عم اوغلی عالم وصلت یتور پایانه حیف اولسون

اُلور زهرا دونور گوگلون بو غمده قانه حیف اولسون


عم اوغلی عالم وصلت یتور پایانه حیف اولسون

اُلور زهرا دونور گوگلون بو غمده قانه حیف اولسون

عم اوغلی ای آدی بازار روحیمده اولان عزّت

گَل اگلش باشیمون اوسته ایداخ هجرانیدن صحبت

یتوبدور آیریلیق وقتی که بو وصلت بیله ساعت

اله دوشمز بو دوران و بیله بیر آنه حیف اولسون

منیم عمروم گونه بنزر گونون دائم باتان وقتی

تاپار رنگی اونون تغییر دوشر دلدن اذان وقتی

یتوب ایمدی اذان وقتی گوزیمون باغلانان وقتی

اذان اولدی داخی وصلیم چاتور پایانه حیف اولسون

گونون رنگی سارالدوقجا منیم رنگیم اولور ساری

مرور لحظه لر ایلور دلیمدن صلب گفتاری

یوزومی قبلیه دوندر یوزوم معبودیمه ساری

ویروم جان آغلا دی بو درد بی درمانه حیف اولسون

رضایم خستیم گوزدن بو دنیانی آتام ایمدی

اُلم گون باتمامیش گوندن تیز آماله چاتام ایمدی

بهشته ناگرانیمدور منی گوزلر آتام ایمدی

بهشت ایمدی دونوب من سیز اونا زندانه حیف اولسون

ایله حالیم پریشاندور ایله غمدن گلوگیرم

خیال ایلر منی هر کیم گوره بیر نقش و تصویرم

رضایم اُلماقا، دنیاده قالماقدان داخی سیرم

بو خسته جانیمی گر ویرمه سم جانانه حیف اولسون

سرشک آلیوی از صفحه ی سینونده یاز آغلا

نظام صبریوی پوزما بیله آز جانگداز آغلا

یورولموش جانیم اولسون گوزلرون قربانی آز آغلا

آخور اشکون یازور اشکی آخان دامانه حیف اولسون

باشیم اوستونده ای دردی اولان مندن گران اگلش

گوزومی باغلاماقا ای گوزومی باغلیان اگلش

باشما مثل پروانه یورولدون آز دولان اگلش

یانور دردونله بی پروا هامی پروانه حیف اولسون

بو ایوده سن منیم چوخ اگلشوبسن باشیمون اوسته

بو ساعت تک سنی ایتموب عم اوغلی هیچ بیری خسته

بو ساعت آیری ساعتدور دگل بو عمره وابسته

بو دورانیم گیدور الدن بیله دورانه حیف اولسون

عروج ایستور ایده روحیم قوشی، بال و پریمدن دوت

سراغ وحشت مرگی بو لرزان پیکریمدن دوت

دوتان درماندگانین اللریندن اللریمدن دوت

که دوشدوم دوت الیمدن درد بی درمانه حیف اولسون

منه دست قضا گرچه فراقون رختینی تیکدی

مغیره باعث اولدی محنت و غم قدّیمی بوکدی

بالامون قانیمی ثانی جفائیله یره توکدی

او بی تقصیریدن یرده آخان آلقانه حیف اولسون

دیللر دهریده هیچ بیر شیرین مانند جان اولماز

بالا جاندان اولار شیرین او شیرینه چاتان اولماز

منیم تک جان و اطفالیندن عالمده دویان اولماز

بالالاریمدا دردیمدن گلوبدور جانه حیف اولسون

من اُلسم غملریم سنلن اولار بو ایوده هم خانه

دل زینب فراقیمدن یقینیمدور دونر قانه

اونا تاپشور دیسون دائم ووراندا زلفینه شانه

آنام هیچ ایتمدی زلفین بو ایوده شانه حیف اولسون

من اُلسم درد هجرانیم سنون دردون گران ایلر

منیده تنگدل سنسیز یقین باغ جنان ایلر

گزر فردوس باغین فاطمه ورد زبان ایلر

گیچن گونلر اولار سنلن سر و سامانه حیف اولسون

فلک هر لقمه ی تلخی سنه ویردی یِدون اوتدون

منه صدمه یتن گون سن لباس صبریوی یتدون

