سلام اولا شرف اوصیا امام حسنه

عزیز حضرت خیرالنسا امام حسنه


سلام اولا شرف اوصیا امام حسنه

عزیز حضرت خیرالنسا امام حسنه

کریم آل محمدی شانی دریا دور

ویریب جلالت مطلق خدا امام حسنه

جمالی جدی پیمبر کیمی جمال الله

گورن دییردی عجب مرحبا امام حسنه

اوزی حسندی کمالی حسندی،حسنی حسن

ایدردی فخر اوزی مرتضا امام حسنه

آچاردی سفره افطارینی گلوب فقرا

 ییوب طعامین ایدردی دعا امام حسنه

ایله امامیدی یوز آستانه سینه قویوب

دییردی دردینی شاه و گدا امام حسنه

بو فاطمه گولودی نکهتی علیدندور

گرکده فخر ایده ارض و سما امام حسنه

بو آسمان امامتده پارلاق اولدوزدی

تمام ما خلق اولسون فدا امام حسنه

بو بسدی  شان و مقام و جلالتینده بونون

که قارداش اولدی شه کربلا امام حسنه

ملول اولمویوب اولماز او کی دیه دردین

آقام امام حسینه و یا امام حسنه

دیوبدی جدی کی محشرده اشگبار اولماز

او  گوز که اشک توکوب آغلیا امام حسنه

مزار پاکی معطر ایدوب بقیع چولونی

اوزاخدان  آغلیار اهل ولا امام حسنه

نه صحنی وار نه رواقی نه بیر ضریحی ولی

او قبر اولوب حرم کبریا امام حسنه

گلر امام زمان قبرینی طواف ایلر

ایدر او چولده دویونجا نوا امام حسنه

گلون ویراخ ال اله بوگجه توسل ایداخ

وطن غریبی او درد آشنا امام حسنه

سالاخ خیاله او ساعت که سسلنوب زینب

نه یاتمیسان گوزون آچ قیل عطا امام حسنه

ایاقه دور بو آخان قانی سیل دوداقیمدن

حسینه  دی گله باش چکماقا امام حسنه