خوشلورام تا ائلیم عشقیله سودا بیرده

ذکر ائدم آدوی ای خالق یکتا بیرده


خوشلورام تا ائلیم عشقیله سودا بیرده

ذکر ائدم آدوی ای خالق یکتا بیرده

نظر ایله دیل آچیم مدحت آل‌اللهه

منله همراه اولالار اهل تولّا بیرده

اوّل ماه رجب، ماه صفادی بو گئجه

گؤرورم عالمی معنانی مصفّا بیرده

باقر علم نبی‌نون یئتیشوب میلادی

قصة عشق اولوب دل‌کش و زیبا بیرده

سجدة شکره قویوب حضرت سجّاد باشین

عرش و فرشی ائلیوب ذکرینه شیدا بیرده

یاییلوبدور گئنه‌ده یئرگوه رضوان عطری

سئونوب جنّت آرا حضرت زهرا بیرده

آلدی آغوشه حسین، جدّینه اوخشار نوه‌سین

آیت مهری ائدوب بوسه‌ده معنا بیرده

سس قوشوب گویده ملکلر اوخور عشقیله سرود

آسمانلاردا قؤپوب گؤر نئجه غوغا بیرده

اشیدوب بو خبری اولدی اورکدن مسرور

عشقینی گلدی کی اثبات ائلیه جابرده

گؤزونون نورینی آلمیشدی دئیوللر بو فلک

گلدی، دلدار ائده بو دردی مداوا بیرده

اؤپجاقین مقدمینی نور گلوب گؤز‌لرینه

گؤرموین دیده‌لری اولدولا بینا بیرده

تازه مولوده باخوب سسلدی جلّ‌الخالق

 نور طاهادی اولوبدی متجلّی بیرده؟

 حُسن صورتده خود حضرت پیغمبردی

گؤرورم احمدی یا ربّیَ الاعلی بیرده

همّت و غیرتی امّا آقانون حیدری‌دی

دوغولوبدی علی عالی اعلا بیرده

مدرکیم وار بو سؤزه ایلمه ایراد منه

قولاق آس تا ائلیوم حلّ معمّا بیرده

کربلا واقعه‌سینده آقا اوچ یاش‌دئیدی

گؤره دنیا ائله بیر فتنه‌نی حاشا بیرده

آل طاهانی اسیر ایلدی اشرار دنی

بئله بیر ظلم مگر ئوز وئرر آیا بیرده؟

کوفه و شامه روان اولدی او یورقون اسرا

شهدا قانی اولا دهریده احیا بیرده

اولارین باشینه چؤللرده نه گلدی دئمورم

بو دگول قصدیم ائدم غملره ایما بیرده

مجلس شوم یزیدیله ایشیم واردی منیم

گل منیله گئدک اول مجلسه جانا بیرده

دئمورم زینب او بزمه نئجه طوفان سالدی

آل سفیانی ائدوب یکسره رسوا بیرده

گؤز دولاندیردی باخوب فوج اسیرانه یزید

رعبون اول بزمیده تا ائلیه ابقا بیرده

حضرت باقره دوشدی گؤزی گفتاره گلوب

ایستدی خُبث وجودین ائده افشا بیرده

دور ایاقه دئدی السّاعه قیل عنوان آدوی

هر نه امر ایلیورم ائله تئز اجرا بیرده

طفل گؤردی آقانی، ایلدی اظهار وجود

پؤزولان مجلسی آرام ائلیه تا بیرده

نوجوان اوغلونی گؤرستدی او خیردا بالیا

دیل آچوب صحبته اول ارزل‌الاعدا بیرده

جرأتون وار منیم اوغلوملا گولشماقه دئدی؟

نه جواب آلدی گؤر اول احقر و ادنا بیرده

دئدی جدّیمدی حسین ابن علی ای ظالم!