الیمدن اونداکی طوفانه دوشموشدوم منیم دوتدون

من اولدوم غرق، سن دوشدون ولی طوفانه حیف اولسون

بو ایوده دردیمی بُلمور منیم سندن صورا بیر کس

قولومین سینمین زخمی عمیق اولدی ایله از بس

نه زحمتله وضو تجدید ایدوب باشه چکوردوم مس

ویریردیم من نمازی یا نجه پایانه حیف اولسون

حسین نازین حسن چکسون او دل آگاهه تاپشوردوم

بالام کلثومی زینب اول غمی جانکاهه تاپشوردوم

بالالاری سنه بیر بیر سنی اللهه تاپشوردوم

خداحافظ که من سیز قالدی بو کاشانه حیف اولسون

شرار محنتله بو ایوده سنلن یانمیشوخ باهم

سنه مندنده چوخ محنت بو ایوده یوز ویروب بُلّم

منی دلدن سالوب ثانی داخی من قالمارام اُلّم

منیم قتلیمده کی مطرح اولان فرمانه حیف اولسون

بو ایو مندن صورا بُلّم دونر بیر لیله ی تاره

صفاسین تیز ویرر الدن وورار چوخ دللره یاره

چکون سیز بو ایوین اُلسم در و دیوارینه قاره

یازون زهرا اُلوب بو ایو اولوب غم خانه حیف اولسون

یازون پشت دره زهرا بو یرده گُل کیمی سولدی

بو یرده بیر گلستانه نچه زاغ و زغن دولدی

یازون من ضعف ایدن یرده بالام محسن شهید اولدی

بو یرده سو کیمی قانی آخوب هر یانه حیف اولسون

یازون بو ایوده زهرانون توانون محنت آلموشدی

یره دوشموش ایاق آتدا قالان گُل تک سارالموشدی

آغارموشدی قرا زلفی جوانلیقدا قوجالموشدی

اورک داغی چکوب اود داغلی داغستانه حیف اولسون

یازون بو ایوده هر محنت شکیبی بی شکیب اولدی

حریم امّته اود ووردولار دوشدی لهیب اولدی

باشی اوسته اوتورموشدی طبیبی بی طبیب اولدی

یازون بیر دردی سنگین و غمی پنهانه حیف اولسون

منه دوتسان عزا چون یوخ منیم یار و هواداریم

قاپونی باغلا بیر ایوده اوزون اول بیر بالالاریم

اوزون سن نوحه خوانیم اول قیزیم زینب عزاداریم

ایله ورد زبان گوگلی دونن القانه حیف اولسون

منیم دردیمده ای دردی اولان هر یرده باش آغلا

دلون آئینه سین سعی ایله چوخ ایتمه خراش آغلا

اورگون دوزمسه آغلا، بالالاردان یواش آغلا

یاواش دی درد بی درمان اولان انسانه حیف اولسون

جنازم اوستونه بیرده منیم چکسن عبا خوشدور

حسینیم گر گلوب سندن خبر دوتسا دی ناخوشدور

منی یردن گوتورمه تیز، باخوب گورسه یریم بوشدور

اوزونی اُلدورر آغلار گَلر افغانه حیف اولسون

ابلالاریم دوشر یاده دلیمده محنتیم آرتار

مواظب اول اولاردان سن، اولاره اول اوزون دلدار

حسینین هر گئجه تاپشور باشی اوسته سو قویسونلار

بالامی تشنه لب اعدا بویالّار قانه حیف اولسون

وصیّت چونکه لازمدی اُلنده هر مسلمانه

وصیّت ایلورم عمروم اودم که یتدی پایانه

منی گیزلینجه دفن ایله فغانه گَل یانا یانه

شبانه دفن اولان، سرّی اولان پنهانه حیف اولسون

حضوروندن سنون بیرده تقاضا ایلورم شاها

قاپودا بیر قرا پرچم وورون ممکن اگر اولسا

اونی هر رهگذر گورسه بُلر حتماً اُلوب زهرا

دیر یاسه باتوب ایمدی بو اهل خانه حیف اولسون

اوایل که گلشنی بیر نادر انسان دادیوه یتدی

حساب چاپ دیوانون کمکلیق ایتدی چاپ ایتدی

او بیر انسانیدی تاریخ قرخ بشده گَلوب گیتدی

او دوران و او کس گیتدی، ایله دورانه حیف اولسون