بیر شب جمعه حبیبی بیر نفر

گوردی رویاده حرمده دیده تر


بیر شب جمعه حبیبی بیر نفر

گوردی رویاده حرمده دیده تر

عرض قیلدی ای حبیب با وفا

ای شهید عشق شاه ڪربلا

احمد والا مقامه نورعین

جان نثار پیر اردوی حسین

روز عاشورا حسینه جانیله

خدمت ایتدون دلده کی ایمانیله

بیر جلالت حق سنه ایتدی نصیب

شاه دین دربانی اولدون ای حبیب

بو جلال و جاهیله‌ای خوب رو

دلده وار آیا سنون بیر آرزو

صاحب رویایه بیر ایتدی نظر

گوزلری دولدی تاپوب حالی کدر

سویلدی واردی منیم بیر آرزو

لطف ایدیدی حق مضاعف آبرو

گلماقیم ممکن اولیدی عالمه

یول تاپیدیم منده بزم ماتمه

فاطمه اوغلی حسینه صبح‌وشام

دوتماقا ماتم ایدیدیم اهتمام

منده دلده ذڪر وای وایلن

آغلییدیم اوردا هایهایلن

گوز یاشیم جاری اولیدی دامنه

سسلنیدیم یاحسین قربان سنه

ای خداوند رئوف و مهربان

هرمکاندا حاضر اما لا مڪان

بو گوزل آددا نه لذت قویموسان

نه حلاوت نه ملاحت قویموسان

ذکر ایدنده روحه بیر لذت گلور

بی نهایت حظّ بی منت گلور

حظی توأمدی ولی افغانیله

آه جانسوز اشک بی پایانیله

تا حسینون آدی دلده ذکر اولور

دیده لر ابر بهاران تک دولور

شعله آهیله دللر داغلاشور

ڪربلا یادیله گوزلر آغلاشور

قتلگه یاده دوشور نه قتلگاه

بیر چوخور یر،بیر یارالی بی پناه

هر گلن یاره ویرور ڪامه چاتور

داش‌ویروربعضی‌سی،بعضی‌اوخ‌آتور

قتلگاهی دولدوروب ایوای سسی

زینبین ایوای حسینیم وای سسی

گه خیامه باش ویرور دیده پر آب

قتلگاهه گه گلور ایلور خطاب

ای عجب دوشدی بلایایه باشیم

قالدی اللرده یارالی قارداشیم

گه بقیعه یوز دوتور سسلور آنا

زینبون باغری دونوب غمدن قانا

گل آنا بیر باخ بلا صحراسینه

قتلگاهی ایچره قان دریاسینه

اُلدورولر اوغلووی قوم لئام

دوره سین یکسر آلوب اشرار شام

اولقدر یاره ویروبلار خسته دی

گل اماندی‌گل بالان‌جان‌اوسته دی

گل اوزون باغلا حسینون گوزلرین

استماع ایله یانیقلی سوزلرین

سسلنور یاندیم سوسوزدان العطش

من مسلمانم ، مسلمان  العطش

آتش ظلموز جهانه اود سالوب

خیمه لرده قیزلاریم آغلار قالوب

دللرین هجران اوخی ایله دلور

ویرمیون ایندی آنام زهرا گلور

"جابری" ال ساخلا تاب ایتمورقلم

اودلادی اڪبادیوی نار الم

سسله دلدن یابن زهرا الامان

العجل، الغوث، یا صاحب زمان