اوگون کی دفتره کِلکِ قضا راه فرج یازدی

طوافِ کعبه ی حقّه فروعِ دینه حج یازدی


اوگون کی دفتره کِلکِ قضا راه فرج یازدی

طوافِ کعبه ی حقّه فروعِ دینه حج یازدی

وصال ِیاره بیریول نقشه چکدی بیرنَهَج یازدی

ولی آسان دگول راه وصال عُسر و حَرَج یازدی

تَهَیُّج عالَمی عاشقلری چوخ مُبتَهَج یازدی

گتیردی انبیانی احتجاجه مُحتَجَج یازدی

اون ایکی نورِ نَیِّر کایناته مُندَرَج یازدی

علی موسی الرّضانین نورینی ثامِن حُجَج یازدی

اون ایکی نور واحد هربیری بیراختر تابان

علی اوّل حسن دوّم حسین سوّم شَهِ خوبان

اِئدیب زین العبادی دوردومنجی حجّت یزدان

بِشیمجی باقرالعلم النّبی دور آیت سبحان

اولوبدورآلتیمینجی صادق آلِ علی عنوان

آقام موسی ابن جعفرهفتمین خورشید دین یاران

رضادورسگّیزینجی رهبر دین عالمه سلطان

رضانون حُبّینی قلبِ مُحِبَّ ووردی دَجْ یازدی

جواد ابن الرضا جود و سخایه آدلانیب مشهور

نقی دورهادی دوران ، منی توت وصفینه معذور

اولوبدور اون بیرینجی عسکری شهرت حسن مقرور

قالیبدوریِر اوزونده حجةالله بیر نفر مامور

حصار فتنه افسوس ایلیبدور حضرتی محصور

غرض اجمالیدور سوزلر ولیکن آیریدورمنظور

رضا آدین ئورک چوخ ایستَییر بلکه اولا مسرور

قلم اون بیرآدی مِنْ بابِ حرمت مُمتَزَج یازدی

گل ای دل شاهِ ارضِ طوسه بیرعرضِ ارادت یاز

گیدَر بو فرصتون قالمازالونده واردی فرصت یاز

گوتورسه بیر قدم ده طفلِ طبعون پایِ همّت یاز

خلوص نیّتیلن بیرده یاز یا محضِ خدمت یاز

صبانی قاصد ایله یثربه قلبونده نیّت یاز

امام هشتمی مدح ایله آچسین بابِ رحمت یاز

رضانین وصفینی چک نظمه شاعرایله دقّت یاز

رضاعشقین گِل و آبونله خالق مُمتَشَج یازدی

گوروندی اون بیرِ ذی القعدَدَه بیر نور یزدانی

وجود آیت عظما ایشیقلاندیردی دنیانی

گلیب شمسِ جهان آرا منوّر قیلدی دورانی

خانم نَجمَه آناسی بختور بانوی روحانی

آتاسی موسیِ جعفر او مهر و مرحمت کانی

رضا آدلی گوزل اوغلی سرافراز ایتدی زهرانی

اولار کی اَبْتَرْ آدیلان خطاب اِیلردی طاهانی

بوگون ابتر دیینلرنسلینی گُنْگ وفَلَج یازدی!

شَهیرعلّامه لرعلمِ رضانی اِیلییب انشا

نئچه مین نظم و نثر ومدح نامه ثبت اِیدیب دنیا

هره بیرنوعیلن اوصافِ عشقینده قلم فرسا

اگرچه شیعییه مختصّدور فیضِ وِلاٰ امّا

تماماً مغرب ومشرق رضادن فیض آلیب یکجا

بوتون اقوام و ملّتلرایچینده شور اِیدیب برپا

 

عرب،تُرک وعجم، هندو،چه جابلقا چه جابلسا!

اونا تعریف نامه فارس وتاتاروخَلَج یازدی

یازای خامه رضانین مدحینی طبعیم دیله گلسین

مراد و مطلبیم بلکه رضائیلن اَلَه گلسین

رضا آدیله صحبت آچ حدیث سلسله گلسین

ولایت حِصنینه داخل اول ای دل نافله گلسین

رضا عاشقلری صوت رساییلن سوله گلسین

اوجالت ای عندلیبیم صوتووی بَمدَن زیله گلسین

بالاسی صاحب العصرین الیندن بیرصِله گلسین

رضا آدین خدا هر مشکل اولسا ذُوالعَلَج یازدی

اوگون کی کشمکش باشلاندی یاران تخت وتاج اوسته

اِیدیرمأمون ملعون حکمرانلیق اِعْوجاج اوسته

اولوب بَرمَکیان مأمونه تابع احتیاج اوسته

خراج سالیانه اخذ اِیدیرعُمّالی باج اوسته

ایدیب فَضل ابنِ سَهلی باش وزیری لاعلاج اوسته

چاغیردی حضرت موسی الرضانی اِحتِجاج اوسته

گتیردی بیرنچه عالِم قوروب مجلس لجاج اوسته

ریاضیات اوزیلن اِتّحادِ مُزدَوَج یازدی

گلَن کیم؟ جاثَلیقِ ناصریلر پاپِ اعظمدور

یهودون رأس جالوت مقامِ علمیده یَمدور

وبیرده هُرمُزِ زرتشتیان هم کیشِ رستم دور

بیری عُمران صٰابی اولدوزا پیر و مکرّم دور

سلیمان مَروَزی اهلِ کلام وعلم مُبهَم دور

یوحنّای مسیحی ده اوزی بیر شخص اعلم دور

گلیب هرتک تکی پیروز اولا امرِ مسلّم دور

نه بیلسین طفل اوّل مکتب ایچره خطّی کج یازدی

امام اوز احتجاجین باشلادی انجیل اعلادن

صورا توراتیدن بحث آچدی لطفِ حیِّ دانادن

وِیریبدورهُرمُزِ زرتشتیه درسین اَوِستادن

هدایت نامه سین هراوچ نفراخذ ایتدی مولادن

باخیب اولدوزلارا عمران صابی دوشدی یارادن

گویون اولدوزلاریندان اَل گوتوردی چیخدی غوغادن

سلیمان دا قالیب عاجز کلامیندا توانادن

اونام آور سخنران عاقبت آدین رَتَج یازدی

الیکه حجةالله احتجاجین وِیردی اتمامه

قوی منطق له پشتیبان اولوبدوردین اسلامه

صورا تفسیر قرآن باشلادی بسط اولدی برنامه

یاییلدی حضرتین اوصافِ علمی کوفه و شامه

خلیفه درک اِیدیبدورسرنوشتین بد سرانجامه

سیاستلن اوزون توجیه اِیدیب بلکه یِته کامه

گیجه گوندوزچکیب نقشه رضانی حبس اِیده دامه

یَدِ بَیضایِ موساٰنی گورَن دستورِ لَج یازدی

همان گوندن خباثت نقشه سین مأمون عیان اِیتدی

امامین قلبینی تیر ِبلیّاته نشان اِیتدی

وِیریب انگور زهرآگین رضانی باغری قان اِیتدی

همان سمّین اثریندن امامی نیمه جان اِیتدی

جوادین سسلنیرجان اوسته حضرت چوخ فغان اِیتدی

باجیسی حضرت معصومه نی بی خانمان اِیتدی

اولورغربت ده بیرقارداش باجی ترک آشیان اِیتدی

اِیدیب طَردِوطن گوزیاشینی اوزده مَرَج یازدی