ای حسین عاشقی گلزار تولادی بورا

دوز گلوبسن ایله جنات معلادی بورا


ای حسین عاشقی گلزار تولادی بورا

دوز گلوبسن ایله جنات معلادی بورا

یاخشی بیر باخ در و دیواره غم افزادی بورا

دوزدی یثربده دگل خانه زهرادی بورا

دردون اولسا دیمرم حاذق اطبانی چاغیر

گوزووین یاشینی توک حضرت زهرانی چاغیر

ویر خبر دردی اولانلاره دینن غم گلدی

باشووه باغلا قرا موسم ماتم گلدی

سینه وور سسله حسینی قره پرچم گلدی

ای دوادن یورولان ماه محرم گلدی

چاغیرون یوزلری اشکه بوروننلر گلسین

قره پرچم دالیسیجاق سوروننلر گلسین

بزم تجلیل شئونات امامتدی بورا

مرکز کنگره شان و شرافتدی بورا

ایری فکر ایلمه درگاه عبادتدی بورا

گیتمه ایری قاپیا باب سعادتدی بورا

غم یمه اولسا نه اندازه اگر دردون اغیر

قلبووی پاک ایله بیر دفعه ابوالفضلی چاغیر

احتیاجون وار اگر معجزه گر درمانه

متوجه ایله افکاروی نخلستانه

ساقی تشنه دوشوبدی یارالی میدانه

ساق گوزی بوسه ویروب زهریلی بیر پیکانه

سروه اوخشور اوجا قدی ولی خوللاری دوشوب

بیر یانا مشکی دوشوب بیر یانا قوللاری دوشوب

کشتی عشقیدی گویا کی قالوب طوفاندا

عمرینون اولدوزی ایستور باتا نخلستاندا

ئوزینه فکر ایلمور هیچ ایله بیر بحراندا

تلین اوستونده قالوب قلبی گرو جاناندا

گوردی یوخدی یارالی قوللارینون درمانی

دوتدی تصمیمینی دعوت ایلیه مولانی

یوز دوتوب تله طرف سسلدی ای شاه بصیر

منتظر دور سنه میدانیده بو عبد حقیر

دیمورم گل منی قویما ایلیه لشکر اسیر

ننووی ایستسه گویلون ئوزووی فوری یتیر

باشیم اوسته اوتوروب گوز یاشی رخساره الور

ساچلاریندان باجیمون ساچلارینون عطری گلور

اوغلونون نوکرینه اولدی خانم تعزیه دار

ایستیوردی سیله گوز یاشینی اول لاله عذار

غفلتا اولدی حسین جان قره روبندی کنار

نجه تعریف ایلمیشدون یوزینون لکه سی وار

قد رعناسینی واضحدی کی غم غصه اگوب

کول منیم باشیمه اولسون یوزینه سیلی دگوب

سایه لطفی علمدارووی بشاش ایلدی

گوردی احوالیمی مستوجب پاداش ایلدی

ئورگیمدن کیچنی بیلدی خانم فاش ایلدی

نوکریدیم سنه گلدی منی قارداش ایلدی

هر نه امر ایلسه دستوری مقدمدی منه

پرچمیم دوزدی یاتوب ساچلاری پرچمدی منه

قارداشین الدی سسین خیمه ده سلطان انام

زینبی محضرینه ایستدی ازاده امام

گیدورم من دیدی ای خواهر مرضیه مرام

اللی ائیل منتظریدیم ایله بیل گلدی انام

بیلدیم عباسی اگر گورسه نیستانه گلر

سنی ده یوخلاماقا شام غریبانه گلر

مرکبی حاضر ایله عزم ایلیوم میدانه

قوی گوروم هاردا باتوب ماه شرافت قانه

اولمیا قارداشیمون عمری چاتوب پایانه

بلکه روحی پر اچوب علقمه دن رضوانه

حقووی قارداشووا سنده ادا ایله باجی

گیت اوتور خیمه ده عباسی دعا ایله باجی

زینبی تاپشروب اللهه غرض شاه ولا

تشنه قیزلارینا بیر باخدی صورا دوشدی یولا

پر اچوب مرکبین اوسته خلف شیر خدا

ایاقی التدا قویوب عرصه نی شاه شهدا

گوردی قولسوز یخلوبدی یره سرداری یاتوب

باش قویوب تپراقا غیرتلی علمداری یاتوب

دئدی ای ام بنینون گل بی خاری اویان

منه گولدورمه بو میدانیده اشراری اویان

دیمورم ال نظره لشکر کفاری اویان

بلیمون سینماقینون خاطرینه باری اویان

نیه بو حاله قالوبسان سنه اصغر قربان

یارالی باشووه قارداش علی اکبر قربان

سنی درس علوی جنگه زبر دست ایلیوب

غیرت اللهی علی روحووه پیوست ایلیوب

حیف اولا دشمنووی دست زمان پست ایلیوب

کیم ئوپوب لبلریوی عطری منی مست ایلیوب

قوریان لبلرووه جام لبالب قربان

کسیلن قوللاریوا غمزده زینب قربان

ایستورم گوز یاشیما باشووین اوسته بویانیم

سن یانان اتش حسرتده گرک منده یانیم

گل گئدک خیمه ده سن یات ایاق اوسته دایانیم

باشووی تپراقا قویما باشووا من دولانیم

تیتریور اصغریمون لبلری مثلی بدنیم

منتظردور سنه قیزلار ایویمی یخما منیم