بو آلتی گوشه قبریوین اولوم فداسی یاحسین

حریم کعبه دن گوزل دوشوب نماسی یاحسین


بو آلتی گوشه قبریوین اولوم فداسی یاحسین

حریم کعبه دن گوزل دوشوب نماسی یاحسین

بیر آن سنون خیالیوی اینان باشیمدان آتمادیم

بلالی باشیمی حسین بیر آیری درده قاتمادیم

اویاق قالوب رقیه وی یاتیدمینجا یاتمادیم

روا دگول عهدیمون اولا خطاسی یاحسین

زمانه آیریلیق سالوب آنا بالا آراسینا

سینه ندن اصغری اویات ویراق رباب آناسینا

توکه سرشکی آلینی،بوغازدا اوخ یاراسینا

دوروب کناریدان باخور ،رباب آناسی یاحسین

سینیق کجاوه لرده من داغی داشی دولانمیشام

دوشنده باشیم اوسته گون،گون ایسی سینده یانمیشام

سالاندا سایه سین باشون جداده،دالدالانمیشام

اولوب اوسایه باشیمون غم آشناسی یا حسین

وفا یولوندا ن اشقیا عجب کناره چیخدیلار

آنام بتولی قلبینی سالوب فشاره سیخدیلار

ورا ورا اوشاقلارین چوخون یول اوسته ییخدیلار

اولنلرین کجاوده دوتولدی یاسی یا حسین،،،

دولی بلوط کیمی گوزوم دیمه غمینده دولمادی

جهاندا آیریلیق گولی هزار حیف سولمادی

قوشا گلاخ زیارته بالان یانیمدا اولمادی،

نقدریمیش زمانه نین منه جفاسی یاحسین

بالاوی دفن ایدن  گجه اورک غمیله داغلادیم

یتیم اولان گجه م کیمی ،دیزیمی من قوجاقلادیم

سحر اولونجا قازدیقیم مزارین اوپدوم آغلادیم

گوزوم یاشیلا سونمدی اورک نواسی یاحسین

یازی یازان یازیب بیله یازیمدا،نسگل آغلیام

اودور بو باره دن ویریب منه یانان دل آغلیام

سنه بیر اربعین ندور،سزادی قیرخ ایل آغلیام

ولی چتین بو عمرومون اولاوفاسی یا حسین

صاقا صولا باخا باخا  اوزومی من یتیرمیشم

ایتیک دالینجا گوز گزر،بوکلمه دوزدی بیلمیشم

گیدن زمان بو چولده من ایکی بالا ایتیرمیشم

دولانمامیش بو دشتی من،قالوب هاراسی یا حسین؟