ریحانه ی پیغمبر یا فاطمة الزّهرا

سسلردی سنی حیدر یا فاطمة الزّهرا


ریحانه ی پیغمبر یا فاطمة الزّهرا

سسلردی سنی حیدر یا فاطمة الزّهرا

لوح و قلم و دفتر یا فاطمة الزّهرا

دللرده آدون ازبر یا فاطمة الزّهرا

گلشنده دیر گللر یا فاطمة الزّهرا

یافطمه ذکریمدور بیر عاشق پردردم

جنّاتی ویرون شیخه من یاره خوشام هر دم

جنّت وطنیم اولسا بی فاطمه ولگردم

من فاطمه نین عشقین ویرسم اورا نامردم

ذکریمدی منیم یکسر یا فاطمة الزّهرا

ای رحمت بی حدّی جنّ و ملکه ملموس

وی پشّه ی درگاهی خوش جلوه تر از طاووس

جبریل امین ایلر خاک قدموندن بوس

خاضعدی سنه کوه و رود و یم و اقیانوس

سسلر سنی دریالر یا فاطمة الزّهرا

منقوشیدی گویلرده یا فاطمه مولاتی

محرابیده منبرده یا فاطمه مولاتی

سسلله ملک لرده یا فاطمه مولاتی

مولا دیدی خیبرده یا فاطمه مولاتی

گوتدی قاپونی حیدر یا فاطمة الزّهرا

سن آیه ی تطهیره مصداق مصوّرسن

یوخ یوخ منی عفو ایله اونداندا مطهّرسن

سن قدرت بازوی جنگاور حیدرسن

انصاف ایلسه هر کیم سن فاتح خیبرسن

سن ویردون اونا لنگر یا فاطمة الزّهرا

دی منکر زهرایه لعنت سنه شاملدی

حجّونده نمازونده بی فاطمه باطلدی

دوت دامن زهرادن حلّال مشاکلدی

هم امّ ابیهادی، هم امّ فضائلدی

کیم فاطمیه بنزر یا فاطمة الزّهرا

ماه علوی ناگه نهر اوسته باتان وقته

عبّاس علمی بیردن میداندا باتان وقته

پیکان گوزونون اوسته یعنی اوتوران وقته

غیرتلی علی اوغلی آتدان یخلان وقته

سسلردی اوزون اللر یا فاطمة الزّهرا

عطشان لبیله اصغر میدانه گَلن ساعت

اوچ شعبه اوخی دشمن غیظیله چکن ساعت

نازک بوغازا پیکان شدّتله دَین ساعت

شش ماهه او پیکانی میداندا امن ساعت

سسلندی علی اصغر یا فاطمة الزّهرا

فرمان یتیشوب خیمه ظلمیله یانان گونده

قمچی گوجونه قیزلار بیر بیر سویولان گونده

بعضی نجفه ساری گوزیاشی توکن گونده

وحشتدن اوزون خندق یا نهره آتان گونده

ایلردی صدا یکسر یا فاطمة الزّهرا

دل داغلی رقیّنده شاماته گیدن آخشام

ناگه دوه نین اوستن توپراقه دوشن آخشام

احوالینه آهولر چولده ملشن آخشام

اول قورخولی صحراده وحشتله گَزن آخشام

سسلردی همان دختر یا فاطمة الزّهرا

بیر ناقه مینر زهرا محشر اولی نورانی

یاقوت و زبرجددن دیرناقلاری نورانی

هم ظاهری پیدادور، هم باطنی پنهانی

بیر نور مجسّمدور حمل ایلوری زهرانی

جبریل امین چاکر یا فاطمة الزّهرا

اول ناقه نین اوستونده سسلر حق سبحانی

باشندا قرا معجر، زلفینده اوغول قانی

بیر قانه باتان کوینک سویلر که حسین هانی

گوزلر دولانار ناگه گورسونله که مولانی

محشرده قوپار محشر یا فاطمة الزّهرا

عالم گوره جاق اول دم طوفان کیمی گوزیاشین

شه قویدی قدم حشره آغلاتدی داغین داشین

یوخدور باشی پیکرده آلموش اله اوز باشین

سرعتله قاچور زینب دیدار ایده قارداشین

باشندا قرا معجر یا فاطمة الزّهرا

عشق آتشینه پشت درگاهیده یاندون سن

دیواره سخلمشدون قدرتیله دایاندون سن

اوّلده اَُلوب محسن القانه بویاندون سن

مسمار اوز ایشین گوردی ناگه یارالاندون سن

مسماریدی یا خنجر یا فاطمة الزّهرا

هر گون سارالوب سولدون سولدی گَل پیغمبر

شدّتله مریض اولدون ایوده سالنوب بستر

بیر گون نگران گَلدی غم منزلینه حیدر

باخدی یوزیوه حسرت گوردی یومولوب گوزلر

سسلندی او دم حیدر یا فاطمة الزّهرا

سندنصورا فکر ایتمه آیدین گونوزوم قالدی

یا غصّه لی قلبیمده السّاعه دوزوم قالدی

دیندیر منی جان سسله آغزیمدا سوزوم قالدی

زهرا یومولان گوزده واللهی گوزوم قالدی

قویما یومولا گوزلر یا فاطمة الزّهرا

قلبیم باشنا ایمدی هجر آتشینی وورما

سرحدّ فراق اوسته اصرار ایلیوب دورما

باری منه رحم ایله بو رشته نی گَل قیرما

یثربده تکم زهرا گیتمه منی سندرما

نولدی او گیچن گونلر یا فاطمة الزّهرا