داخل اولاندا مسجده اول شاه بی پناه

زهرا آپاردی معجره اَل، چکدی بیرجه آه


داخل اولاندا مسجده اول شاه بی پناه

زهرا آپاردی معجره اَل، چکدی بیرجه آه

سسلندی سیندی بال و پریم وامحمّدا

یاندی بو غصّه دن جگریم وامحمّدا

سندن صورا قرا گونه سالدی منی غمون

قان یاش توکر بو دیده لریم وامحمّدا

یاندی قاپوم ستمله، شهید اولدی محسنیم

جاریدور اشک چشم تریم وامحمّدا

یالقوزلیوبدیلار قولی باغلی عم اوغلومی

گَلمز هرایه بیر نفریم وامحمّدا

عمامه اَلده، ‌دیده سی یاشلی، جگرده آه

آغلار شبیریلن شبریم وامحمّدا

دیوب بو سوزلری خیرالنّسا بحال غمین

بو فکره دوشدی که قیلسون او قوم اوچون نفرین

قوپوب قیام قیامت بدون نفخه ی صور

ستونلر اوجالوب اولدی ستمی راه عبور

گوروب بو حالتی سلمان که بنت خیر بشر

اگر آچا باشینی عالمی یخار یکسر

خطاب قیلدی که ای بانوی خجسته لقا

عم اوغلون حیدر صفدر دگل بو امره رضا

بلایه صبر ایلماق چونکه سیزده عادتدور

سبب اودور که آتان عالمِینه رحمتدور

بو سوزلری ایشیدوب بانوی حریم ازل

قبول عرض قیلوب چکدی معجریندن اَل

ایدنده فاطمه ترک فغان و ناله و زار

ستون مسجد و منبر دوتوب یرینده قرار

چکنده تاج سر هَل اَتانی قوم دغا

رسول قبرینه یوز دوندَروب ایدردی ندا

نظاره قیل منی بی یاره یا رسول ا...

اولوب جهاندا گونوم قاره یا رسول ا...

جفای امّته باخ، محنت و مصیبته باخ

غریب عم اوغلوما قیل چاره یا رسول ا...

سالوبلا شالینی اوز بوینونا کمند مثال

چَکَلّه مجلس اغیاره یا رسول ا...

ابوشرور لعین اَل گوتورمیوب مندن

نه ایتمیشم او ستمکاره یا رسول ا...

منه ایده لّر ابوالشرّ بیعتین تکلیف

اطاعت ایتماقا اغیاره یا رسول ا...

مسیح تک منی آلموش آرایه قوم حسود

چکر عداوتیلن داره یا رسول ا...

او خیبری گوتورن اللریمی باغلادیلار

ووروبلا قلبیمه مین یاره یا رسول ا...

ابی شراره نون اوغلی او زاده ی سفیان

گَتوردیلر منی بیزاره یا رسول ا...

ایدن زمان بو خطابی وصیّ پیغمبر

گَلوب تزلزله قبر جناب خیر بشر

اولوب ظهور تجلّای نور مسجد آرا

چخوب او روضه ی پرنوریدن ید بیضا

تمام گوردوله سالار انبیا اَلیدور

محمّد عربی یعنی مصطفی اَلیدور

اوجالدی صوت جناب رسول ربّ جلیل

خطاب قیلدی او بی شرمه ای لعین و بخیل

غرض بو غصب خلافت جهانه سالدی فساد

شریعتی پوزوب، دین ایوین ایدوب برباد

بو فتنه باعث اولوب کربلا مصیبتینه

بو فتنه باعث اولوبدور علی شهادتینه

تمام باعثی بو فتنه دور سالوب عدوان

توکه لّر حشره کیمی هر نه قَدر ناحق قان

بس ایت بو قصّه نی قمری یِتیشمَز اتمامه

شرار مِحنتیلن اود دوتوب یانار خامه