عنایت اولسا اگر شهریار والادن

امام کون و مکان نور چشم زهرادن

توجه ائلسه گر حالیمه امام زمان

بو نثری نظم ائدرم وئرسه گر سرشکیم امان


عنایت اولسا اگر شهریار والادن

امام کون و مکان نور چشم زهرادن

توجه ائلسه گر حالیمه امام زمان

بو نثری نظم ائدرم وئرسه گر سرشکیم امان

بو مطلبی ائشیدیب دولموشام چو ابر بهار

سبب بو محنت اولوب خون دل گوزومدن آخار

بو دردیله گئجه گوندوز اورکدن اودلانیرام

سالیب خیالیمه زهرا مصبتین یانیرام

یازیللا بیر گون ابوالفضل شهر بطحاده

امیر خیبرون اوغلی حسینه دلداده

آلوب قرارینی غم ، داغدار اولوب دلدن

چیخوبدی صبح زمانینده اشکبار ائودن

یوزونده گوزیاشی اول یادگار شاه عرب

بقیع نی قصد ائلیوبدور ، او ماه چرخ ادب

آناسی فاطمه نین گل آدین ائدیب ازبر

گلوب بقیع چولونه گل یوزونده خون جگر

دئیردی دور آنا قیل دردیوی منه اظهار

گوروم سنی کیم ائدیب ئوز ائوینده درده دچار

گئجه گونوز سنی تعریف ائدر آنام ، آناجان

چوخ ایستیردی دیور خاطرون آتام ، آناجان

آنام دیور آنا چوخ مهربان آنایدون سن

ویراندا ثانی سنه سیلی ، کاش ئولیدیم من

ائشیتموشم قاپیوی یاندیروبدیلار  آنا جان

نجه دیوم قولیوی سیندیروبدیلار آناجان

یانوندا کاش اولیدیم سنی ویراندا عدو ...

گوریدون اوندا ابوالفضلیوی ائدردی نه لر

قباله ن الده گلنده سرای رحمتیوه

دیوله ثانی وئریب یولدا سیلی صورتیوه

همان او کوچه محنتده قامتون بوکولوب

نه لر اولوبدی همان کوچه ده نه لر توکولوب

نجه من آغلامیوم سن کیمی جوان ننه مه

نیه ویروبلا سنی ، من دوزنمورم بو غمه

ئولم ده سونمیاجاق شعله سی ئورک یارامین

دیوله قوللارینی باغلیوبدیلار آتامین

دئور بو سوزلری آغلور ، یتوبدی وقت اذان

آناسی ائوده ابوالفضلیدن اولوب نگران

ندن یوباندی دئیردی او مه لقا گوره سن

نه گلدی باشینه عباسیمین خدا گوره سن

گلردی هاردا اولیدی ، فلک یولون اگدی

الهی اولمیا عباسیمه نظر دگدی

خبر وئریبدیله مولایه کی امیر رجال

بالان سحر چخوب ائودن قیتمیوب تا حال

آناسی ام بنین ائوده سینه سین داغلیر

بالام یوباندی دیور ، گوز یاشین توکور آغلیر

پوزولدی حالی امامین ائشیتجاقین بو سوزی

 بهار ابر کیمی اشگیله دولوبدی گوزی

بی اختیار توکوب گوز یاشین او کان وفا

بولوبدی ام بنینین گلی گئدوبدی هارا

قاچوب بقیع چولونه سرعتیله شاه عرب

نه گوردی گوزدن الور خون دل او کان ادب

قویوبدی بوینونا چگنین او نامدار جهان

ائله یانا یانا  آغلور ، ائله دیور آناجان

اولیدی اوغلون ابوالفضل کاش آنا ، او زمان

آلیدی اوندا سنون ، انتقامیوی آناجان

نیه من اولمادیم اوندا ، سیلم گوزون ترینی

قولیوی سیندرانین ، سیندیرام سوموکلرینی

اولیدی ام بنینون بالاسی کاش او زمان

گوروم نجه قاپیوی یاندیراردیلار آنا جان

حسام آلوب اله خشمیله جانین اودلاردیم

قاپیوی اودلیانین خانمانین اودلاردیم

بو غملی سوزلر علینون قرارینی آلدی

آچوبدی قوللارین ، عباس بوینونا سالدی

بویوردی آغلاما عباس ، ائتمه قلبیمی قان

قضانین امری بلیدی جوان ئولیدی آنان

علی هراس ائلمز، عالم اولسا دشمن اوغول

بقای دینه گوره دینمدیم او گون من اوغول

واریدی قدرتیم الده ، ائدم جهانی فنا

پیمبر امرینه خاطر من ائتمدیم دعوا

رضا حقه گوره اودموشام جگر قانی

آلاردی یوخسا آتان انتقام زهرانی

دیوب بو سوزلری مولا ، اورکدن اودلاندی

سالوب خیالینه زهرا مصبیتین یاندی

دیدی خانم یانارام حشره دین قیامتیوه

ئولونجه آغلاسام آزدور سنون مصیبتیوه

یانار وجودیمی بیر شمع تک بو محنتده

سنون قیامتیوه آغلارام قیامتده

سنون قیامتون اولدی قاپون یاناندا خانیم

نه چگموسن بولورم سینه ن اودلاناندا خانیم

بو سوزلریله علی ماسوایه اود سالدی

پوزوبدی حالی ایوالفضلی ، طاقتین آلدی

آتا بالا غم اودیلان جهانی داغلادیلار

جوان ئولن ننه یه بیر دویونجا آغلادیلار

بس ایله عدلجو آغلاتما اهل معنانی

ملال فاطمه نین یوخدی حد و پایانی

بو مطلبی منه شاهرخ وئروبدی آهن خواه

گوروم ئولنلرینه رحمت ائلسون الله