مثلینی گؤرمز اونون دیدة دنیا بیرده

شانلی جدّیم آدیمی نام محمّد بگنوب

ذکر اولاندا دئییله افضل‌الأسما بیرده

هاشمیّونه حقارتدی گولشماق ولی بیل

یوخ بیزیم قلبیلریمیزده محابا بیرده

ایندی بیر شمشیر اونا وئر منه‌ده بیر شمشیر

دئمورم هئچ منه وئر جوشن هیجا بیرده

تن‌به‌تن جنگ ائلیاق مجلسون اولسون میدان

حیدرین غیرتینی ایله تماشا بیرده

من علی‌اوغلویام ای بی‌خِرد سفیانی!

خیبری فتح ائلیه گلمیش او مولا بیرده

قدرتیم واردی ییخام باشوه قصر ستمی

دوشمویه فکروه تا توطئه اصلا بیرده

اشیدوب بو سؤزی اول شوم عقب‌گرد ائلدی

شرمسار ائتدی اونی حیّ تعالا بیرده

دئدیلر ردّ ائلمه بو سؤزی الساعه امیر

زینبون قلبینه سال محنت عظمی بیرده

خبروز یوخدی دئدی غیرت آل اللهدن

ائتمیون بو عمله تکیۀ بیجا بیرده

امدیروب شیر شهامت آنالاری بولارا

حیدر اولادینه حاشا گله همتا بیرده

بو روایت یادیما سالدی ابوالفضل آقامی

لوح قلبیمده مجسّم اولی سقّا بیرده

گؤرورم غیضیلی بیر شیری الینده شمشیر

فتنه‌جو لشکریلن بیر دولی صحرا بیرده

شیر شمشیر ویرور، نعرۀ تکبیر چکور

صحن میدانه سالوب محشر کبرا بیرده

گه ساقا یورش ائدور، گاه سولا یورش ائدور

قاییدور رزمگهین قلبینه اما بیرده

خار و خاشاکی آلوبدی باشینا سیل کیمین

غرق ائدور خصمی آتور ساق سولا دریا بیرده

باشدی قولدی تؤکولور برگ خزان مثلی یئره

چون انور گویدن همان دست توانا بیرده

مرتضی بوسه ویران قوللارا جانلار قربان

خلق اولونماز چون ائله بیر ید بیضا بیرده

ملکوت اهلی تماشایه چیخوب گویلرده

لافتا جنگه گلوب خصمیله گویا بیرده

یاعلی کی چاغیرور فاطمه روحی پر آچور

سسلور احسن بالا! قیل ذکروی انشا بیرده

ملک‌الموت قالوب هانسی جانی قبض ائلسون

نئچه‌سین واصل ائده دوزخه یکجا بیرده

دگینوب بیربیرینه میمنه‌لر، میسره‌لر

گؤره بیلمز ائله بیر محشری اعدا بیرده

قاچاقاچدی هره اؤز جانینه مَنجا دولانور

چتین امّا تاپالار مأمن و مأوا بیرده

بیر هیاهو قؤپوب اول عرصه‌ده کی گل گؤره‌سن

سس سسه چاتسون او هنگامه‌ده حاشا بیرده

بیر سس هر سسدن اوجئیدی کی أنا بن الحیدر

مرحبی‌لر ئولومه اولدی مهیّا بیرده

ایاق آلتیندا قالوب چوخلار ایاقدان دوشدی

قالمادی بیر نفری سالم‌الاعضا بیرده

ویردی، سیندیردی، داغیتدی او سپاه ستمی

اسداللهدی، ائدوب ولوله برپا بیرده

صفلری پؤزدی آچوب نهره ساری یول سقّا

نیلی، فکر ایله یاروب حضرت موسی بیرده

الغرض نهری آلوب اوستونه ویردی علمین

جلوه‌لندی گؤزه آیات فَتَحنا بیرده

مشکینی سالدی سوا، سودامرین گؤتدی پایین

