلام حقده یازوب استجب لکم سوزونی

دعا  کیم ائتسه اولار تز روا اروجلوقدا

اودورمن عرض ائدورم مستحق احسانم

باغشلا یا رب ئوزون قیل عطا اروجلوقدا

یوخومدی خیرعملیم عاصیم خطاکارم

گدای درگهیوم ربنا اروجلوقدا

قاپواکیم الی بوش گلسه ناامیداولماز

الهی سائل و یا اغنیا اروجلوقدا

کرملیدوربوقاپی منده روسیاه وذلیل

مریضم ایله بودرده دوا اروجلوقدا

سنی قسم وئرورم خیرة النسا جاننا

بو زاره لطف ایله صبح ومسا اروجلوقدا

عنایت ایلموسن آیه آیه قرآنی

رسولیوه اولاتارهنما اروجلوقدا

دیلّه ماه مبارک ائیلین عزیزآییدی

سؤونراهل عبادت اولا اروجلوقدا

صفاسی وارائشیده نغمه ی مناجاتی

ائده بشرحقه حمدوثنا اروجلوقدا

وفات ائدوبدی خدیجه آناسی زهرانین

یتیم اولوب گل اهل کسا اروجلوقدا

توکوب عذاره سرشگین آنا فراقینده

بتول ائدوبدی اورکدن نوا اروجلوقدا

دولانوب آی گئچوب ائیل آچدی گلشن زهرا

اولوب شکفته گل باصفا اروجلوقدا

دوتوبدی دهری اونون عطری ایلدی رضوان

قویوب جهانه قدم مجتبی اروجلوقدا

سؤوندی حضرت زهرا باخاندا مولوده

خدایه شکر ائدوب اول باحیا اروجلوقدا

بو چرخین عادتیدورتلخی وار شیرینلقی وار

بشری شاد ائده یا آغلادا اروجلوقدا

وئروبدی فرصتی چرخ دنی ستمکاره

که شهرکوفه ده ائتسون جفا اروجلوقدا

اوگون یتیشدی که کلثوم علینی دعوت ائدوب

گلوب قیزی ائوینه مرتضا اروجلوقدا

آچوبدی خوان طعام ایلسون پذیرایی

بویوردی افطارائدون سیزبابااروجلوقدا

وصیّ ختم پیمبر   بویوردی ئوز قیزینا

ایکی خورشتی ییمز اتقیا اروجلوقدا

گوتوربیرین بولارین قوی کناره بسدی بیری

که میل ائدوم اوغذانی بالا اروجلوقدا

غرض علی اوگجه صرف ائدوبدی نان ونمک

دوروب عبادته مشغول اولا   اروجلوقدا

گئچوب گئجه یاریدان یاریلن علی دانشور

قیلوب نماز شبین مقتدا اروجلوقدا

چخوبدی دیشره مکرر باخوبدی افلاکه

چوخ اضطرابیله اول پیشوااروجلوقدا

گوروب او حالدا سوال ایلدی قیزی کلثوم

بویور  بابا   ندی بو  ماجرا   اروجلوقدا

علی بویوردی قیزیم آزقالوروصاله چاتام

شهادتیله اولام آشنا اروجلوقدا

اولوبدی وقت سحرنیّت صیام ائتدی

گلوردی مسجده شیرخدا اروجلوقدا

دیله گلوبدیله مرغابیان اودم گویا

دیوبله مسجده گئتمه آقا اروجلوقدا

علی به عشق شهادت چخوبدی منزلدن

گلوبدی مسجده بی اعتنا اروجلوقدا

گوروبدی ملجمین اوغلی دوشوب یوزی اوسته

اونابویوردی دور ای بی حیا اروجلوقدا

نه یاتمیسان یوزی قویلی کمال نخوتیله

اِراده وی بلورم جابجا اروجلوقدا

گلوب نمازینه مشغول اولوب امیرعرب

دایاندی رازونیازایتماقااروجلوقدا

ائله که سجده ی اول تمام اولوب ناگه

وروب خفادن اونی بیردغا اروجلوقدا

باتوردی قانه علینی او زاده ی ملجم

دوشوب تزلزله ارض وسما اروجلوقدا

بویوردی آنداولااللهه رستگاراولدوم

منه چوخ ایلدی دشمن جفااروجلوقدا

سنه که«شاجری»مظلوم آقاعنایت ائدوب

جزا    وئرر      اوزی روز جزا     اروجلوقدا