قتلگاهونده امان قارداش نه چوخ داش وار حسین

مقتلونده کسمگه بیر باشی مین باش وار حسین


قتلگاهونده امان قارداش نه چوخ داش وار حسین

مقتلونده کسمگه بیر باشی مین باش وار حسین

تلّین اوستن قتلگاهه باشدا اللر گلمیشم

تاپمیوب قیزلاروه بیر قاره معجر گلمیشم

گه دوشوب گه دورمیشام یولدا محقر گلمیشم

جسموی داشلارین آتدان گلمیشم اخراج ائدم

قلبیمی درد و مصیبت تیرینه آماج ائدم

استخوان سینووی داش وزنه سی خُرد ایلیوب

دست حقی ساربانلار بیلمورم هئچ نیلیوب

حضرت زهرا منه چوخدان وصیت ایلیوب

غملی گونده بو حسینون حنجریندن اوپ قیزیم

احترامیله امامین اللریندن اوپ قیزیم

ایندی نه حنجر یرینده باشیلن حنجر گیدوب

نه یرینده اللرون وار یا اخیٰ اللر گئدوب

غارته باشدان باشا پیکرگئدوبدور سرگئدوب

آغزینی آچمیش یارالاردان حسین بوس ایلرم

اوپدوگیجه سس چکوب فریاد افسوس ایلرم

بو مصیبت سیندیرار اعظم داشی٬ محکم داغی

چکمه لر پامال ائدوب باشدان باشا صولنان ساغی

سینوون اوسته حسین جان نقش اولوب آت دیرناغی

بو غریبه منظری گورجک باجون بیحال اولوب

بو درین گودالیده سینون حسین گودال اولوب

جسمووین وضعیّتی بحرانلیدی٬ محنتلیدی

سن اؤزون رأفتلی گولسن٬ قاتلون جرأتلیدی

یاره لر قانلی بدنده یاحسین حکمتلیدی

دست خلقت ٬ پرده ی حکمت ٬ گونه ابر ایلیوب

سینووی خنجر قازوبدور اصغره قبر ایلیوب

دیلده گیزلین دردوی ایکاش بیلیدیم بیلمدیم

سینووه قاتل چیخاندا دل بُولیدیم بولمدیم

من گرگ باشون کسنده شمر ئولیدیم ئولمدیم

چوخدی اللره ئولن چاتماز سنون آثارووه

بِیله یاتما ای حسینیم قوم دولوبدور یارووه

جسمی قان ٬ارکانی قان٬اعضاسی قان٬ مأسی قان

ایشلیوب شمشیر و خنجرلر پارالانمیش دهان

چکمه ی سنگینیدن چیخمیش بدندن استخوان

بو جنایاته نئجه دوزسون حسین قلب سلیم

لحمووی داشلار فشاری ایلیوب نعم الحلیم

مابقی متنی اگر یازسا قلم طغیان دوشر

یدی گویده یدی یرده قان دوشر طوفان دوشر

کشف اولا مطلب ایکی دنیاده مین بحران دوشر

اصل مطلب شاعرین روحین ٬روانین بُولدورر

دهریده آخر«نصیرینی»بو سوزلر ئولدورر