تا رباب ایلمیه خیمه‌ده شکوی بیرده

اصغره چاتماسا سو، اول بالا اللرده ئولر

گول آچانماز او گل گلشن طاها بیرده

اصغر ئولسه باخا بیلمز کی ربابین ئوزونه

نئجه اخیامه ائدر رجعت او والا بیرده

نهریدن چیخدی سوسوز، عالمی حیران قویدی

یئری وار عشقینه احسن دئیه زهرا بیرده

سو دئمه، خیمیه سقّا گُهر جان آپارور

نیمه‌جان سودامری ایلیه احیا بیرده

نخلزاره یولونی سالدی تئز اخیامه یئته

اصغری گؤزلری گؤرمزدی والّا بیرده

شوقیدن زین عقاب اوسته قاناد آچمیشدی

قصد ائدوب خیمه‌لرین سمتینی عنقا بیرده

سس دوشوب خیمیه سقّا سو آپاردی تؤکولون

جوشلانوب مور و ملخ ائتدی تقلّا بیرده

او گئده‌گئتده‌دی دشمنده یولون کسمکده

قیل ترحم اؤزون عبّاسه خدایا بیرده

هی وئرور مرکبه هی، تئز ائلیه یوللاری طی

گئدور اؤز عهدینه تا ائلیه ایفا بیرده

سعیی خیمه‌یدی فقط، گؤزلری مشکینده‌یدی

ایستموردی ائلیه خصمیله دعوا بیرده

 داش‌اورک کوفه‌لیلر دولدولا نخلستانه

شور و تشویشه دوشوب عالم بالا بیرده

اوخ‌آتانلار ییغیلوب دوتدی یول اوستونده کمین

چکه‌لر صحنه‌ده تصویر غم‌افزا بیرده

ناگهان چیخدی کمیندن ولی بیر بی‌ایمان

ائتدیگی ظلمه نئجه ایلیوم ایما بیرده

ساق قولی دوشدی بدندن او اوزون قوللی یلین

یوخدی تشریحینه بو قلبیده یارا بیرده

آلدی شمشیرینی سرعتله او حضرت سول اله

علوی غیرتینی ایلیه معنا بیرده

گلنون جانین آلوب قانینه غلطان ائلدی

قتل‌نامه اولارا ایلدی امضا بیرده

سول قولوندا آقانین، سالدیلا نامردانه

قیرمیزی قانی ائدوب توپراقی حمرا بیرده

باغرینا مشکی باسوب سرعتینی آرتیردی

یاعلی‌اصغریدی ازبری اوندا بیرده

کسیلن قوللارینون قانی گلوردی جوشه

قیل تجسّم آقانی ایله تباکا بیرده

یالواریردی ای عقابیم قدم آت سرعتیلن

مَخیمی غمدن ائدیم بلکه مبرّا بیرده

خیمیه چاتسا بو مشکین سویی دردیم قالماز

یارالاریم اولار او لحظه مداوا بیرده

وای او دمدن، پر آچوب مشکینه بیر اوخ دگدی

سر سرداره دولاندی هامی دنیا بیرده

سو سوزولدی، یئره امّیدی اوزولدی آقانین

بی‌شکیب اولدی علمدار شکیبا بیرده

قالدی آواره نئجه خیمه‌لره ساری گئده

اورگین قان ائلدی تیر شررزا بیرده

ناگهان باشینه بیر ضربت محکم دگدی

لرزیه گلدی او دم عرش معلّی بیرده

پارچالاندی باشی، ئوز اوسته گلوب توپراقه

وای‌بالام‌وای دئدی صدّیقۀ کبری بیرده

اوجا قامت اوجا یئردن ییخیلا گؤر نه گؤر

تاپدی آیدین قمرین طلعتی ایذا بیرده

«ناعمی» آغلا ابوالفضل آقانون غملرینه

  گؤزیاشون درده دگر موسم عقبا بیرده